پھر حضرت عبداللہ نے فرمایا کہ پھر یاجوج ماجوج نکلیں گے وہ زمین میں اتراتے پھریں گے اور زمین میں فساد پھلائیں گے پھر حضرت عبداللہ نے پڑھا { وَہُمْ مِنْ کُلِّ حَدَبٍ یَنْسِلُونَ } اور وہ ہر اونچی جگہ سے بھاگتے ہوئے آئیں گے حضرت عبداللہ نے فرمایا اللہ تعالیٰ ان پر ایک کیڑابھیجیں گے اونٹ کے ناک میں پیدا ہونے والے کیڑے کی طرح وہ ان کے کانوں اور ان کے نتھنوں میں داخل ہوجائے گا وہ اس سے مرجائیں گے ارشاد فرمایا کہ ان سے زمین متعفن ہوجائے گی اللہ تعالیٰ سے فریاد کی جائے گی پس اللہ تعالیٰ ان پر بارش اتاریں گے جو زمین کو ان سے پاک کر دے گی پھر ارشاد فرمایا اللہ تعالیٰ سخت ٹھنڈی ہوا چھوڑیں گے پس وہ زمین پر کوئی مومن نہیں چھوڑے گی مگر اسے یہ ہوا الٹ پلٹ کر دے گی ارشاد فرمایا پھر شریر لوگوں پر قیامت قائم ہوگی۔ ارشاد فرمایا پھر زمین و آسمان کے درمیان فرشتہ صور لے کر کھڑا ہوگا اور اس صور میں پھونکے گا راوی نے کہا کہ صور سینگ ہے ارشاد فرمایا کہ آسمانوں اور زمینوں میں اللہ کی مخلوق نہیں باقی رہے گی مگر وہ مرجائے گی مگر جس کے بارے میں اللہ چاہے فرمایا کہ پھر دونوں نفخوں کے درمیان اتنا وقت ہوگا جتنا کہ وقت ہونا اللہ چاہیں گے (راوی نے فرمایا) کہ اللہ تعالیٰ عرش کے نیچے سے پانی پھینکیں گے مردوں کی منی کی طرح ارشاد فرمایا کہ آدمی کی اولاد مں ی سے کوئی مخلوق نہیں بچے گی مگر اس سے (پانی سے) کچھ اسے پہنچے گا پس ان کے جسم اور ان کا گوشت اس پانی سے دوبارہ حیات یافتہ ہوگا جیسا کہ زمین نم مٹی سے سبزہ اگاتی ہے۔ پھر حضرت عبداللہ نے یہ آیت تلاوت کی ترجمہ اور اللہ وہ ذات ہے جو ہواؤں کو بھیجتی ہے وہ ہوائیں بادلوں کو اٹھاتی ہیں پس ہم اس کو ہانکتے ہیں مردہ شہر کی طرف پس ہم اس سے زمین کو زندہ کرتے ہیں اس کے مرے پیچھے اس طرح دوبارہ زندہ کیا جائے گا پھر ارشاد فرمایا پھر زمین و آسمان کے درمیان فرشتہ صور لے کر کھڑا ہوگا اس کو پھونکے گا پھر ہر روح اپنے جسم کی طرف چلے گی اور اس میں داخل ہوجائے گی فرمایا پھر کھڑے ہوں گے اور رب العالمین کے سامنے کھڑے ہو کر ایک آدمی کی طرح سلام کریں گے۔ پھر اللہ تعالیٰ مخلوق کے لیے ایک صورت میں ظاہر ہوں گے اور ان لوگوں کو ملیں گے پس مخلوق میں سے جو کوئی اللہ کے علاوہ کسی اور چیز کی عبادت کرتا ہوگا ان میں سے کوئی بھی نہیں رہے گا مگر وہ چیز اس کے لیے بلند کی جائے گی وہ اس کے پیچھے چلے گا پس یہود سے ملیں گے اور کہیں گے تم کن کی عبادت کرتے ہو وہ کہیں گے ہم عزیر کی عبادت کرتے ہیں پس اللہ تعالیٰ فرمائیں گے کیا تمہیں پانی پسند ہے وہ کہیں گے جی ہاں (ارشاد فرمایا) اللہ تعالیٰ ان کو جہنم دکھائیں گے اور وہ سراب کی طرح ہوگی (سراب سے مراد ریت جو دھوپ میں پانی دکھائی دیتی ہے) پھر حضرت عبداللہ نے آیت تلاوت کی ترجمہ اور ہم اس دن کفار کے سامنے جہنم کو لائیں گے۔ پھر نصاریٰ سے ملیں گے اور پوچھیں گے تم کس کی عبادت کرتے ہو وہ کہیں گے حضرت مسیح (عیسیٰ) کی فرمایا کہ اللہ تعالیٰ فرمائیں گے کہ کیا تمہیں پانی پسند ہے وہ کہیں گے جی ہاں اللہ تعالیٰ انہیں جہنم دکھائیں گے اور وہ سراب (وہ چمکیلی ریت جو دھوپ کی روشنی سے پانی دکھائی دے) ہوگی۔ پھر فرمایا کہ پھر تمام وہ لوگ جو اللہ تعالیٰ کے علاوہ کسی اور کی عبادت کیا کرتے تھے ان کے ساتھ یہی معاملہ ہوگا۔ پھر حضرت عبداللہ نے آیت پڑھی ترجمہ:۔ ان کو ٹھہراؤ کیونکہ ان سے پوچھا جائے گا یہاں تک کہ مسلمانوں کی جماعت سامنے آئے گی اللہ تعالیٰ پوچھیں گے کہ تم کس کی عبادت کرتے ہو؟ وہ کہیں گے کہ ہم اللہ تعالیٰ کی عبادت کرتے ہیں اور اس کے ساتھ کسی کو شریک نہیں ٹھہراتے؟ راوی کہتے ہیں کہ اللہ تعالیٰ فرمائیں گے کہ کیا تم اپنے رب کو پہچانتے ہو؟ وہ کہیں گے وہ پاک ہے جب وہ ہمارے سامنے اپنی پہچان کرائے گا تو ہم اسے پہچان لیں گے ارشاد فرمایا اس وقت پنڈلی کھولی جائے گی پس کوئی باقی نہیں رہے گا مگر وہ اللہ کے لیے سجدے میں گر پڑے گا اور منافق باقی رہ جائیں گے ان کی پیٹھیں ایک ہی تختہ ہوں گی گویا ان میں سیخیں ہیں ارشاد فرمایا وہ کہیں گے تمہیں سجدے کی طرف بلایا جاتا تھا جبکہ تم صحیح سالم تھے اور اللہ تعالیٰ پل صراط کا حکم دیں گے تو اسے جہنم پر رکھ دیا جائے گا ارشاد فرمایا پس لوگ اپنے اعمال کے مطابق گروہ در گروہ گزریں گے ان میں سے پہلے بجلی کی چمک کی طرح پھر ہوا کے گزرنے کی طرح پھر پرندے کے گزرنے کی طرح پھر تیز ترین چوپایوں کی طرح پھر اسی طرح یہاں تک کہ آدمی دوڑتا ہوا گزرے گا اور یہاں تک کہ آدمی چلتا ہوا گزرے گا اور یہاں تک کہ ان میں آخری ایک آدمی ہوگا جو اپنے پیٹ کے بل گھسٹ رہا ہوگا وہ کہے گا تو نے مجھے دیر کرا دی وہ کہے گا میں نے دیر نہیں کرائی تجھے تو تیرے عمل نے دیر کرائی ہے۔ ارشاد فرمایا پھر اللہ تعالیٰ شفاعت کی اجازت دیں گے پس قیامت کے دن سب سے پہلے شفاعت کرنے والے روح القدس جبریل ہوں گے پھر رحمان کے خلیل ابراہیم پھر موسیٰ یا عیسیٰ (میں نہیں جانتا موسیٰ یا عیسیٰ) پھر تمہارے نبی صلی اللہ علیہ وسلم چوتھے نمبر پر کھڑے ہوں گے جس معاملے میں وہ شفاعت کریں گے اس میں ان کے بعد کوئی شفاعت نہیں کرے گا اور یہی وہ مقام محمود ہے جس کا اللہ نے ذکر فرمایا { عَسَى أَنْ يَبْعَثَكَ رَبُّكَ مَقَامًا مَحْمُودًا } قریب ہے کہ تمہارا رب تمہیں مقام محمود پر فائز کرے۔ پس کوئی جان نہیں ہوگی مگر وہ جہنم میں ایک گھر یا جنت میں ایک گھر کو دیکھے گی اور یہی حسرت کا دن ہے جہنم والے اس گھر کو دیکھیں گے جو جنت میں ہے تو ان سے کہا جائے گا اگر تم عمل کرتے پس انہیں حسرت پکڑ لے گی اور جنت والے اس گھر کو دیکھیں گے جو جہنم میں ہے تو وہ کہیں گے { لَوْلَا أَنْ مَنَّ اللَّهُ عَلَيْنَا لَخَسَفَ بِنَا } اگر اللہ ہم پر احسان نہ کرتا تو ہمیں بھی دھنسا دیتا۔ ارشاد فرمایا پھر فرشتے انبیاء شہداء صالحین اور مومنین شفاعت کریں گے اور اللہ تعالیٰ ان کی شفاعت قبول فرمائیں گے ارشاد فرمایا پھر اللہ تعالیٰ فرمائیں گے میں سب رحم کرنے والوں سے زیادہ رحم کرنے والا ہوں ارشاد فرمایا پس اللہ تعالیٰ اپنی رحمت سے جہنم سے اس سے زیادہ نکالیں گے جتنے ساری مخلوق نے نکالے یہاں تک کہ اس میں کسی ایسے شخص کو نہیں چھوڑیں گے جس میں کوئی بھلائی ہو۔ پھر حضرت عبداللہ نے پڑھا { مَا سَلَكَكُمْ فِي سَقَرَ } تمہیں جہنم میں کس چیز نے ڈالا راوی نے کہا اور وہ گرہ لگانے لگے یہاں تک کہ چار شمار کیے { قَالُوا لَمْ نَكُ مِنَ الْمُصَلِّينَ وَلَمْ نَكُ نُطْعِمُ الْمِسْكِينَ وَكُنَّا نَخُوضُ مَعَ الْخَائِضِينَ وَكُنَّا نُكَذِّبُ بِيَوْمِ الدِّينِ حَتَّى أَتَانَا الْيَقِينُ فَمَا تَنْفَعُهُمْ شَفَاعَةُ الشَّافِعِينَ } وہ کہیں گے ہم نماز پڑھنے والوں میں سے نہ تھے اور ہم مسکین کو کھانا نہیں کھلاتے تھے اور ہم بے ہودہ باتوں میں پڑنے والوں کے ساتھ پڑے رہتے تھے اور ہم جزا کے دن کو جھٹلاتے تھے یہاں تک کہ ہمیں یقینی چیز (موت) آ پہنچی پس انہیں سفارش کرنے والوں کی سفارش نفع نہیں دے گی۔ پھر حضرت عبداللہ نے فرمایا کیا تم ان میں کوئی بھلائی دیکھتے ہو؟ اس میں کسی ایسے شخص کو نہیں چھوڑا جائے گا جس میں کوئی بھلائی ہو پھر جب اللہ تعالیٰ ارادہ فرمائیں گے کہ اس میں سے کسی کو نہ نکالیں تو ان کے چہرے اور رنگ بدل دیں گے پس مومنوں میں سے ایک آدمی آئے گا اور کہے گا اے میرے رب تو اللہ تعالیٰ فرمائیں گے جو کسی کو پہچانتا ہو وہ اسے نکال لے ارشاد فرمایا پس وہ آئے گا اور دیکھے گا لیکن کسی کو نہیں پہچانے گا ارشاد فرمایا پھر وہ آدمی اسے پکارے گا اے فلاں میں فلاں ہوں وہ کہے گا میں تجھے نہیں پہچانتا ارشاد فرمایا اس وقت وہ کہیں گے { رَبَّنَا أَخْرِجْنَا مِنْهَا فَإِنْ عُدْنَا فَإِنَّا ظَالِمُونَ } اے ہمارے رب ہمیں اس سے نکال دے پھر اگر ہم دوبارہ ایسا کریں تو بے شک ہم ظالم ہوں گے ارشاد فرمایا پھر اللہ تعالیٰ اس وقت فرمائیں گے { اخْسَئُوا فِيهَا وَلَا تُكَلِّمُونِ } اسی میں دھتکارے ہوئے پڑے رہو اور مجھ سے بات نہ کرو ارشاد فرمایا جب اللہ تعالیٰ یہ فرما دیں گے تو جہنم ان پر بند کر دی جائے گی پس ان میں سے کوئی انسان نہیں نکلے گا۔ [مصنف ابن ابي شيبه/كتاب الفتن/حدیث: 40431]

حضرت ابو سعید خدری سے روایت ہے کہ رسول اللہ صلی اللہ علیہ وآلہ وسلم نے ارشاد فرمایا کہ میری امت میں مہدی ہوں گے ان کی عمر لمبی ہو یا ان کی عمر چھوٹی ہو وہ زمین پر سات سال یا آٹھ سال یا نوسال حکومت کریں گے پس وہ زمین کو عدل اور انصاف سے بھر دیں گے جیسا کہ اسے ظلم سے بھر دیا گیا تھا اور پھر آسمان سے بارش اترے گی اور زمین اپنی برکت نکالے گی آپ صلی اللہ علیہ وآلہ وسلم نے فرمایا کہ میری امت ان کے زمانے میں ایسی زندگی گزارے گی جو اس سے پہلے اس نے نہ گزاری ہوگی۔ [مصنف ابن ابي شيبه/كتاب الفتن/حدیث: 40432]

حضرت ابو سعید سے روایت ہے فرمایا کہ رسول اللہ صلی اللہ علیہ وآلہ وسلم نے ارشاد فرمایا میرے اہل بیت میں سے ایک آدمی اخیر زمانے میں فتنوں کے ظاہر ہونے کے وقت نکلے گا۔ ان کی عطا ہاتھ بھر کر ہوگی۔ [مصنف ابن ابي شيبه/كتاب الفتن/حدیث: 40433]

حضرت ابو سعید سے روایت ہے کہ رسول اللہ صلی اللہ علیہ وآلہ وسلم نے ارشاد فرمایا کہ اخیر زمانے میں ایسے خلیفہ نکلیں گے جو حق بغیر شمار کے عطا کریں گے۔ [مصنف ابن ابي شيبه/كتاب الفتن/حدیث: 40434]

حضرت ابن عباس رضی اللہ عنہما سے روایت ہے انہوں نے فرمایا کہ دن اور راتیں نہیں گزریں گی یہاں تک کہ ہم اہل بیت سے ایک جوان والی بنیں گے جن کو فتنے اشتباہ میں نہ ڈالیں گے اور نہ وہ فتنوں کو مشتبہ کریں گے راوی نے فرمایا کہ ہم نے عرض کیا اے ابو العباس کیا تمہارے بوڑھے ان سے (ملنے سے) عاجز ہوجائیں گے اور تمہارے جوان ان کو پالیں گے انہوں نے فرمایا وہ اللہ کا امر ہے جسے چاہے عطا کرے۔ [مصنف ابن ابي شيبه/كتاب الفتن/حدیث: 40435]

حضرت عبداللہ بن عباس سے روایت ہے انہوں نے فرمایا ہم میں سے تین آدمی ہوں گے ہم میں سے سفاح ہوگا اور ہم میں سے منصور ہوگا اور ہم میں سے مہدی ہوگا۔ [مصنف ابن ابي شيبه/كتاب الفتن/حدیث: 40436]

حضرت عبداللہ بن عمرو سے روایت ہے کہ انہوں نے فرمایا کہ اے کوفہ والو تم مہدی کی وجہ سے لوگوں میں سب سے زیادہ خوش بخت ہو۔ [مصنف ابن ابي شيبه/كتاب الفتن/حدیث: 40437]

حضرت علی رضی اللہ عنہ سے روایت ہے انہوں نے نبی صلی اللہ علیہ وآلہ وسلم سے نقل کیا ہے کہ انہوں نے ارشاد فرمایا کہ مہدی ہم میں سے یعنی اہل بیت میں سے ہوں گے ایک رات میں (امارت و خلافت کے لیے) اللہ تعالیٰ ان کو صلاحیت دیں گے۔ [مصنف ابن ابي شيبه/كتاب الفتن/حدیث: 40438]

حضرت علی رضی اللہ عنہ سے اس اوپر والی روایت کی مثل منقول ہے اور حضرت علی رضی اللہ عنہ نے (اس کو) مرفوعاً نقل نہیں کیا۔ [مصنف ابن ابي شيبه/كتاب الفتن/حدیث: 40439]

حضرت مجاہد سے روایت ہے انہوں نے فرمایا کہ مہدی وہ عیسیٰ ابن مریم ہیں (فائدہ: اس روایت میں عیسیٰ کو مہدی قرار دیا گیا اس سے وہ مہدی ہیں جن کا نام محمد بن عبداللہ ہے ان کی نفی لازم نہیں آتی کیونکہ حضرت عیسیٰ ہدایت یافتہ لوگوں اور عصمت و علو منزلت والے انبیائ کی جماعت میں سے ہیں لہذا مہدی ہونا لغوی معنیٰ کے اعتبار سے ہے۔ ورنہ حضرت عیسیٰ اور مہدی کا دو الگ الگ شخصیتیں ہونا روز روشن کی طرح بیشمار احادیث صحیحہ اور متواترہ سے ثابت ہے)۔ [مصنف ابن ابي شيبه/كتاب الفتن/حدیث: 40440]