سیدنا عبداللہ رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا: ”اپنے مریضوں کا علاج کرو صدقے کے ساتھ اور اپنے اموال کی حفاظت کرو زکوٰۃ ادا کر کے اور آزمائش کے لیے دعا کرتے رہو۔“
ابو عبداللہ (حاکم) کہتے ہیں: اسے روایت کرنے میں موسیٰ بن عمیر منفرد ہیں۔ شیخ (بیہقی) کہتے ہیں: یہ متن صرف حسن بصری کے واسطے سے نبی کریم صلی اللہ علیہ وسلم سے مرسل روایت کے طور پر معروف ہے۔ [السنن الكبرى للبيهقي/كتاب الجنائز/حدیث: 6593]

سیدہ عائشہ رضی اللہ عنہا سے روایت ہے کہ جب رسول اللہ صلی اللہ علیہ وسلم مدینہ آئے تو سیدنا ابوبکر رضی اللہ عنہ اور سیدنا بلال رضی اللہ عنہ کو بخار نے آ لیا۔ وہ کہتی ہیں: میں ان کے پاس آئی تو میں نے پوچھا: ”ابا جان! آپ اپنے آپ کو کیسا محسوس کرتے ہیں؟“ اور میں نے سیدنا بلال رضی اللہ عنہ سے کہا کہ: ”تم اپنے آپ کو کیسا محسوس کرتے ہو؟“ اور وہ کہتی ہیں: جب سیدنا ابوبکر رضی اللہ عنہ کو بخار ہوتا تو کہتے: ”ہر شخص اپنے اہل میں صبح کرنے والا ہے اور موت اس کے جوتے کے تسمے سے بھی قریب ہے۔“ اور سیدنا بلال رضی اللہ عنہ جب (بخار کی شدت سے) اکتا جاتے تو کہتے: ”کیا میں ایک رات ایسی وادی میں گزاروں گا، جہاں میرے ارد گرد اذخر اور جلیل ہوں گے؟ کیا کبھی ہم مجنہ کے چشموں پر وارد ہوں گے؟ کیا میرے سامنے شامہ و طفیل ظاہر ہوں گے؟“ سیدہ عائشہ رضی اللہ عنہا کہتی ہیں: میں پیارے پیغمبر صلی اللہ علیہ وسلم کے پاس آئی اور خبر دی تو آپ صلی اللہ علیہ وسلم نے فرمایا: ”اے اللہ! ہمارے لیے مدینے کو محبوب بنا دے جیسے ہمیں مکہ محبوب ہے یا اس سے بھی زیادہ اور اس کی آب و ہوا کو درست کر دے اور اس کے صاع و مد میں برکت ڈال دے اور اس کے بخار کو جحفہ منتقل کر دے۔“ [السنن الكبرى للبيهقي/كتاب الجنائز/حدیث: 6594]

سیدنا عبداللہ بن عباس رضی اللہ عنہما سے روایت ہے کہ آپ صلی اللہ علیہ وسلم ایک اعرابی کی عیادت کے لیے گئے اور آپ صلی اللہ علیہ وسلم جب بھی کسی کی عیادت کے لیے جایا کرتے تو کہتے: «لَا بَأْسَ طَهُورٌ إِنْ شَاءَ اللّٰهُ تَعَالٰى» ”کوئی بات نہیں، ان شاء اللہ پاکیزگی حاصل ہو گی“ تو اس نے کہا: آپ کہتے ہیں پاکیزگی؟ بلکہ یہ تو بخار ہے جو بوڑھے شیخ پر جوش مار رہا ہے اور اسے قبروں کی زیارت کروا رہا ہے، تو نبی کریم صلی اللہ علیہ وسلم نے فرمایا: ”پھر ایسا ہی ہے۔“ [السنن الكبرى للبيهقي/كتاب الجنائز/حدیث: 6595]

سابقہ حدیث اس سند سے بھی مروی ہے۔ [السنن الكبرى للبيهقي/كتاب الجنائز/حدیث: 6596]

سیدنا انس رضی اللہ عنہ سے روایت ہے کہ ایک یہودی غلام بیمار ہو گیا تو نبی کریم صلی اللہ علیہ وسلم اس کی تیمار داری کی غرض سے آئے، آپ صلی اللہ علیہ وسلم اس کے سر کے پاس بیٹھ گئے اور اسے اسلام پیش کیا تو اس کے باپ نے کہا: ”ابو القاسم صلی اللہ علیہ وسلم کی اطاعت کر لے۔“ تو وہ اسلام لے آیا، پھر آپ صلی اللہ علیہ وسلم کھڑے ہوئے اس حال میں کہ آپ صلی اللہ علیہ وسلم فرما رہے تھے: «الْحَمْدُ لِلَّهِ الَّذِي أَنْقَذَهُ بِي مِنَ النَّارِ» ”شکر ہے اس اللہ کا جس نے میری وجہ سے اس کو آگ سے بچا لیا۔“ [السنن الكبرى للبيهقي/كتاب الجنائز/حدیث: 6597]

سیدنا ابو سعید خدری رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”اپنے مرنے والوں کو «لَا إِلٰهَ إِلَّا اللّٰهُ» ”اللہ کے سوا کوئی معبود نہیں“ کی تلقین کیا کرو۔“ [السنن الكبرى للبيهقي/كتاب الجنائز/حدیث: 6598]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”اپنے فوت ہونے والوں کو «لَا إِلٰهَ إِلَّا اللّٰهُ» کی تلقین کیا کرو۔“ [السنن الكبرى للبيهقي/كتاب الجنائز/حدیث: 6599]

سیدنا معقل بن یسار رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”اسے اپنے فوت ہونے والوں کے پاس پڑھا کرو یعنی سورۃ یٰسین۔“ [السنن الكبرى للبيهقي/كتاب الجنائز/حدیث: 6600]

سیدہ ام سلمہ رضی اللہ عنہا سے روایت ہے کہ رسول معظم صلی اللہ علیہ وسلم نے فرمایا: ”جب تم میت کے پاس حاضر ہوا کرو تو اچھی بات کہا کرو کیونکہ جو کچھ تم کہتے ہو فرشتے اس پر آمین کہتے ہیں۔“ وہ کہتی ہیں کہ جب ابو سلمہ رضی اللہ عنہ فوت ہوئے تو میں نے کہا: اے اللہ کے رسول صلی اللہ علیہ وسلم ! میں کیا کہوں؟ آپ صلی اللہ علیہ وسلم نے فرمایا: ”تم کہو: «اللَّهُمَّ اغْفِرْ لَهُ، وَأَعْقِبْنَا مِنْهُ عُقْبَى صَالِحَةً» ”اے اللہ! اسے معاف کر دے اور اس کے بعد ہمیں اچھا ساتھ دے۔““ وہ کہتی ہیں کہ پھر اللہ تعالیٰ نے مجھے ان سے بہتر ساتھ رسول اللہ صلی اللہ علیہ وسلم کا دیا۔ [السنن الكبرى للبيهقي/كتاب الجنائز/حدیث: 6601]

حضرت اعمش رحمہ اللہ سے روایت ہے کہ آپ صلی اللہ علیہ وسلم نے فرمایا: ”یہ تم تب کہو جب مریض یا میت کے پاس حاضر ہو۔“ [السنن الكبرى للبيهقي/كتاب الجنائز/حدیث: 6602]