حضرت حذیفہ رضی اللہ عنہ سے روایت ہے، انہوں نے کہا: ایک دفعہ ہم حضرت عمر رضی اللہ عنہ کے پاس بیٹھے ہوئے تھے کہ انہوں نے اچانک دریافت کیا: ”تم میں سے کون ہے جو فتنے کے متعلق نبی صلی اللہ علیہ وسلم کا فرمان یاد رکھتا ہو؟“ حضرت حذیفہ رضی اللہ عنہ نے کہا: ”انسان کی آزمائش اس کی بیوی، اس کے مال، اس کی اولاد اور اس کے پڑوسی کے معاملات میں ہوتی ہے جس کا کفارہ نماز، صدقہ، امر بالمعروف اور نہی عن المنکر کر دیتا ہے۔“ حضرت عمر رضی اللہ عنہ نے فرمایا: ”میں اس کے بارے میں نہیں پوچھتا بلکہ میں اس فتنے کے بارے میں پوچھتا ہوں جو دریا کی طرح ٹھاٹھیں مارے گا۔“ حضرت حذیفہ رضی اللہ عنہ نے کہا: ”امیر المؤمنین! تم پر اس کا کوئی خطرہ نہیں کیونکہ تمہارے اور اس کے درمیان ایک بند دروازہ حائل ہے۔“ حضرت عمر رضی اللہ عنہ نے پوچھا: ”کیا وہ دروازہ توڑ دیا جائے گا یا اسے کھولا جائے گا؟“ حضرت حذیفہ رضی اللہ عنہ نے کہا: ”توڑ دیا جائے گا۔“ حضرت عمر رضی اللہ عنہ نے فرمایا: ”پھر وہ کبھی بند نہیں ہو سکے گا۔“ حضرت حذیفہ رضی اللہ عنہ نے کہا: ”جی ہاں (وہ بند نہیں ہو سکے گا)۔“ ہم نے حضرت حذیفہ رضی اللہ عنہ سے پوچھا: ”کیا حضرت عمر رضی اللہ عنہ دروازے کے متعلق جانتے تھے؟“ حضرت حذیفہ رضی اللہ عنہ نے کہا: ”ہاں، جس طرح وہ جانتے ہیں کہ کل سے پہلے رات آئے گی اور یہ اس لیے کہ میں نے ان سے ایک ایسی بات بیان کی تھی جو پہیلی یا چیستاں نہیں تھی۔“ بہرحال ہمیں ان سے یہ پوچھتے ہوئے ڈر محسوس ہوا کہ وہ دروازہ کون ہے؟ چنانچہ ہم نے مسروق سے کہا، جب انہوں نے پوچھا کہ وہ دروازہ کون ہے؟ تو حضرت حذیفہ رضی اللہ عنہ نے کہا: ”وہ دروازہ خود حضرت عمر رضی اللہ عنہ کی ذات گرامی تھی۔“ [صحيح البخاري/كِتَاب الْفِتَنِ/حدیث: 7096]

حضرت ابوموسیٰ اشعری رضی اللہ عنہ سے روایت ہے، انہوں نے کہا: ”نبی صلی اللہ علیہ وسلم مدینہ طیبہ کے باغات میں سے کسی باغ کی طرف اپنی کسی ضرورت کے لیے تشریف لے گئے۔ میں بھی آپ کے پیچھے پیچھے گیا۔ جب آپ باغ میں داخل ہوئے تو میں اس کے دروازے پر بیٹھ گیا اور میں نے (دل میں) کہا: ”آج میں نبی صلی اللہ علیہ وسلم کا چوکیدار بنوں گا حالانکہ آپ نے مجھے حکم نہیں دیا تھا“، چنانچہ نبی صلی اللہ علیہ وسلم تشریف لے گئے، اپنی حاجت کو پورا کیا پھر واپس آکر کنویں کی منڈیر پر بیٹھ گئے۔ آپ نے اپنی دونوں پنڈلیاں کھول کر انہیں کنویں میں لٹکا لیا۔ اس کے بعد حضرت ابوبکر رضی اللہ عنہ آئے اور اندر جانے کی اجازت طلب کی۔ میں نے ان سے کہا: ”میں آپ کے لیے اجازت لے کر آتا ہوں۔“ چنانچہ وہ کھڑے رہے اور میں نے آنحضرت صلی اللہ علیہ وسلم کی خدمت میں حاضر ہوکر عرض کیا: ”یا نبی اللہ! ابوبکر رضی اللہ عنہ آپ کے پاس آنے کی اجازت چاہتے ہیں۔“ آپ نے فرمایا: ”انہیں اجازت دے دو اور انہیں جنت کی بشارت سنا دو۔“ چنانچہ وہ اندر گئے اور نبی صلی اللہ علیہ وسلم کی دائیں جانب آکر انہوں نے بھی اپنی پنڈلیاں کھول کر انہیں کنویں میں لٹکا لیا۔ اتنے میں حضرت عمر رضی اللہ عنہ آئے۔ میں نے ان سے کہا: ”ٹھہرو، میں آپ کے لیے اجازت لے لوں۔“ نبی صلی اللہ علیہ وسلم نے فرمایا: ”ان کو بھی اجازت دے دو اور جنت کی بشارت دے دو۔“ چنانچہ وہ بھی آئے کنویں کی منڈیر پر نبی صلی اللہ علیہ وسلم کی بائیں جانب بیٹھے اور اپنی پنڈلیاں کھول کر کنویں میں لٹکا دیں۔ اب کنویں کی منڈیر بھر گئی اور وہاں کوئی جگہ باقی نہ رہی۔ پھر حضرت عثمان رضی اللہ عنہ آئے۔ میں نے ان سے بھی کہا: ”آپ ذرا ٹھہریں یہاں تک کہ میں آپ صلی اللہ علیہ وسلم سے آپ کے متعلق اجازت لے لوں۔“ نبی صلی اللہ علیہ وسلم نے فرمایا: ”انہیں بھی اجازت دے دو اور جنت کی بشارت سنا دو، لیکن اس کے ساتھ ایک آزمائش ہوگی جو انہیں پہنچے گی۔“ چنانچہ وہ تشریف لائے اور ان کے ساتھ بیٹھنے کی جگہ نہ پائی تو گھوم کر ان کے سامنے کنویں کے کنارے پر آئے۔ پھر انہوں نے بھی اپنی پنڈلیاں کھول کر پاؤں لٹکا لیے۔ پھر میرے دل میں اپنے بھائی کے متعلق خواہش پیدا ہوئی تو میں اللہ سے ان کے آنے کی دعا کرنے لگا۔ ابن مسیب رحمہ اللہ نے کہا: ”میں نے ان سے ان حضرات کی قبروں کی تاویل کی جو ایک جگہ موجود ہوں گی اور حضرت عثمان رضی اللہ عنہ کی قبر ان سے الگ ہوگی۔“ [صحيح البخاري/كِتَاب الْفِتَنِ/حدیث: 7097]

حضرت ابو وائل رحمہ اللہ سے روایت ہے، انہوں نے کہا کہ حضرت اسامہ رضی اللہ عنہ سے کہا گیا: ”آپ حضرت عثمان رضی اللہ عنہ سے گفتگو کیوں نہیں کرتے؟“ انہوں نے فرمایا: ”میں نے کسی فتنے کا دروازہ کھولے بغیر ان سے گفتگو کی ہے، میں ایسا آدمی نہیں ہوں کہ سب سے پہلے کسی فتنے کا دروازہ کھولنے والا بنوں، اور میں کسی کی اس حد تک خوشامد نہیں کرتا کہ اگر اسے دو آدمیوں پر امیر بنا دیا جائے تو اسے کہوں: تو سب سے بہتر ہے، جبکہ میں نے رسول اللہ صلی اللہ علیہ وسلم سے سنا ہے کہ آپ صلی اللہ علیہ وسلم نے فرمایا: ”قیامت کے دن ایک شخص کو لا کر اسے آگ میں ڈال دیا جائے گا، پھر وہ اس میں گدھے کی طرح چکی پیسے گا یعنی وہ اپنی انتڑیوں کے گرد چکر لگائے گا۔ اہل جہنم اس کے گرد جمع ہو کر پوچھیں گے: اے فلاں! کیا تو «الْأَمْرُ بِالْمَعْرُوفِ وَالنَّهْيِ عَنِ الْمُنْكَرِ» ”نیکی کا حکم دینے اور برائی سے روکنے“ کا کام نہیں کیا کرتا تھا؟ وہ کہے گا: میں اچھی بات کے لیے لوگوں کو ضرور کہتا تھا لیکن اس پر خود عمل نہیں کرتا تھا اور بری بات سے لوگوں کو منع کرتا تھا لیکن خود اس کا مرتکب ہوتا تھا۔“” [صحيح البخاري/كِتَاب الْفِتَنِ/حدیث: 7098]