سیدہ ام عطیہ انصاریہ رضی اللہ عنہا بیان کرتی ہیں کہ نبی کریم صلی اللہ علیہ وسلم کی ایک بیٹی فوت ہوگئی، سو آپ صلی اللہ علیہ وسلم ہمارے پاس آئے اور فرمایا: ”اسے غسل دینا پانی اور بیری کے ساتھ اور غسل دینا طاق عدد تین یا پانچ مرتبہ یا اس سے بھی زیادہ مرتبہ، اگر تم اس کی ضرورت محسوس کرو اور اس کے آخر میں کافور یا کچھ کافور لگانا اور جب تم فارغ ہو جاؤ تو مجھے بتانا۔“ وہ کہتی ہیں: جب ہم فارغ ہوگئیں تو ہم نے آپ صلی اللہ علیہ وسلم کو اطلاع دی تو آپ صلی اللہ علیہ وسلم نے ہمیں ایک چادر دی اور فرمایا: ”اسے اس کے جسم کے ساتھ لپیٹ دو۔“ ام عطیہ رضی اللہ عنہا کہتی ہیں: ہم نے ان کے سر کی تین مینڈھیاں کیں، پھر ہم نے ان کی پیشانی والی مینڈھی اور دونوں طرف کی مینڈھیاں ان کے پیچھے ڈال دیں۔ [السنن الكبرى للبيهقي/كتاب الجنائز/حدیث: 6632]

ام عطیہ رضی اللہ عنہا کہتی ہیں کہ رسول اللہ صلی اللہ علیہ وسلم کی ایک بیٹی فوت ہوگئی تو آپ صلی اللہ علیہ وسلم نے فرمایا: ”اسے تین یا پانچ مرتبہ غسل دینا یا اس سے زیادہ مرتبہ بھی اگر ضرورت محسوس ہو۔ پانی اور بیری سے غسل دینا اور آخر میں کافور لگانا یا کچھ کافور اور جب تم فارغ ہو جاؤ تو مجھے بتا دینا۔“ سو جب ہم فارغ ہوئیں تو ہم نے آپ صلی اللہ علیہ وسلم کو آگاہ کیا تو آپ صلی اللہ علیہ وسلم نے ہمیں ایک چادر دی۔ آپ صلی اللہ علیہ وسلم نے مزید فرمایا: ”اسے اس کے جسم کے ساتھ لپیٹ دو“ اور یہ بھی فرمایا: ”تین، پانچ یا سات مرتبہ یا اس سے بھی زیادہ اگر ضرورت محسوس ہو۔“ وہ کہتی ہیں اور ہم نے اس کے سر کی تین مینڈھیاں کیں۔ [السنن الكبرى للبيهقي/كتاب الجنائز/حدیث: 6633]

محمد بن سیرین رحمہ اللہ بیان کرتے ہیں کہ انہوں نے غسل کا طریقہ ام عطیہ رضی اللہ عنہا سے لیا، وہ غسل دیتیں بیری کے ساتھ دو مرتبہ اور تیسری مرتبہ پانی اور کافور کے ساتھ، اور عبداللہ بن عمرو رضی اللہ عنہما سے بیان کیا گیا کہ ان کے باپ نے وصیت کی کہ اے میرے بیٹے! جب میں فوت ہو جاؤں تو مجھے ایک مرتبہ پانی سے غسل دینا، عطاء رحمہ اللہ کہتے ہیں کہ مجھ کو ایک مرتبہ غسل دینا کافی ہے، عمر بن عبدالعزیز رحمہ اللہ کہتے ہیں کہ اس میں کوئی چیز مقرر نہیں اور ابراہیم رحمہ اللہ کہتے ہیں کہ جب بیری وغیرہ نہ ہو تو کوئی حرج نہیں اور اصحابِ عبداللہ رضی اللہ عنہ کہتے تھے کہ میت کو ایک ایک مرتبہ غسل دیا جائے اور ایک ہی کفن اور ایک ہی مرتبہ استنجاء کروانا ہے۔ [السنن الكبرى للبيهقي/كتاب الجنائز/حدیث: 6634]

ابراہیم رحمہ اللہ اصحابِ عبداللہ رضی اللہ عنہ سے بیان کرتے ہیں، انہوں نے کہا کہ میت کو طاق عدد میں غسل دیا جائے اور طاق ہی کفن دیا جائے اور طاق ہی دھونی دی جائے۔ [السنن الكبرى للبيهقي/كتاب الجنائز/حدیث: 6635]

سیدنا ابوہریرہ رضی اللہ عنہ سے روایت ہے کہ بنو حارث بن نوفل نے سیدنا خبیب رضی اللہ عنہ کو خریدا اور سیدنا خبیب رضی اللہ عنہ نے حارث بن نوفل کو غزوہ بدر میں قتل کیا تھا، تو سیدنا خبیب رضی اللہ عنہ ان کے پاس قیدی کی حیثیت سے ٹھہرے ہوئے تھے اور انہوں نے ان کے قتل کا پروگرام بنایا تو سیدنا خبیب رضی اللہ عنہ نے حارث کی بیٹی سے عاریۃً (ادھار) استرا طلب کیا تاکہ وہ زیرِ ناف بالوں کی صفائی کر لیں تو اس نے استرا دے دیا اور اس کا ایک چھوٹا بچہ چلتا ہوا اس کے پاس آ گیا اور وہ اس سے بے خبر تھی۔ جب اس نے دیکھا تو بچہ سیدنا خبیب رضی اللہ عنہ کی ران پر بیٹھا ہوا تھا اور استرا سیدنا خبیب رضی اللہ عنہ کے ہاتھ میں تھا تو وہ گھبرا گئی اور انہوں نے اس کی گھبراہٹ کو دیکھا اور کہا: ”تیرا خیال ہے کہ میں اسے قتل کر دوں گا؟ مگر میں ایسا کرنے والا نہیں ہوں۔“
امام بخاری رحمہ اللہ نے اسے موسیٰ بن اسماعیل سے روایت کیا ہے۔ اگر اس نے فوت ہونے تک (بال اور ناخن) نہیں کاٹے تو امام شافعی رحمہ اللہ کہتے ہیں کہ ہمارے بعض احباب نے موت کے بعد بال کاٹنے اور ناخن تراشنے کو درست نہیں جانا اور ان میں سے بعض نے اس میں کوئی حرج نہیں سمجھا۔ شیخ نے بیان کیا کہ حسن رحمہ اللہ اور ابن سیرین رحمہ اللہ کہتے ہیں کہ ناخن یا بال نہیں کاٹے جائیں گے۔ بیان کیا گیا ہے کہ سیدنا سعد بن ابی وقاص رضی اللہ عنہ نے میت کو غسل دیا اور استرا منگوایا اور زیرِ ناف بال مونڈے۔ سیدہ عائشہ رضی اللہ عنہا بیان کرتی ہیں: ”کیا تم میت کی صفائی نہیں کرو گے؟“ یعنی اس کے بال نہیں کاٹو گے، گویا وہ اسے ناپسند کرتی تھیں جبکہ اس کی کنگھی کی جا سکے۔ [السنن الكبرى للبيهقي/كتاب الجنائز/حدیث: 6636]

سیدنا عبداللہ بن عباس رضی اللہ عنہما سے روایت ہے کہ ہم نبی کریم صلی اللہ علیہ وسلم کے ساتھ تھے اور ایک آدمی اپنے اونٹ سے گر پڑا، اس حال میں کہ وہ محرم تھا۔ اس کی گردن مروڑی گئی جس سے وہ فوت ہو گیا، تو رسول اللہ صلی اللہ علیہ وسلم نے فرمایا: ”اسے پانی اور بیری سے غسل دو اور دو کپڑوں میں کفن دے دو اور اس کا سر نہ ڈھانپو، بیشک اللہ تعالیٰ اسے قیامت کے دن اٹھائے گا اور وہ تلبیہ کہتا ہوا اٹھے گا“۔ [السنن الكبرى للبيهقي/كتاب الجنائز/حدیث: 6637]

سعید بن جبیر، سیدنا ابن عباس رضی اللہ عنہما سے بیان کرتے ہیں کہ ایک آدمی احرام کی حالت میں نبی کریم صلی اللہ علیہ وسلم کے ساتھ تھا۔ وہ اونٹ سے گر گیا اور گردن مڑ جانے سے فوت ہو گیا تو رسول اللہ صلی اللہ علیہ وسلم نے فرمایا: ”اسے پانی اور بیری سے غسل دو اور دو کپڑے پہناؤ اور اس کے سر کو نہ ڈھانپنا، بیشک وہ قیامت کے دن تلبیہ کہتا ہوا آئے گا۔“ [السنن الكبرى للبيهقي/كتاب الجنائز/حدیث: 6638]

سیدنا عبداللہ بن عباس رضی اللہ عنہما سے روایت ہے کہ نبی کریم صلی اللہ علیہ وسلم کے پاس ایک شخص کو لایا گیا جسے اس کی سواری نے گرا دیا تھا، وہ فوت ہو گیا اس حال میں کہ وہ محرم تھا۔ آپ صلی اللہ علیہ وسلم نے فرمایا: ”اسے دو کپڑوں میں کفن دو اور اسے غسل دو پانی اور بیری سے اور اس کے سر کو نہ ڈھانپنا۔ بیشک قیامت کے دن اللہ تعالیٰ اسے اٹھائیں گے اور وہ تلبیہ کہتا ہوا آئے گا۔“ [السنن الكبرى للبيهقي/كتاب الجنائز/حدیث: 6639]

وکیع سفیان سے ایسی ہی حدیث بیان کرتے ہیں مگر انہوں نے یہ کہا ہے کہ آپ صلی اللہ علیہ وسلم نے فرمایا: ”اس کے چہرے اور سر کو نہ ڈھانپنا۔ بے شک وہ قیامت کے دن تلبیہ پڑھتے ہوئے اٹھایا جائے گا۔“ [السنن الكبرى للبيهقي/كتاب الجنائز/حدیث: 6640]

سیدنا عبداللہ بن عباس رضی اللہ عنہما سے روایت ہے کہ عرفات میں ایک آدمی نبی کریم صلی اللہ علیہ وسلم کے ساتھ اپنی اونٹنی پر تھا تو اس نے اسے گرا دیا اور وہ فوت ہو گیا۔ رسول اللہ صلی اللہ علیہ وسلم نے فرمایا: ”اسے پانی اور بیری (کے پتوں) سے غسل دو اور دو کپڑوں میں کفن دو“ یا فرمایا: ”اس کے دونوں کپڑوں میں، اسے خوشبو نہ لگانا اور اس کے سر کو نہ ڈھانپنا، بیشک اللہ تعالیٰ اسے قیامت کے دن اٹھائے گا اور وہ تلبیہ کہہ رہا ہو گا۔“ [السنن الكبرى للبيهقي/كتاب الجنائز/حدیث: 6641]