حضرت عطاء بن سائب فرماتے ہیں کہ ایک مرتبہ ایک عورت اپنے خاوند کے ایک درہم کے ساتویں حصے کی قیمت کے بقدر حصے کی مالک بن گئی۔ اس بارے میں حضرت میسرہ سے سوال کیا گیا تو انہوں نے فرمایا کہ وہ عورت اپنے خاوند کے لئے حرام ہوگئی۔ اور میں نہیں جانتا کہ وہ اس کے لئے کیسے حلال ہوگی؟ [مصنف ابن ابي شيبه/كتاب النكاح/حدیث: 17278]

(حضرت عطاء بن سائب فرماتے ہیں کہ) میں حضرت شعبی سے ملا اور ان سے سوال کیا تو انہوں نے فرمایا کہ ابوبکر بن ابی موسیٰ سے ملو اور ان سے سوال کرو۔ وہ ان دنوں قاضی تھے۔ میں ان کے پاس آیا اور ان سے سوال کیا تو انہوں نے فرمایا کہ جب تم کسی چیز کی طاقت نہ رکھو تو اسے چھوڑ کر وہ کام کرو جس کی تم طاقت رکھتے ہو۔ [مصنف ابن ابي شيبه/كتاب النكاح/حدیث: 17279]

(حضرت عطاء بن سائب فرماتے ہیں کہ) میں حضرت شعبی کے پاس آیا اور ان سے یہ بات ذکر کی تو وہ ہنس پڑے اور فرمایا کہ تم عبید اللہ بن عبد اللہ بن عتبہ کے پاس جاؤ۔ میں ان کے پاس گیا اور ان سے سوال کیا تو انہوں نے فرمایا کہ وہ عورت اپنے خاوند کے لئے حرام ہوگئی۔ میں نے پوچھا کہ وہ اس کے لئے کیسے حلال ہوگی؟ انہوں نے فرمایا کہ وہ اسے ہبہ کردے، یا آزاد کردے یا بیچ دے۔ میں واپس حضرت شعبی کے پاس گیا اور ان سے سوال کیا تو انہوں نے فرمایا کہ ان کے پاس واپس جاؤ اور ان سے پوچھو کہ کیا وہ عورت اس سے عدت گزارے گی؟ میں ان کے پاس آیا تو انہوں نے فرمایا کہ نہیں، یہ تو اسی کا پانی ہے۔ [مصنف ابن ابي شيبه/كتاب النكاح/حدیث: 17280]

(حضرت عطاء بن سائب) فرماتے ہیں کہ میں حضرت شعبی کے پاس واپس آیا اور انہیں اطلاع دی تو انہوں نے فرمایا کہ انہوں نے صحیح فتویٰ دیا ہے۔ [مصنف ابن ابي شيبه/كتاب النكاح/حدیث: 17281]

(حضرت عطاء بن سائب فرماتے ہیں کہ) میں ابن معقل کے پاس آیا اور ان سے سوال کیا۔ راوی عبدالسلام فرماتے ہیں کہ ان کا قول مجھے یاد نہیں رہا۔ [مصنف ابن ابي شيبه/كتاب النكاح/حدیث: 17282]

(راوی عبدالسلام فرماتے ہیں کہ) عمار بن رزیق نے عطاء بن سائب کی روایت سے ابن معقل کا قول نقل کیا ہے کہ وہ دونوں نکاح کا اعادہ کریں گے۔ [مصنف ابن ابي شيبه/كتاب النكاح/حدیث: 17283]

حضرت عطاء بن سائب فرماتے ہیں کہ میں نے حضرت میسرہ سے اس عورت کے بارے میں سوال کیا جو اپنے غلام خاوند کے کسی حصے کی وارث بن جائے تو انہوں نے فرمایا کہ وہ عورت اپنے خاوند کے لئے حرام ہوجائے گی۔ [مصنف ابن ابي شيبه/كتاب النكاح/حدیث: 17284]

حضرت ابراہیم اس عورت کے بارے میں جو اپنے غلام خاوند کے کسی حصہ کی مالک بن جائے فرماتے ہیں کہ اگر اس عورت نے مالک بنتے ہی فورا اپنے خاوند کو آزاد نہ کیا تو وہ اس پر حرام ہوجائے گی۔ [مصنف ابن ابي شيبه/كتاب النكاح/حدیث: 17285]

حضرت عبید اللہ بن عبد اللہ بن عتبہ سے بھی یونہی منقول ہے۔ [مصنف ابن ابي شيبه/كتاب النكاح/حدیث: 17286]

حضرت عطاء فرماتے ہیں کہ وہ عورت اپنے خاوند پر حرام ہوجائے گی۔ [مصنف ابن ابي شيبه/كتاب النكاح/حدیث: 17287]