سیدنا ابوایوب انصاری رضی اللہ عنہ، نبی کریم صلی اللہ علیہ وسلم کا یہ فرمان نقل کرتے ہیں: ”وتر حق ہے اور واجب ہے، جو شخص تین وتر ادا کرنا چاہے، وہ تین ادا کر لے، جو شخص ایک ادا کرنا چاہے، تو وہ ایک رکعت وتر ادا کر لے۔“ امام دارقطنی رحمہ اللہ بیان کرتے ہیں: اس روایت کا لفظ ’واجب‘ محفوظ نہیں ہے اور مجھے ایسے کسی شخص کا علم نہیں ہے، جس نے اس حوالے سے ابن حسان کی مطابعت کی ہو۔ [سنن الدارقطني/ كِتَابُ الْوِتْرِ/حدیث: 1640]

سیدنا ابوایوب انصاری رضی اللہ عنہ بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی: ”وتر حق ہے، جو شخص چاہے وہ پانچ رکعت ادا کرے، جو شخص چاہے وہ تین وتر ادا کر لے اور جو شخص چاہے وہ ایک رکعت وتر ادا کر لے۔“ [سنن الدارقطني/ كِتَابُ الْوِتْرِ/حدیث: 1641]

سیدنا ابوایوب انصاری رضی اللہ عنہ بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی: ”وتر پانچ ہوتے ہیں، تین ہوتے ہیں یا ایک ہوتے ہیں۔“ [سنن الدارقطني/ كِتَابُ الْوِتْرِ/حدیث: 1642]

سیدنا ابوایوب انصاری رضی اللہ عنہ بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی: ”وتر حق ہے، جو شخص چاہے وہ صبح سات رکعت ادا کرے، جو چاہے وہ پانچ رکعت ادا کرے، جو شخص چاہے وہ تین وتر ادا کرے اور جو شخص چاہے وہ ایک وتر ادا کرے۔“ [سنن الدارقطني/ كِتَابُ الْوِتْرِ/حدیث: 1643]

سیدنا ابوایوب انصاری رضی اللہ عنہ بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی: ”تم پانچ رکعت وتر ادا کرو، اگر اس کی استطاعت نہیں رکھتے، تو تین ادا کرو اور اگر اس کی بھی استطاعت نہیں رکھتے، تو ایک ادا کرو، اگر تم چاہو، تو اشارے کے ساتھ پڑھ لو۔“ [سنن الدارقطني/ كِتَابُ الْوِتْرِ/حدیث: 1644]

یہی روایت ایک اور سند کے ہمراہ بھی منقول ہے۔ [سنن الدارقطني/ كِتَابُ الْوِتْرِ/حدیث: 1645]

سیدنا ابوایوب انصاری رضی اللہ عنہ بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی: ”وتر حق ہے، جو شخص چاہے وہ پانچ وتر ادا کرے، جو شخص چاہے وہ تین رکعت ادا کرے اور جو شخص چاہے وہ ایک رکعت وتر ادا کرے اور جو شخص صرف اشارہ کرنے کی استطاعت رکھتا ہو، وہ اشارہ کرے۔“ ایک سند کے حوالے سے یہ روایت مستند کے طور پر منقول ہے، جبکہ دیگر اسناد کے حوالے سے موقوف ہے۔ [سنن الدارقطني/ كِتَابُ الْوِتْرِ/حدیث: 1646]

یہی روایت ایک اور سند کے ہمراہ بھی منقول ہے۔ [سنن الدارقطني/ كِتَابُ الْوِتْرِ/حدیث: 1647]

سیدنا ابوامامہ رضی اللہ عنہ بیان کرتے ہیں: میں نے عرض کی: ”یا رسول اللہ! میں کتنے وتر ادا کروں؟“ نبی کریم صلی اللہ علیہ وسلم نے ارشاد فرمایا: ”ایک،“ میں نے عرض کی: ”یا نبی اللہ! میں اس سے زیادہ کی طاقت رکھتا ہوں،“ تو نبی کریم صلی اللہ علیہ وسلم نے فرمایا: ”پھر تین،“ پھر انہوں نے فرمایا: ”پانچ،“ پھر فرمایا: ”سات،“ سیدنا ابوامامہ رضی اللہ عنہ بیان کرتے ہیں: کاش! اس وقت میں نے نبی صلی اللہ علیہ وسلم کی عطا کردہ رخصت کو اختیار کر لیا ہوتا۔ [سنن الدارقطني/ كِتَابُ الْوِتْرِ/حدیث: 1648]

سیدہ عائشہ رضی اللہ عنہا بیان کرتی ہیں: نبی کریم صلی اللہ علیہ وسلم جن دو رکعت کے بعد کی رکعت کو وتر بناتے تھے، ان دو رکعت میں ”سورۃ الاعلیٰ“ اور ”سورۃ الکافرون“ پڑھتے تھے، جبکہ وتر والی رکعت میں ”سورۃ الاخلاص“، ”سورۃ الفلق“ اور ”سورۃ الناس“ پڑھتے تھے۔ [سنن الدارقطني/ كِتَابُ الْوِتْرِ/حدیث: 1649]