سیدنا عبداللہ رضی اللہ عنہ بیان کرتے ہیں: ایک دفعہ ایک دیہاتی آیا، اس نے مسجد میں پیشاب کر دیا، تو نبی کریم صلی اللہ علیہ وسلم نے اس جگہ کے بارے میں یہ حکم دیا کہ اسے کھود دیا جائے، اور پھر اس پر پانی کا ایک ڈول بہا دیا جائے۔ اس دیہاتی نے عرض کی: ”یا رسول اللہ! ایک شخص کچھ لوگوں سے محبت کرتا ہے، حالانکہ وہ ان کے عمل کی طرح عمل نہیں کرتا۔“ تو نبی کریم صلی اللہ علیہ وسلم نے یہ بات ارشاد فرمائی: ”وہ جس کے ساتھ محبت کرتا ہے اس کے ساتھ ہو گا۔“ اس روایت کا ایک راوی سمعان مجہول ہے۔ [سنن الدارقطني/كِتَابُ الطَّهَارَةِ/حدیث: 477]

سیدنا عبداللہ بیان کرتے ہیں: ایک مرتبہ دیہاتی نبی کریم صلی اللہ علیہ وسلم کی خدمت میں حاضر ہوا، وہ بڑی عمر کا آدمی تھا، اس نے عرض کیا: ”اے محمد! قیامت کب آئے گی؟“ نبی کریم صلی اللہ علیہ وسلم نے ارشاد فرمایا: ”تم نے اس کے لیے کیا تیاری کی ہے؟“ اس نے جواب دیا: ”اس ذات کی قسم! جس نے آپ کو حق کے ہمراہ مبعوث کیا ہے، میں نے اس کے لیے کوئی زیادہ نمازیں اور روزے تیار نہیں کیے ہیں، البتہ میں اللہ اور اس کے رسول سے محبت کرتا ہوں۔“ تو نبی کریم صلی اللہ علیہ وسلم نے ارشاد فرمایا: ”تم اس کے ساتھ ہوگے جس کے ساتھ تم محبت رکھتے ہو۔“ راوی بیان کرتے ہیں: پھر وہ بڑی عمر کا آدمی گیا اور اس نے مسجد میں پیشاب کرنا چاہا، کچھ لوگ اس کے پاس سے گزرے اور اسے روک دیا، تو نبی کریم صلی اللہ علیہ وسلم نے ارشاد فرمایا: ”اسے کرنے دو! ہو سکتا ہے، یہ جنتی ہو۔“ پھر ان لوگوں نے اس کے پیشاب پر پانی بہا دیا۔ [سنن الدارقطني/كِتَابُ الطَّهَارَةِ/حدیث: 478]

سیدنا عبداللہ بن معقل رضی اللہ عنہ بیان کرتے ہیں: ایک مرتبہ ایک دیہاتی مسجد کے کنارے پر کھڑا ہوا، اس نے اپنا تہبند ہٹایا اور وہاں پیشاب کر دیا، تو نبی کریم صلی اللہ علیہ وسلم نے ارشاد فرمایا: ”جس جگہ اس نے پیشاب کیا ہے، وہاں سے مٹی نکال کر پھینک دو اور اس جگہ پر پانی بہا دو۔“ اس روایت کے راوی عبداللہ بن معقل تابعی ہیں اور یہ روایت ”مرسل“ ہے۔ [سنن الدارقطني/كِتَابُ الطَّهَارَةِ/حدیث: 479]