حضرت عائشہ رضی اللہ عنہا فرماتی ہیں کہ نبی کریم صلی اللہ علیہ وآلہ وسلم جب بیت الخلاء سے باہر تشریف لاتے تو یہ فرماتے: ”اے اللہ! میں تجھ سے بخشش کا سوال کرتا ہوں۔“
[مصنف ابن ابي شيبه/كتاب الطهارة/حدیث: 7]

حضرت ابراہیم تیمی فرماتے ہیں کہ حضرت نوح جب بیت الخلاء سے باہر تشریف لاتے تو یہ دعا پڑھتے: ”تمام تعریفیں اس اللہ کے لیے ہیں جس نے مجھ سے تکلیف دہ چیز کو دور کر دیا اور مجھے عافیت عطا فرمائی۔“
[مصنف ابن ابي شيبه/كتاب الطهارة/حدیث: 8]

حضرت عوام فرماتے ہیں کہ حضرت نوح فرمایا کرتے تھے: ”تمام تعریفیں اس اللہ کے لیے ہیں جس نے مجھے کھانے کی لذت عطا کی، اس کے مفید حصے کو مجھ میں باقی چھوڑا اور اس کے نقصان دہ جزو کو مجھ سے دور کر دیا۔“
[مصنف ابن ابي شيبه/كتاب الطهارة/حدیث: 9]

حضرت ابوعلی فرماتے ہیں کہ حضرت ابوذر غفاری رضی اللہ عنہ جب بیت الخلاء سے باہر تشریف لاتے تو یہ دعا پڑھتے: ”تمام تعریفیں اس اللہ کے لیے ہیں جس نے مجھ سے تکلیف دہ چیز کو دور کر دیا اور مجھے عافیت عطا فرمائی۔“ [مصنف ابن ابي شيبه/كتاب الطهارة/حدیث: 10]

حضرت ضحاک فرماتے ہیں کہ حضرت حذیفہ رضی اللہ عنہ جب بیت الخلاء سے باہر تشریف لاتے تو یہ دعا پڑھتے: ”تمام تعریفیں اس اللہ کے لیے ہیں جس نے مجھ سے تکلیف دہ چیز کو دور کر دیا اور مجھے عافیت عطا فرمائی۔“ [مصنف ابن ابي شيبه/كتاب الطهارة/حدیث: 11]

حضرت طاؤس روایت کرتے ہیں کہ نبی کریم صلی اللہ علیہ وآلہ وسلم نے ارشاد فرمایا: جب تم میں سے کوئی بیت الخلاء میں داخل ہونے لگے تو یہ کہے: ”تمام تعریفیں اس اللہ کے لئے ہیں جس نے مجھ سے تکلیف دہ چیز کو دور کر دیا اور مفید چیز کو مجھ میں باقی رکھا۔“ [مصنف ابن ابي شيبه/كتاب الطهارة/حدیث: 12]

حضرت منہال بن عمرو فرماتے ہیں کہ حضرت ابو الدرداء رضی اللہ عنہ جب بیت الخلاء سے باہر تشریف لاتے تو یہ دعا پڑھتے: ”تمام تعریفیں اس اللہ کے لئے ہیں جس نے مجھ سے تکلیف دہ چیز کو دور کر دیا اور مجھے عافیت عطا فرمائی۔“ [مصنف ابن ابي شيبه/كتاب الطهارة/حدیث: 13]