عروہ بن زبیر رحمہ اللہ بیان کرتے ہیں کہ آپ صلی اللہ علیہ وسلم نے فرمایا: ”جب تم میں سے کوئی بارش یا بجلی کو دیکھے تو اس کی طرف اشارہ نہ کرے بلکہ اس کی نعت و صفت بیان کرے۔“
سلیمان بن عبداللہ عویمر سے اور وہ عروہ سے بیان کرتے ہیں، اس لمبی حدیث میں جس کو ہم نے ابوسعید رحمہ اللہ سے سنا۔
عبداللہ بن عویمر بیان کرتے ہیں کہ میں عروہ بن زبیر رحمہ اللہ کے ساتھ تھا، میں نے اپنے ہاتھ سے بادلوں کی طرف اشارہ کیا تو انہوں نے کہا: تو ایسا نہ کر، بیشک رسول کریم صلی اللہ علیہ وسلم نے ”اس سے منع کیا ہے کہ اس کی طرف اشارہ کیا جائے۔“ ابن ابی حسین رحمہ اللہ بیان کرتے ہیں کہ بیشک نبی کریم صلی اللہ علیہ وسلم نے ”بارش کی طرف اشارہ کرنے سے منع کیا ہے۔“ یہ روایت مرسل ہے۔ [السنن الكبرى للبيهقي/كتاب صلاة الاستسقاء/حدیث: 6473]

سیدنا عبداللہ بن عباس رضی اللہ عنہما سے روایت ہے، وہ کہتے ہیں کہ رسول اللہ صلی اللہ علیہ وسلم نے ”بارش کی طرف اشارہ کرنے سے“ منع فرمایا۔
یہ روایت ایک دوسری ضعیف سند سے بھی مروی ہے۔ [السنن الكبرى للبيهقي/كتاب صلاة الاستسقاء/حدیث: 6474]

ہمیں ثقہ راویوں نے خبر دی ہے کہ مجاہد رحمہ اللہ کہا کرتے تھے: «رَعْد» فرشتہ ہے اور «بَرْق» فرشتے کے پر ہیں، جو بادلوں کو چلاتے ہیں۔ امام شافعی رحمہ اللہ کہتے ہیں: جو مجاہد رحمہ اللہ نے کہا ہے وہ ظاہرِ قرآن کے کس قدر مشابہ ہے۔ [السنن الكبرى للبيهقي/كتاب صلاة الاستسقاء/حدیث: 6475]

عمر بن ابی زائدہ رحمہ اللہ کہتے ہیں: میں نے عکرمہ رحمہ اللہ سے سنا، ایک آدمی نے ان سے اللہ تعالیٰ کے اس فرمان ﴿وَيُسَبِّحُ الرَّعْدُ بِحَمْدِهِ﴾ [سورة الرعد: 13] کے بارے میں دریافت کیا، تو انہوں نے کہا: وہ فرشتہ ہے جو بادلوں کو ہانکتا ہے، جس طرح اونٹوں والا اونٹوں کو ہانکتا ہے۔ [السنن الكبرى للبيهقي/كتاب صلاة الاستسقاء/حدیث: 6476]

ابو محمد ہاشمی اپنے باپ سے اور وہ علی رضی اللہ عنہ سے بیان کرتے ہیں کہ «الرَّعْدُ» ”رعد“ فرشتہ ہے اور «الْبَرْقُ» ”برق“ لوہے کا کوڑا ہے۔ [السنن الكبرى للبيهقي/كتاب صلاة الاستسقاء/حدیث: 6477]

مغیرہ بن مسلم (سیدنا حسن بن علی رضی اللہ عنہما کے آزاد کردہ غلام) اپنے والد سے بیان کرتے ہیں کہ بے شک سیدنا علی رضی اللہ عنہ نے فرمایا: رعد فرشتہ ہے۔ [السنن الكبرى للبيهقي/كتاب صلاة الاستسقاء/حدیث: 6478]

ربیع بن ابیض علی رضی اللہ عنہ سے بیان کرتے ہیں: ”برق“ فرشتے کا کوڑا ہے۔ [السنن الكبرى للبيهقي/كتاب صلاة الاستسقاء/حدیث: 6479]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”قحط سالی سے یہ مراد نہیں کہ بارش نہ ہو، قحط سالی سے مراد یہ ہے کہ بارش ہو مگر زمین میں کچھ پیدا نہ ہو۔“ [السنن الكبرى للبيهقي/كتاب صلاة الاستسقاء/حدیث: 6480]

سیدنا عبداللہ رضی اللہ عنہ کہتے ہیں کہ نبی کریم صلی اللہ علیہ وسلم نے فرمایا: ”کوئی سال کسی دوسرے سال سے زیادہ بارش والا نہیں ہوتا، اور جب بھی جنوب کی ہوائیں چلتی ہیں تو فلاں وادی بہہ پڑتی ہے۔“
یہ روایت اس سند کے ساتھ مرفوع بیان کی گئی ہے، جبکہ صحیح یہ ہے کہ یہ موقوف ہے۔ [السنن الكبرى للبيهقي/كتاب صلاة الاستسقاء/حدیث: 6481]

سیدنا عبداللہ بن مسعود رضی اللہ عنہ کہتے ہیں کہ کوئی سال کسی دوسرے سال سے زیادہ بارش والا نہیں ہوتا، لیکن اللہ تعالیٰ اسے پھیرتا ہے جیسے چاہتا ہے۔ [السنن الكبرى للبيهقي/كتاب صلاة الاستسقاء/حدیث: 6482]