حضرت ابو بکر اور حضرت عمر رضی اللہ عنہ ما عزل کو مکروہ قرار دیتے تھے اور لوگوں کو اس کے بعد غسل کرنے کا حکم دیتے تھے۔ [مصنف ابن ابي شيبه/كتاب النكاح/حدیث: 17424]

حضرت سعید بن مسیب فرماتے ہیں کہ کچھ مہاجرین حضرات عزل کو مکروہ قرار دیتے تھے ان میں دوسروں کے ساتھ حضرت عثمان بن عفان رضی اللہ عنہ بھی تھے۔ [مصنف ابن ابي شيبه/كتاب النكاح/حدیث: 17425]

حضرت علی رضی اللہ عنہ فرماتے ہیں کہ عزل خفیہ طور پر زندہ درگور کرنا ہے۔ [مصنف ابن ابي شيبه/كتاب النكاح/حدیث: 17426]

حضرت میمون بن مہران کہتے ہیں کہ حضرت ابن عمر رضی اللہ عنہما نے اپنے بیٹے کے لئے ایک باندی خریدی۔ کچھ عرصہ بعد فرمایا کہ یہ حاملہ کیوں نہیں ہوتی! شاید تم اس سے عزل کرتے ہو؟ اگر مجھے پتہ چلا تو میں تمہیں ماروں گا۔ [مصنف ابن ابي شيبه/كتاب النكاح/حدیث: 17427]

حضرت ابو امامہ عزل کے بارے میں فرماتے ہیں کہ میں کسی مسلمان سے اس کی توقع نہیں رکھتا۔ [مصنف ابن ابي شيبه/كتاب النكاح/حدیث: 17428]

حضرت سالم فرماتے ہیں کہ عزل خفیہ طور پر زندہ درگور کرنا ہے۔ [مصنف ابن ابي شيبه/كتاب النكاح/حدیث: 17429]

حضرت اسود عزل کو مکروہ قرار دیتے تھے۔ [مصنف ابن ابي شيبه/كتاب النكاح/حدیث: 17430]

حضرت جریر رضی اللہ عنہ فرماتے ہیں کہ ایک مرتبہ ایک آدمی حضور صلی اللہ علیہ وسلم کی خدمت میں حاضر ہوا اور اس نے عرض کیا کہ یا رسول اللہ! میں مشرکین سے صرف ایک باندی ہی بچا کے لاسکا ہوں اور میں اس سے عزل کرتا ہوں، کیونکہ میں اسے بازار میں بیچنا چاہتا ہوں۔ حضور صلی اللہ علیہ وسلم نے فرمایا کہ اس کے پاس وہی آیا جو اس کے لیے مقدر تھا۔ [مصنف ابن ابي شيبه/كتاب النكاح/حدیث: 17431]

حضرت ابو سعید خدری رضی اللہ عنہ فرماتے ہیں کہ بنو مصطلق کی عورتیں قیدی بن کر ہمارے ہاتھ لگیں۔ ہم ان سے جماع کرتے تھے اور عزل کرتے تھے۔ پھر ایک دن میں ایک باندی کے ساتھ بنو قینقاع کے بازار میں تھا کہ ایک یہودی میرے پاس سے گذرا اور بولا اے ابو سعید یہ باندی کیسی! میں نے کہا میری باندی ہے اور میں اسے بیچنا چاہتا ہوں۔ اس نے پوچھا کہ کیا تم نے اس سے جماع کیا ہے؟ میں نے کہا ہاں۔ اس نے کہا کہ تم اسے بیچنا چاہتے ہو حالانکہ ہوسکتا ہے کہ اس کے پیٹ میں تمہارا نطفہ موجود ہو۔ میں نے کہا کہ میں اس سے عز ل کیا کرتا تھا۔ اس نے کہا کہ یہ چھوٹا زندہ درگور کرنا ہے۔ میں حضور صلی اللہ علیہ وسلم کی خدمت میں حاضر ہوا اور سار ا واقعہ عرض کیا تو آپ نے فرمایا کہ یہود نے جھوٹ بولا یہود نے جھوٹ بولا۔ [مصنف ابن ابي شيبه/كتاب النكاح/حدیث: 17432]

حضرت عبد اللہ بن محیریز کہتے ہیں کہ میں اور حضرت ابو صرمہ مازنی حاضر ہوئے تو ہم نے حضرت ابو سعید خدری کو وہی بات بیان کرتے سنا جو ابو سلمہ اور ابو امامہ بیان کررہے تھے۔ کہ نبی پاک صلی اللہ علیہ وسلم نے فرمایا کہ یہود نے جھوٹ بولا اور اس حدیث کے آخر میں یہ ہے کہ اگر تم ایسا نہ کرو تو تم پر کوئی حرج نہیں کیونکہ اللہ تعالیٰ نے قیامت تک پیدا ہونے والوں کی تقدیر کا فیصلہ کردیا ہے۔ [مصنف ابن ابي شيبه/كتاب النكاح/حدیث: 17433]