حضرت عبد الرحمن بن افلح فرماتے ہیں کہ مجھے حضرت زید بن ثابت رضی اللہ عنہ کی ام ولد باندی نے بھی بتایا کہ وہ ان سے عزل کیا کرتے تھے۔ [مصنف ابن ابي شيبه/كتاب النكاح/حدیث: 17408]

حضرت سالم، حضرت عائشہ بنت سعد رحمہا اللہ کے حوالے سے بیان کرتے ہیں کہ حضرت سعد رضی اللہ عنہ اپنی ام ولد باندیوں سے عزل کیا کرتے تھے۔ [مصنف ابن ابي شيبه/كتاب النكاح/حدیث: 17409]

حضرت سعید بن مسیب فرماتے ہیں کہ انصار صحابہ عزل کرنے میں کوئی برائی نہ سمجھتے تھے۔ [مصنف ابن ابي شيبه/كتاب النكاح/حدیث: 17410]

حضرت سعید بن مسیب فرماتے ہیں کہ اس کے قائلین میں حضرت زید، حضرت ابو ایوب اور حضرت ابی رضی اللہ عنہم بھی تھے۔ [مصنف ابن ابي شيبه/كتاب النكاح/حدیث: 17411]

حضرت ابراہیم فرماتے ہیں کہ حضرت علقمہ اور حضرت عبد اللہ رضی اللہ عنہ کے شاگرد عزل کیا کرتے تھے۔ [مصنف ابن ابي شيبه/كتاب النكاح/حدیث: 17412]

حضرت جعفر فرماتے ہیں کہ حضرت علی بن حسین رحمہ اللہ عزل کرتے تھے اور اس آیت کو دلیل کے طور پر پیش فرماتے { وَإِذْ أَخَذَ رَبُّک مِنْ بَنِی آدَمَ مِنْ ظُہُورِہِمْ ذُرِّیَّاتِہِمْ }۔ [مصنف ابن ابي شيبه/كتاب النكاح/حدیث: 17413]

حضرت ابو عمران فرماتے ہیں کہ میں نے ایک خاتون کو یہ کہتے سنا کہ حضرت حسن بن علی رضی اللہ عنہ مجھ سے عزل کیا کرتے تھے۔ [مصنف ابن ابي شيبه/كتاب النكاح/حدیث: 17414]

حضرت سعید عزل میں کوئی حرج نہ سمجھتے تھے اور فرماتے کہ وہ تمہاری کھیتی ہے چاہو تو پیاسا رکھو اور چاہو توسیراب کرو۔ [مصنف ابن ابي شيبه/كتاب النكاح/حدیث: 17415]

حضرت مسعود بن علی کہتے ہیں کہ میں نے حضرت عکرمہ سے سوال کیا کہ کیا میں اپنی باندی سے عزل کرسکتا ہوں؟ انہوں نے فرمایا کہ وہ تمہاری کھیتی ہے چاہو تو پیاسا رکھو اور چاہو توسیراب کرو۔ [مصنف ابن ابي شيبه/كتاب النكاح/حدیث: 17416]

حضرت زبرقان سراج فرماتے ہیں کہ میں نے ابن معقل سے عزل کے بارے میں سوال کیا تو انہوں نے فرمایا کہ یہ عمل تو مجھ سے اور تجھ سے بہتر یعنی حضرت سعد نے بھی کیا ہے۔ [مصنف ابن ابي شيبه/كتاب النكاح/حدیث: 17417]