سیدنا سعد بن ابی وقاص رضی اللہ عنہ روایت کرتے ہیں: نبی اکرم صلی اللہ علیہ وسلم نے ارشاد فرمایا: ”انسان کی سعادت مندی میں تین چیزیں شامل ہیں، اور انسان کی بدنصیبی میں تین چیزیں شامل ہیں، انسان کی سعادت مندی میں نیک بیوی، اچھا گھر اور اچھی سواری شامل ہیں، اور انسان کی بدنصیبی میں بری بیوی، برا گھر اور بری سواری شامل ہیں“۔
یہ روایت امام أحمد، امام بزار نے اور امام طبرانی نے معجم کبیر اور معجم اوسط میں نقل کی ہے، امام أحمد کے رجال صحیح کے رجال ہیں۔ [مجمع الزاوئد ومنبع الفوائد/كِتَابُ النِّكَاحِ/حدیث: 7432]

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں: ”تین چیزیں کمر توڑ دیتی ہیں، برا شوہر جس کی بیوی اس سے بے خوف ہو اور اس کے ساتھ خیانت کرے، ایسا حکمران، جو اللہ تعالیٰ کو ناراض کرے اور لوگوں کو راضی کر دے، مومن عورت کے عمل کی مثال ستر صدیقوں کی مانند ہے، اور بری عورت کے عمل کی مثال ایک ہزار فاجر لوگوں کے فجور کی مانند ہے“۔
یہ روایت امام بزار نے نقل کی ہے، وہ کہتے ہیں: ایک بات میں بھول گیا ہوں۔ میں یہ کہتا ہوں: وہ روایت میرے سامنے سے گزری ہے: (اس میں یہ الفاظ ہیں:) ”اور برا ہمسایہ اگر کوئی بھلائی دیکھے گا، تو اسے دفن کر دے گا اور اگر کوئی برائی دیکھے گا، تو اُسے پھیلا دے گا“۔ اس روایت کی سند میں ایک راوی سعید بن سنان ہے اور وہ متروک ہے۔ [مجمع الزاوئد ومنبع الفوائد/كِتَابُ النِّكَاحِ/حدیث: 7433]

سیدنا انس بن مالک رضی اللہ عنہ روایت کرتے ہیں: نبی اکرم صلی اللہ علیہ وسلم نے ارشاد فرمایا: ”جس شخص کو اللہ تعالیٰ نے نیک بیوی عطا کی ہو، تو اللہ تعالیٰ نے اس کے نصف دین کے بارے میں، اس کی مدد کر دی، تو باقی نصف کے بارے میں، اُسے اللہ تعالیٰ سے ڈرتے رہنا چاہیے“۔
یہ روایت امام طبرانی نے معجم اوسط میں نقل کی ہے، اس کی سند میں یہ بات مذکور ہے، یہ عبدالرحمن کے حوالے سے سیدنا انس رضی اللہ عنہ سے منقول ہے، اور ان سے زہیر بن محمد نے
یہ روایت نقل کی ہے، میں ان سے واقف نہیں ہوں، البتہ اگر یہ عبدالرحمن بن زید بن اسلم ہیں، تو پھر ان کی اس روایت کی سند منقطع ہے، اور اگر یہ ان کے علاوہ کوئی اور ہے، تو پھر میں ان سے واقف نہیں ہوں، باقی اللہ بہتر جانتا ہے۔ [مجمع الزاوئد ومنبع الفوائد/كِتَابُ النِّكَاحِ/حدیث: 7434]

سیدنا ابوہریرہ رضی اللہ عنہ روایت کرتے ہیں: نبی اکرم صلی اللہ علیہ وسلم نے ارشاد فرمایا: ”اسلام کے بعد، بندے کو کوئی ایسی چیز نصیب نہیں ہوئی، جو اس کے لئے مومن بیوی سے زیادہ بہتر ہو، کہ جب آدمی اس عورت کی طرف دیکھے، تو وہ اسے اچھی لگے، اور جب آدمی عورت کے پاس موجود نہ ہو، تو وہ اپنی ذات اور اپنے شوہر کے مال کے بارے میں اُس کی حفاظت کرے“۔
یہ روایت امام طبرانی نے معجم اوسط میں نقل کی ہے، اس کی سند میں ایک راوی جابر جعفی ہے اور وہ ضعیف ہے، ویسے اس کی توثیق کی گئی ہے، اس روایت کے بقیہ رجال ثقہ ہیں۔ [مجمع الزاوئد ومنبع الفوائد/كِتَابُ النِّكَاحِ/حدیث: 7435]

سیدنا سمرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”انسان کی حسرت تین چیزوں کے بارے میں زیادہ شدید ہوتی ہے، ایک وہ شخص جس کی زمین ہو، جسے سیراب کیا جاتا ہو، اور اس شخص کی ایک اونٹنی ہو جس پر پانی لا کر وہ اپنی زمین کو سیراب کرتا ہو، جب اس کی زمین کو پانی کی شدید ضرورت ہو اور وہ اپنا پھل نکالنے والی ہو، اس وقت اس کی اونٹنی مر جائے، تو وہ اپنی اونٹنی پر حسرت کو پائے گا، وہ یہ بات جانتا ہو گا کہ اب اسے اس طرح کی اونٹنی نہیں ملے گی، اور اسے اپنی زمین کے پھل کے حوالے سے بھی حسرت ہو گی کہ کوئی اور ذریعہ اختیار کرنے سے پہلے وہ خراب ہو جائے گا۔ ایک وہ شخص، جو کسی عمدہ گھوڑے پر سوار ہو اور کفار کا سامنا کرے، جب دونوں فریق ایک دوسرے کے مدمقابل آ جائیں اور اللہ کا دشمن پسپا ہو جائے، تو وہ شخص اپنے گھوڑے پر سوار ہو کر آگے بڑھے، یہاں تک کہ جب وہ دشمن کے پاس پہنچنے والا ہو، تو اس کے گھوڑے کی ٹانگ ٹوٹ جائے، وہ اپنے گھوڑے سے نیچے اترے، اس وقت اس کو حسرت محسوس ہو گی کہ اسے اس طرح کا گھوڑا بھی نہیں ملے گا اور اس چیز پر بھی حسرت محسوس ہو گی کہ اس نے جو کامیابی حاصل کرنی تھی، وہ رہ گئی ہے، جو اُس کے سامنے آ چکی تھی۔ اور ایک وہ شخص، جس کے پاس بیوی موجود ہو، جس کی ظاہری شکل و صورت اور اس کے دین، دونوں سے وہ راضی ہو، وہ بیوی بچے کو جنم دے، اور پھر وہ نفاس کے دوران انتقال کر جائے، تو اس شخص کو اپنی بیوی کے حوالے سے حسرت محسوس ہوتی ہے، وہ یہ گمان کرتا ہے کہ اُسے اس جیسی بیوی نہیں ملے گی، اور وہ اپنے بچے کے حوالے سے بھی حسرت کو پاتا ہے، اُسے اس بچے کے ضائع ہونے کا اندیشہ ہوتا ہے، اس سے پہلے کہ اسے کوئی دودھ پلانے والی ملے۔ نبی اکرم صلی اللہ علیہ وسلم فرماتے ہیں: یہ ان حسرتوں میں سب سے بڑی ہے“۔
یہ روایت امام بزار نے اور امام طبرانی نے معجم کبیر اور معجم اوسط میں نقل کی ہے، اس کی سند حسن ہے، سعید بن بشیر کے علاوہ اس میں کوئی اور (ضعیف) راوی نہیں ہے، ایک جماعت نے اس کی توثیق کی ہے۔ سی روایت امام بزار تے اور امام طبرانی نے معجم کبیر اور نجم اوسط میں نقل کی ہے اس کی سند حسن ہے سعید بن بشیر کے علاوہ اس میں کوئی اور (ضعیف) راوی نہیں ہے ایک جماعت نے اس کی توثیق کی ہے۔ [مجمع الزاوئد ومنبع الفوائد/كِتَابُ النِّكَاحِ/حدیث: 7436]

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں: ”چار چیزیں جس شخص کو دے دی گئیں، اُسے دنیا اور آخرت کی بھلائی دے دی گئی، شکر کرنے والا دل، ذکر کرنے والی زبان، آزمائش پر صبر کرنے والا جسم، اور ایسی عورت، جو اپنی ذات اور آدمی کے مال کے حوالے سے، خیانت کی خواہش مند نہیں ہوتی“۔
یہ روایت امام طبرانی نے معجم کبیر اور معجم اوسط میں نقل کی ہے، معجم اوسط کے رجال صحیح کے رجال ہیں۔ [مجمع الزاوئد ومنبع الفوائد/كِتَابُ النِّكَاحِ/حدیث: 7437]

سیدنا ابوامامہ رضی اللہ عنہ روایت کرتے ہیں: نبی اکرم صلی اللہ علیہ وسلم نے سیدنا معاذ بن جبل رضی اللہ عنہ سے فرمایا: اے معاذ! شکر کرنے والا دل، ذکر کرنے والی زبان، نیک بیوی، تمہاری دنیا اور تمہارے دین کے معاملات میں تمہاری مدد کرتے ہیں، اور یہ اس میں سب سے بہتر ہیں، جسے لوگ حاصل کرتے ہیں“
یہ روایت امام طبرانی نے نقل کی ہے اس کی سند میں ایک راوی علی بن یزید ہے وہ ضعیف ہے ویسے اس کی توثیق کی گئی ہے۔ [مجمع الزاوئد ومنبع الفوائد/كِتَابُ النِّكَاحِ/حدیث: 7438]

سیدنا عبداللہ بن سلام رضی اللہ عنہ بیان کرتے ہیں: نبی اکرم صلی اللہ علیہ وسلم نے ارشاد فرمایا: ”خواتین میں سب سے بہتر وہ ہے کہ جب تم (اس کو دیکھو، تو وہ تمہیں اچھی لگے، جب تم (اسے) حکم دو، تو وہ تمہاری اطاعت کرے اور وہ تمہاری غیر موجودگی میں، اپنی ذات اور تمہارے مال کی حفاظت کرے“۔
یہ روایت امام طبرانی نے نقل کی ہے، اس کی سند میں ایک راوی زریک بن ابوزریک ہے، اور میں اس سے واقف نہیں ہوں اس روایت کے بقیہ رجال ثقہ ہیں۔ [مجمع الزاوئد ومنبع الفوائد/كِتَابُ النِّكَاحِ/حدیث: 7439]

سیدنا ابوامامہ رضی اللہ عنہ روایت کرتے ہیں: نبی اکرم صلی اللہ علیہ وسلم نے ارشاد فرمایا: ”خواتین میں، نیک عورت کی مثال اعصم کوے کی مانند ہے، عرض کی گئی: یا رسول اللہ! اعصم کوا کون سا ہوتا ہے؟ آپ نے فرمایا: جس کی دو ٹانگوں میں سے ایک سفید ہو“۔
یہ روایت امام طبرانی نے نقل کی ہے، اس کی سند میں ایک راوی مطرح بن یزید ہے اور اس کے ضعیف ہونے پر اتفاق پایا جاتا ہے۔ [مجمع الزاوئد ومنبع الفوائد/كِتَابُ النِّكَاحِ/حدیث: 7440]

عمارہ بن خزیمہ بن عمرو بیان کرتے ہیں: ہم لوگ سیدنا عمرو بن العاص رضی اللہ عنہ کے ساتھ ایک حج یا عمرہ کے موقع پر موجود تھے، جب ہم ”مر الظہران“ کے مقام پر پہنچے، تو وہاں ایک عورت ہودج میں موجود تھی، جس نے اپنا ہاتھ ہودج پر رکھا ہوا تھا، جب وہ نیچے کی طرف اتر رہے تھے، تو وہ ایک گھاٹی میں داخل ہوئے اور ان کے ساتھ ہم بھی داخل ہو گئے، انہوں نے یہ بتایا: ایک مرتبہ ہم نبی اکرم صلی اللہ علیہ وسلم کے ساتھ اس مقام پر موجود تھے، تو یہاں بہت سے کوے تھے اور ان میں ایک ایسا کوا بھی تھا، جس کی چونچ اور ٹانگیں اعظم تھیں، نبی اکرم صلی اللہ علیہ وسلم نے فرمایا: عورتوں میں سے جنت میں صرف اتنی عورتیں داخل ہوں گی، جس طرح ان کووں میں یہ کوا ہے۔ ابوعمر کہتے ہیں: اعصم سے مراد سرخ ہے۔
یہ روایت امام طبرانی نے نقل کی ہے، اس روایت کے یہ الفاظ ان کے نقل کردہ ہیں، اسے امام أحمد نے بھی نقل کیا ہے، امام أحمد کے رجال ثقہ ہیں۔ [مجمع الزاوئد ومنبع الفوائد/كِتَابُ النِّكَاحِ/حدیث: 7441]