حضرت موسیٰ بن ایوب کے چچا کہتے ہیں کہ میں نے حضرت علی رضی اللہ عنہ سے سوال کیا کہ اگر کسی آدمی کے پاس دو مملوک بہنیں ہوں تو کیا وہ ان دونوں سے جماع کرسکتا ہے؟ انہوں نے فرمایا کہ نہیں ایسا کرنا درست نہیں۔ ا لبتہ ایک کو اپنی ملکیت سے نکال کر ایسا کرسکتا ہے۔ میں نے سوال کیا کہ اگر ان میں سے ایک کی اپنے غلام سے شادی کرا دے تو پھر کرسکتا ہے؟ انہوں نے فرمایا کہ نہیں جب تک ایک کو اپنی ملکیت سے نکال نہ دے۔ [مصنف ابن ابي شيبه/كتاب النكاح/حدیث: 17032]

حضرت ابن کو اء نے حضرت علی رضی اللہ عنہ سے سوال کیا کہ کیا آدمی دو بہنوں کو جمع کرسکتا ہے۔؟ انہوں نے فرمایا کہ ایک آیت نے اسے حلال اور دوسری نے حرام کیا ہے۔ البتہ میں اور میرے اہل ایسا نہ کریں گے۔ [مصنف ابن ابي شيبه/كتاب النكاح/حدیث: 17033]

حضرت ابن سیرین فرماتے ہیں کہ لوگوں نے دو مملوک بہنوں کے مسئلے میں حضرت ابن مسعود رضی اللہ عنہ کو غصہ دلایا تو وہ غصے میں آگئے اور فرمایا کہ تم میں سے کسی کا اونٹ بھی تو اس کی ملکیت میں ہوتا ہے۔ [مصنف ابن ابي شيبه/كتاب النكاح/حدیث: 17034]

حضرت مکحول سے سوال کیا گیا کہ اگر کسی شخص کی ملکیت میں دو بہنیں ہوں، ایک سے جماع کیا ہو تو کیا دوسری سے جماع کرسکتا ہے؟ انہوں نے فرمایا کہ نہیں جب تک صحبت شدہ کو اپنی ملکیت سے نہ نکال دے اس وقت تک جائز نہیں۔ [مصنف ابن ابي شيبه/كتاب النكاح/حدیث: 17035]

حضرت عمار فرماتے ہیں کہ اللہ تعالیٰ نے جو کچھ آزاد عورتوں میں حرام کیا ہے وہ باندیوں میں بھی حرام کیا ہے۔ البتہ آدمی باندیوں کو جتنا چاہے رکھ سکتا ہے۔ (ان کی تعداد مقرر نہیں) [مصنف ابن ابي شيبه/كتاب النكاح/حدیث: 17036]

حضرت عثمان بن عفان رضی اللہ عنہ سے سوال کیا گیا کہ کیا دو مملوک بہنوں سے جماع کیا جاسکتا ہے؟ انہوں نے فرمایا کہ کتاب اللہ کی ایک آیت نے اسے حلال اور دوسری نے حرام کیا ہے۔ البتہ میں تو ایسا کرنا پسند نہیں کرتا۔ [مصنف ابن ابي شيبه/كتاب النكاح/حدیث: 17037]

حضرت ابن عمر رضی اللہ عنہما سے سوال کیا گیا کہ کیا دو مملوک بہنوں سے جماع کیا جاسکتا ہے؟ انہوں نے فرمایا کہ جب تک جماع شدہ باندی اس کی ملک میں ہے اس کی بہن سے جماع نہیں کرسکتا۔ [مصنف ابن ابي شيبه/كتاب النكاح/حدیث: 17038]

حضرت عبد العزیز بن رفیع کہتے ہیں کہ میں نے حضرت ابن حنفیہ سے سوال کیا کہ اگر کسی آدمی کی ملکیت میں دو بہنیں ہوں تو کیا وہ ان دونوں سے جماع کرسکتا ہے؟ انہوں نے فرمایا کہ ایک آیت نے انہیں حلال اور دوسری نے حرام قرار دیا ہے۔ [مصنف ابن ابي شيبه/كتاب النكاح/حدیث: 17039]

(حضرت عبد العزیز بن رفیع کہتے ہیں کہ) پھر میں حضرت سعید بن مسیب کے پاس آیا تو انہوں نے بھی محمد بن حنفیہ والی بات کہی۔ [مصنف ابن ابي شيبه/كتاب النكاح/حدیث: 17040]

(حضرت عبد العزیز بن رفیع کہتے ہیں کہ) پھر میں نے حضرت ابن منبہ سے سوال کیا تو انہوں نے فرمایا کہ میں گواہی دیتا ہوں کہ اللہ تعالیٰ نے حضرت موسیٰ علیہ السلام پر جو کچھ نازل فرمایا اس میں ہے کہ دو بہنوں کو جمع کرنے والا ملعون ہے۔ انہوں نے فرمایا کہ اس میں ہمارے لئے یہ تفصیل نہیں تھی کہ دونوں آزاد ہوں یا باندیاں۔ [مصنف ابن ابي شيبه/كتاب النكاح/حدیث: 17041]