حضرت ابن عمر رضی اللہ عنہما بیان کرتے ہیں کہ میں سونے کا چاندی کے ساتھ اور چاندی کا سونے کے ساتھ سودا کیا کرتا تھا۔ میں رسول اللہ صلی اللہ علیہ وسلم کی خدمت میں حاضر ہوا اور آپ کو یہ بات بتلائی تو آپ صلی اللہ علیہ وسلم نے فرمایا: ”جب تو اپنے ساتھی سے (اس قسم کا) سودا کرے تو اس سے ایسی حالت میں جدا نہ ہو کہ تیرے اور اس کے درمیان کوئی شبہات والی چیز باقی ہو۔“ [سنن نسائي/كتاب البيوع/حدیث: 4587]

حضرت سعید بن جبیر رحمہ اللہ کے بارے میں مروی ہے کہ وہ دراہم کی جگہ دینار اور دینار کی جگہ دراہم لینا پسند نہیں کرتے تھے۔ [سنن نسائي/كتاب البيوع/حدیث: 4588]

حضرت ابن عمر رضی اللہ عنہما سے منقول ہے کہ وہ دینار کی جگہ درہم اور درہم کی جگہ دینار لینے میں کوئی حرج نہیں سمجھتے تھے۔ [سنن نسائي/كتاب البيوع/حدیث: 4589]

حضرت ابراہیم نخعی رحمہ اللہ درہم کی جگہ دینار لینے میں کوئی حرج نہیں سمجھتے تھے، مگر جب وہ قرض کے ہوں۔ [سنن نسائي/كتاب البيوع/حدیث: 4590]

حضرت سعید بن جبیر رحمہ اللہ سے منقول ہے کہ وہ (دراہم کی جگہ دینار اور دینار کی جگہ دراہم لینے میں کوئی حرج نہیں سمجھتے تھے، اگرچہ وہ قرض کے ہی کیوں نہ ہوں)۔ [سنن نسائي/كتاب البيوع/حدیث: 4591]

حضرت سعید بن جبیر رحمہ اللہ سے اسی قسم کا قول منقول ہے۔ ابو عبدالرحمن (امام نسائی رحمہ اللہ) بیان کرتے ہیں کہ اس جگہ میں نے ایسا ہی پایا ہے۔ [سنن نسائي/كتاب البيوع/حدیث: 4592]