حضرت ابراہیم رحمہ اللہ فرماتے تھے کہ بچوں کی گواہی بعض کی بعض کے خلاف جائز ہے۔ [مصنف ابن ابي شيبه/كتاب البيوع والأقضية/حدیث: 22320]

حضرت شریح رحمہ اللہ بعض بچوں کی گواہی ایک دوسرے پر صحیح سمجھتے تھے۔ [مصنف ابن ابي شيبه/كتاب البيوع والأقضية/حدیث: 22321]

حضرت عروہ رحمہ اللہ فرماتے تھے کہ بچوں کی گواہی جائز ہے، اور ان کی پہلی بات لی جائے گی۔ [مصنف ابن ابي شيبه/كتاب البيوع والأقضية/حدیث: 22322]

حضرت ابن عباس رضی اللہ عنہما بچوں کی گواہی کے متعلق فرماتے ہیں کہ اللہ تعالیٰ کا ارشاد ہے کہ { مِمَّنْ تَرْضَوْنَ مِنَ الشُّہَدَائِ } جبکہ بچے مِمَّنْ تَرْضَوْنَ میں نہیں آتے۔ [مصنف ابن ابي شيبه/كتاب البيوع والأقضية/حدیث: 22323]

حضرت ابن زبیر رضی اللہ عنہ فرماتے ہیں کہ جب ان سے اس چیز کے متعلق سوال کیا جائے جو انہوں نے دیکھی ہو تو وہ اس کے زیادہ لائق ہیں کہ گواہی دیں۔ [مصنف ابن ابي شيبه/كتاب البيوع والأقضية/حدیث: 22324]

حضرت ابن ابی ملیکہ رحمہ اللہ فرماتے ہیں کہ میں نے قاضیوں کو نہیں دیکھا کہ وہ حضرت ابن زبیر رضی اللہ عنہ کے قول کے علاوہ کسی کا قول لیتے ہوں۔ [مصنف ابن ابي شيبه/كتاب البيوع والأقضية/حدیث: 22325]

حضرت حسن رحمہ اللہ فرماتے ہیں کہ بچوں کی گواہی بڑوں کے خلاف جائز نہیں اور بچوں کی گواہی بچوں کے خلاف جائز ہے جب ان کو ایک دوسرے سے الگ کر دیا جائے۔ [مصنف ابن ابي شيبه/كتاب البيوع والأقضية/حدیث: 22326]

حضرت شریح رحمہ اللہ بچوں کی گواہی دانت اور موضحہ زخم میں جائز سمجھتے تھے اور اس کے علاوہ ان کی گواہی قبول نہیں کرتے تھے۔ [مصنف ابن ابي شيبه/كتاب البيوع والأقضية/حدیث: 22327]

حضرت مکحول رحمہ اللہ فرماتے ہیں کہ جب بچے کی عمر پندرہ برس ہوجائے، تو اس کی گواہی معتبر (جائز) ہے۔ [مصنف ابن ابي شيبه/كتاب البيوع والأقضية/حدیث: 22328]

حضرت داؤد بن حصین رحمہ اللہ سے مروی ہے کہ مدینہ منورہ کے قاضیوں میں سے ایک قاضی کے پاس، جس کا نام سلمہ بن عبد الرحمن المخزومی تھا، ایک بچے نے گواہی دی۔ انہوں نے حضرت سالم رحمہ اللہ اور حضرت قاسم رحمہ اللہ کی طرف پیغام بھیج کر ان سے اس کی گواہی کے متعلق دریافت کیا؟ ان دونوں حضرات نے فرمایا کہ اگر اس کے زیر ناف کچھ بال آ چکے ہیں تو اس کی گواہی معتبر ہے۔ [مصنف ابن ابي شيبه/كتاب البيوع والأقضية/حدیث: 22329]