حضرت ابن عباس رضی اللہ عنہما فرماتے ہیں کہ حضور صلی اللہ علیہ وسلم سے فرمائش کی گئی کہ آپ حضرت حمزہ بن عبد المطلب رضی اللہ عنہ کی صاحبزادی سے نکاح کرلیں۔ آپ نے فرمایا کہ وہ میری رضاعی بھتیجی ہیں اور جو رشتے نسب سے حرام ہوتے ہیں رضاعت سے بھی حرام ہوجاتے ہیں۔ [مصنف ابن ابي شيبه/كتاب النكاح/حدیث: 17915]

حضرت علی رضی اللہ عنہ فرماتے ہیں کہ میں نے عرض کیا یارسول اللہ! کیا وجہ ہے کہ آپ قریش میں شادی کی رغبت رکھتے ہیں اور ہمیں چھوڑ دیتے ہیں؟ آپ صلی اللہ علیہ وسلم نے فرمایا کیا تمہارے پاس کوئی ایسی خاتون ہیں؟ میں نے کہا جی ہاں، حضرت حمزہ رضی اللہ عنہ کی بیٹی ہیں۔ رسول اللہ صلی اللہ علیہ وسلم نے فرمایا کہ وہ میرے لئے حلال نہیں، کیونکہ وہ میری رضاعی بھتیجی ہیں۔ [مصنف ابن ابي شيبه/كتاب النكاح/حدیث: 17916]

حضرت عائشہ رضی اللہ عنہا فرماتی ہیں کہ ایک مرتبہ میرے پاس میرے رضاعی چچا افلح بن ابی القعیس آئے۔ اس وقت پردے کے احکام نازل ہوچکے تھے انہوں نے اندر آنے کی اجازت مانگی تو میں نے انہیں منع کردیا۔ پھر رسول اللہ صلی اللہ علیہ وسلم تشریف لائے اور فرمایا کہ وہ تمہارے چچا ہیں، تم انہیں ملاقات کی اجازت دے دو۔ حضرت عائشہ رضی اللہ عنہا نے عرض کیا کہ مجھے عورت نے دودھ پلایا ہے، مرد نے دودھ نہیں پلایا۔ حضور صلی اللہ علیہ وسلم نے فرمایا تم نے عجیب بات کہی ہے۔ [مصنف ابن ابي شيبه/كتاب النكاح/حدیث: 17917]

حضرت ام سلمہ رضی اللہ عنہا کہتی ہیں کہ حضرت ام حبیبہ رضی اللہ عنہا نے حضور صلی اللہ علیہ وسلم سے عرض کیا کہ اے اللہ کے رسول! کیا آپ میری بہن یعنی ابو سفیان کی بیٹی سے نکاح کرنا پسند کریں گے؟ حضور صلی اللہ علیہ وسلم نے فرمایا کہ وہ میرے لئے حلال نہیں۔ حضرت ام حبیبہ نے عرض کیا کہ مجھے معلوم ہوا ہے کہ آپ نے درہ بنت ابی سلمہ کے لئے نکاح کا پیغام دیا ہے۔ حضور صلی اللہ علیہ وسلم نے استفسار فرمایا کہ ام سلمہ کی بیٹی؟ انہوں نے کہا جی ہاں۔ حضور صلی اللہ علیہ وسلم نے فرمایا کہ خدا کی قسم! اگر وہ میری پرورش میں نہ بھی ہوتی تو میرے لئے حلال نہیں تھی، کیونکہ وہ میری رضاعی بھتیجی ہے۔ مجھے اور اس کے والد کو ثویبہ نے دودھ پلایا ہے۔ مجھے اپنی بہنوں اور بیٹیوں سے نکاح کی دعوت نہ دو۔ [مصنف ابن ابي شيبه/كتاب النكاح/حدیث: 17918]

حضرت عائشہ رضی اللہ عنہا کا مذہب یہ تھا کہ جو رشتے نسب سے حرام ہوتے ہیں رضاعت سے بھی حرام ہوجاتے ہیں۔ [مصنف ابن ابي شيبه/كتاب النكاح/حدیث: 17919]

حضرت علی رضی اللہ عنہ فرماتے ہیں کہ اس عورت سے شادی نہ کرو جسے تمہارے بھائی کی بیوی نے دودھ پلایا ہو، نہ اس سے جسے تمہارے باپ کی بیوی نے دودھ پلایا ہو اور نہ اس سے جسے تمہارے بیٹے کی بیوی نے دودھ پلایا ہو۔ [مصنف ابن ابي شيبه/كتاب النكاح/حدیث: 17920]

حضرت ابن عباس رضی اللہ عنہما فرماتے ہیں کہ جو رشتے نسب سے حرام ہوتے ہیں رضاعت سے بھی حرام ہوجاتے ہیں۔ [مصنف ابن ابي شيبه/كتاب النكاح/حدیث: 17921]

حضرت ابراہیم فرماتے ہیں کہ جو رشتے نسب سے حرام ہوتے ہیں رضاعت سے بھی حرام ہوجاتے ہیں۔ [مصنف ابن ابي شيبه/كتاب النكاح/حدیث: 17922]

حضرت عبد اللہ رضی اللہ عنہ فرماتے ہیں کہ جو رشتے نسب سے حرام ہوتے ہیں رضاعت سے بھی حرام ہوجاتے ہیں۔ [مصنف ابن ابي شيبه/كتاب النكاح/حدیث: 17923]

حضرت عائشہ رضی اللہ عنہا سے روایت ہے کہ حضور صلی اللہ علیہ وسلم نے فرمایا کہ جو رشتے نسب سے حرام ہوتے ہیں رضاعت سے بھی حرام ہوجاتے ہیں۔ [مصنف ابن ابي شيبه/كتاب النكاح/حدیث: 17924]