حسن رحمہ اللہ فرماتے ہیں ایک آدمی نے دوسرے کی شادی کے موقع پر اسے دعا دی: بِالرِّفَائِ والبَنِیْنَ (خوش رہو اور اولاد پاؤ) رسول اللہ صلی اللہ علیہ وسلم نے یہ سنا تو فرمایا کہ یوں نہ کہو بلکہ یہ کہو: بَارَکَ اللّٰہُ فِیْکَ وَبَارَکَ عَلَیْکَ (اللہ تعالیٰ تمہیں برکت عطا فرمائے اور تم پر برکت نازل فرمائے)۔ [مصنف ابن ابي شيبه/كتاب النكاح/حدیث: 18099]

حسن رحمہ اللہ فرماتے ہیں کہ حضرت عقیل بن ابی طالب رضی اللہ عنہ نے بنو جشم کی ایک عورت سے شادی کی پھر لوگوں کی دعوت کی تو لوگوں نے انہیں بِالرِّفَائِ والبَنِیْنَ کہہ کر دعا دی۔ انہوں نے فرمایا کہ یوں نہ کہو۔ لوگوں نے پوچھا کہ اے ابو یزید! پھر ہم کیا کہیں؟ تو انہوں نے فرمایا کہ تم کہو: بَارَکَ اللّٰہُ لَکُمْ وَبَارَکَ عَلَیْکُمْ (اللہ تعالیٰ تمہیں برکت عطا فرمائے اور تم پر برکت نازل فرمائے) کیونکہ ہم یہی کہا کرتے تھے یا ہمیں یہی کہنے کا حکم دیا جاتا تھا۔ [مصنف ابن ابي شيبه/كتاب النكاح/حدیث: 18100]