(نبی کریم صلی اللہ علیہ وسلم نے فرمایا:)
”اپنے مریضوں کا علاج صدقہ کے ذریعے کرو۔“ [صحيح الجامع الصغير وزيادته/حرف الدال/حدیث: 3358]

(نبی کریم صلی اللہ علیہ وسلم نے فرمایا:)
”چمڑے کی دباغت ہی اس کا پاک ہونا ہے۔“ [صحيح الجامع الصغير وزيادته/حرف الدال/حدیث: 3359]

(نبی کریم صلی اللہ علیہ وسلم نے فرمایا:)
”مردار (جانوروں) کی کھالوں کی دباغت ہی ان کا پاک ہونا ہے۔“ [صحيح الجامع الصغير وزيادته/حرف الدال/حدیث: 3360]

(نبی کریم صلی اللہ علیہ وسلم نے فرمایا:)
”ہر کھال کی دباغت ہی اس کا پاک ہونا ہے۔“ [صحيح الجامع الصغير وزيادته/حرف الدال/حدیث: 3361]

(نبی کریم صلی اللہ علیہ وسلم نے فرمایا:)
”تمہاری طرف تم سے پہلی امتوں کی بیماری سرایت کر گئی ہے: حسد اور بغض، یہ (بغض) مونڈنے والی چیز ہے، دین کو مونڈنے والی، نہ کہ بال مونڈنے والی۔ اس ذات کی قسم جس کے ہاتھ میں محمد کی جان ہے! تم جنت میں داخل نہیں ہو گے جب تک ایمان نہ لے آؤ، اور تم مومن نہیں بن سکتے جب تک آپس میں محبت نہ کرو۔ کیا میں تمہیں ایسی چیز نہ بتاؤں کہ اگر تم اسے کر لو تو آپس میں محبت کرنے لگو؟ آپس میں سلام کو عام کرو۔“ [صحيح الجامع الصغير وزيادته/حرف الدال/حدیث: 3361M]

(نبی کریم صلی اللہ علیہ وسلم نے فرمایا:)
”دحیہ کلبی، جبریل سے مشابہت رکھتے تھے، عروہ بن مسعود ثقفی، عیسیٰ بن مریم سے مشابہت رکھتے تھے اور عبد العزیٰ، دجال سے مشابہت رکھتا تھا۔“ [صحيح الجامع الصغير وزيادته/حرف الدال/حدیث: 3362]

(نبی کریم صلی اللہ علیہ وسلم نے فرمایا:)
”میں کل رات جنت میں گیا، میں نے اس میں دیکھا تو جعفر فرشتوں کے ساتھ اڑ رہے تھے اور حمزہ ایک تخت پر تکیہ لگائے بیٹھے تھے۔“ [صحيح الجامع الصغير وزيادته/حرف الدال/حدیث: 3363]

(نبی کریم صلی اللہ علیہ وسلم نے فرمایا:)
”میں جنت میں گیا تو وہاں سونے کا ایک محل دیکھا، میں نے پوچھا: یہ محل کس کا ہے؟ کہا گیا: قریش کے ایک نوجوان کا۔ میں نے گمان کیا کہ شاید وہ میں ہی ہوں، تو میں نے پوچھا: وہ کون ہے؟ کہا گیا: عمر بن خطاب۔ (پھر فرمایا: اے عمر!) اگر مجھے تمہاری غیرت کا علم نہ ہوتا تو میں اس میں داخل ہو جاتا۔“ [صحيح الجامع الصغير وزيادته/حرف الدال/حدیث: 3364]

(نبی کریم صلی اللہ علیہ وسلم نے فرمایا:)
”میں جنت میں گیا تو وہاں ایک نہر دیکھی جس کے دونوں کنارے موتیوں کے خیموں پر مشتمل تھے، میں نے اپنا ہاتھ اس میں بہنے والے پانی کی طرف بڑھایا تو وہ خوشبودار کستوری تھا۔ میں نے پوچھا: اے جبریل! یہ کیا ہے؟ انہوں نے کہا: یہ کوثر ہے جو اللہ نے آپ کو عطا فرمایا ہے۔“ [صحيح الجامع الصغير وزيادته/حرف الدال/حدیث: 3365]

(نبی کریم صلی اللہ علیہ وسلم نے فرمایا:)
”میں جنت میں گیا تو ایک نوجوان لڑکی میرے استقبال کے لیے آئی، میں نے پوچھا: تم کس کے لیے ہو؟ اس نے کہا: زید بن حارثہ کے لیے۔“ [صحيح الجامع الصغير وزيادته/حرف الدال/حدیث: 3366]