زید بن خالد جہنی رضی اللہ عنہ کی حدیث کے متعلق امام شافعی رحمہ اللہ کہتے ہیں: میرا خیال آپ صلی اللہ علیہ وسلم کے فرمان کے بارے میں، واللہ اعلم، یہ ہے کہ جس نے کہا کہ ”ہم اللہ کی رحمت اور اس کے فضل سے بارش دیے گئے ہیں“، یہ اللہ تعالیٰ پر ایمان ہے کہ اس کے سوا نہ کوئی بارش دے سکتا ہے نہ ہی کچھ اور۔ جس نے یہ کہا کہ ہم فلاں قسم (ستارے) کی وجہ سے بارش دیے گئے ہیں، جو اہل شرک کا نظریہ تھا کہ فلاں ستارے نے بارش برسائی ہے اور فلاں وجہ سے بارش آئی ہے، یہ کفر ہے جیسا کہ آپ صلی اللہ علیہ وسلم نے فرمایا؛ کیونکہ «النَّوءُ» ”وقت“ ہے اور وقت مخلوق ہے جو نہ اپنے لیے کچھ اختیار رکھتا ہے اور نہ دوسرے کے لیے، نہ وہ بارش برسا سکتا ہے اور نہ کچھ اور کرسکتا ہے اور جس نے کہا کہ ہم فلاں نوء سے بارش دیے گئے ہیں یعنی فلاں نوء کے وقت میں بارش دیے گئے ہیں، تو یہ ایسے ہی ہے جیسے کوئی کہے کہ ہم فلاں ماہ میں بارش دیے گئے ہیں۔ یہ کہنا کفر نہیں ہوتا، البتہ اس کے علاوہ کوئی دوسری بات کہنا مجھے اس سے زیادہ پسند ہے اور مجھے پسند ہے کہ یہ بات ایسے کہی جائے کہ ”ہم فلاں وقت میں بارش دیے گئے ہیں“۔
امام شافعی رحمہ اللہ کہتے ہیں کہ مجھے یہ بات پہنچی ہے کہ رسول اللہ صلی اللہ علیہ وسلم کے بعض صحابہ رضی اللہ عنہم جب صبح کرتے اور لوگوں کو بارش دی گئی ہوتی تو کہتے: ”ہم فتح کے نوء سے بارش دیے گئے ہیں“، پھر یہ آیت پڑھتے ﴿مَا يَفْتَحِ اللَّهُ لِلنَّاسِ مِنْ رَحْمَةٍ فَلَا مُمْسِكَ لَهَا﴾ [سورة فاطر: 2] ۔
امام شافعی رحمہ اللہ کہتے ہیں: عمر رضی اللہ عنہ سے بیان کیا گیا ہے کہ انہوں نے جمعہ کے دن منبر پر فرمایا کہ «الثُّرَيَّا» (ثریا) کی قسم کتنی باقی ہے؟ تو عباس رضی اللہ عنہ کھڑے ہوئے اور انہوں نے کہا کہ «العَوَاءُ» (عواء) کے بغیر کچھ باقی نہیں ہے۔ پھر عمر رضی اللہ عنہ نے دعا کی اور دیگر لوگوں نے بھی دعا کی، یہاں تک کہ وہ منبر سے اترے تو بارش برسنا شروع ہوگئی اور اس سے لوگ زندگی دیے گئے۔
امام شافعی رحمہ اللہ کہتے ہیں: عمر رضی اللہ عنہ کا قول اسے واضح کرتا ہے جو میں نے بیان کیا؛ کیونکہ ان کی مراد یہ تھی کہ ثریا کا کتنا وقت باقی ہے۔ یہ بات اس علم کی بنا پر کہی جو وہ جانتے تھے کہ بیشک اللہ تعالیٰ نے ان اوقات میں بارش کو مقدر کیا ہے جس طرح تجربے سے یہ بات جانی گئی ہے کہ فلاں وقت کو اللہ تعالیٰ نے سردی اور گرمی کے لیے مقدر کیا ہے؛ اور وہ کہتے ہیں: مجھے یہ بات بھی پہنچی ہے کہ عمر بن خطاب رضی اللہ عنہ بنو تمیم کے ایک بوڑھے پر ناراض ہوگئے جب وہ عکاظ کے بازار میں ٹیک لگائے بیٹھا تھا اور لوگ بارش دیے گئے تھے۔ اس نے کہا: ”آج صبح پچھتر (ستاروں) نے سیراب کردیا ہے“، مگر عمر رضی اللہ عنہ نے اس کی بات کا انکار کردیا، پچھتر کو بارش کی طرف منسوب کیے جانے کی وجہ سے یہ بات کہی۔ [السنن الكبرى للبيهقي/كتاب صلاة الاستسقاء/حدیث: 6453]

مالک رحمہ اللہ بیان کرتے ہیں کہ انہیں یہ بات پہنچی کہ ابوہریرہ رضی اللہ عنہ یہی بات کہتے ہیں۔ سو انہوں نے اس بات کا تذکرہ کیا اور کہا کہ جو بات انہوں نے پہلے عمر بن خطاب رضی اللہ عنہ سے بیان کی وہی ہے۔ [السنن الكبرى للبيهقي/كتاب صلاة الاستسقاء/حدیث: 6454]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم فرماتے تھے: ”قوم کو کوئی نعمت رات کے وقت ملتی ہے، پھر وہ صبح اس حال میں کرتے ہیں کہ اکثر ان میں سے اس کا انکار کرنے والے ہوتے ہیں اور وہ کہہ رہے ہوتے ہیں کہ ہم فلاں فلاں قسم کی وجہ سے بارش دیے گئے ہیں۔“
سعید کہتے ہیں کہ ہم نے یہ بات سیدنا ابوہریرہ رضی اللہ عنہ سے سنی اور انہوں نے مجھ سے ایسی حدیث بیان کی جس (کے راوی) پر میں تہمت نہیں لگا سکتا۔ بیشک وہ سیدنا عمر بن خطاب رضی اللہ عنہ کی صلاۃ الاستسقاء میں شامل ہوئے اور وہ قحط سالی میں لوگوں کے لیے بارش مانگ رہے تھے۔ سیدنا عمر رضی اللہ عنہ اور لوگوں نے بارش کے لیے دیر تک دعا و التجا کی اور سیدنا عباس بن عبدالمطلب رضی اللہ عنہ سے کہا: اے عباس! ”ثریا“ کی فلاں قسم کتنی باقی ہے؟ انہوں نے کہا: اے امیر المومنین! اہل علم خیال کرتے ہیں، سات دن کے بعد وہ افق کے کناروں سے ہٹ جائے گا۔ راوی کہتے ہیں: اللہ کی قسم! ابھی وہ سات دن ہی گزرنے پائے تھے کہ لوگوں کو بارش دے دی گئی۔ [السنن الكبرى للبيهقي/كتاب صلاة الاستسقاء/حدیث: 6455]

سیدنا انس رضی اللہ عنہ کہتے ہیں کہ ہمیں بارش آ پہنچی اور ہم رسول اللہ صلی اللہ علیہ وسلم کے ساتھ تھے، تو آپ صلی اللہ علیہ وسلم نے اپنے کپڑے کو ہٹایا یہاں تک کہ آپ صلی اللہ علیہ وسلم کے جسم کو بارش کے قطرات پہنچے۔ ہم نے عرض کیا: اے اللہ کے رسول! آپ صلی اللہ علیہ وسلم نے ایسا کیوں کیا؟ تو آپ صلی اللہ علیہ وسلم نے فرمایا: ”کیونکہ یہ ابھی ابھی اپنے رب کے پاس سے آئی ہے۔“ [السنن الكبرى للبيهقي/كتاب صلاة الاستسقاء/حدیث: 6456]

یزید بن الہاد رحمہ اللہ بیان کرتے ہیں کہ جب پانی بہہ پڑتا تو آپ صلی اللہ علیہ وسلم فرماتے: «اخْرُجُوا بِنَا إِلَى هَذَا الَّذِي جَعَلَهُ اللهُ طَهُورًا، فَنَتَطَهَّرَ مِنْهُ، وَنَحْمَدَ اللهَ عَلَيْهِ» ”ہمارے ساتھ اس (پانی) کی طرف نکلو جسے اللہ نے پاک کرنے والا بنایا ہے، ہم اس سے پاکیزگی حاصل کریں اور اس پر اللہ کی حمد بیان کریں۔“
یہ روایت منقطع ہے۔ [السنن الكبرى للبيهقي/كتاب صلاة الاستسقاء/حدیث: 6457]

عمرو بن سعد رحمہ اللہ بیان کرتے ہیں، جو عمر بن خطاب رضی اللہ عنہ کے غلام ہیں کہ ہمارے پاس سے عمر بن خطاب رضی اللہ عنہ گزرے، وہ حج سے آئے تھے اور ان کے ساتھ رسول اللہ صلی اللہ علیہ وسلم کے صحابہ رضی اللہ عنہم کی ایک جماعت تھی، انہوں نے کہا: دریا سے غسل کر لو، یہ بے شک بابرکت ہے، پھر انہوں نے رومال منگوائے، اترے اور غسل کیا۔ [السنن الكبرى للبيهقي/كتاب صلاة الاستسقاء/حدیث: 6458]

سہل بن سعد رضی اللہ عنہ بیان کرتے ہیں کہ رسول اللہ صلی اللہ علیہ وسلم نے ارشاد فرمایا: ”دو دعائیں ایسی ہیں جو رد نہیں کی جاتیں“ یا آپ صلی اللہ علیہ وسلم نے فرمایا: ”بہت کم ہی رد کی جاتی ہیں: ایک اذان کے وقت اور دوسری لڑائی کے وقت جب ایک دوسرے کو کاٹ رہا ہوتا ہے۔“ نیز سہل بن سعد رضی اللہ عنہ آپ صلی اللہ علیہ وسلم سے یہ بھی بیان کرتے ہیں کہ آپ صلی اللہ علیہ وسلم نے فرمایا: ”اور بارش میں۔“
یہ روایت ابوامامہ رضی اللہ عنہ کے واسطے سے بھی نبی کریم صلی اللہ علیہ وسلم سے مروی ہے، مگر اس کی سند میں عفیر بن معدان ہے۔ [السنن الكبرى للبيهقي/كتاب صلاة الاستسقاء/حدیث: 6459]

ابوامامہ رضی اللہ عنہ کو بیان کرتے ہوئے سنا، وہ نبی کریم صلی اللہ علیہ وسلم سے بیان کرتے ہیں کہ آپ صلی اللہ علیہ وسلم نے فرمایا: ”آسمان کے دروازے کھول دیے جاتے ہیں اور چار مواقع پر دعا قبول کی جاتی ہے: 1۔ (میدان جنگ میں) صفوں کے آمنے سامنے ہونے کے وقت، 2۔ بارش کے نزول کے وقت، 3۔ نماز کی اقامت کے وقت، 4۔ بیت اللہ کی زیارت کے وقت۔“ [السنن الكبرى للبيهقي/كتاب صلاة الاستسقاء/حدیث: 6460]

سیدنا انس بن مالک رضی اللہ عنہ کہتے ہیں کہ جب سخت آندھی چلتی تو آپ صلی اللہ علیہ وسلم کے چہرے سے (اس کی شدت) پہچانی جاتی۔ [السنن الكبرى للبيهقي/كتاب صلاة الاستسقاء/حدیث: 6461]

سیدہ عائشہ رضی اللہ عنہا (آپ صلی اللہ علیہ وسلم کی بیوی) بیان کرتی ہیں کہ میں نے کبھی نہیں دیکھا کہ آپ صلی اللہ علیہ وسلم کھلکھلا کر ہنسے ہوں کہ آپ کی ڈاڑھیں بھی دکھائی دیں، آپ صلی اللہ علیہ وسلم تو صرف مسکرایا کرتے تھے اور وہ کہتی ہیں: جب آپ صلی اللہ علیہ وسلم بادل دیکھتے یا آندھی تو آپ صلی اللہ علیہ وسلم کے چہرے سے محسوس ہو جاتا تو میں نے کہا: اے اللہ کے رسول! جب لوگ بادل دیکھتے ہیں تو خوش ہوتے ہیں اس امید سے کہ اس میں بارش ہوگی، میں آپ کو دیکھتی ہوں کہ جب آپ صلی اللہ علیہ وسلم (بادل) دیکھتے ہیں تو ناپسندیدگی آپ کے چہرے سے عیاں ہوتی ہے؟ تو آپ صلی اللہ علیہ وسلم نے فرمایا: ”مجھے کون سی چیز اس سے بے خوف کر سکتی ہے کہ اس میں عذاب ہو، جبکہ قوموں کو آندھی کے ساتھ عذاب دیا گیا اور ایسے ہی قوم نے عذاب بھی دیکھا“، پھر آپ صلی اللہ علیہ وسلم نے یہ آیت تلاوت کی: ﴿فَلَمَّا رَأَوْهُ عَارِضًا مُسْتَقْبِلَ أَوْدِيَتِهِمْ قَالُوا هَذَا عَارِضٌ مُمْطِرُنَا﴾ [سورة الأحقاف: 24] ”سو جب انھوں نے اسے اپنی وادیوں کی طرف آتے ہوئے دیکھا تو کہنے لگے: یہ آنے والا ہمیں بارش دے گا“۔ [السنن الكبرى للبيهقي/كتاب صلاة الاستسقاء/حدیث: 6462]