سیدنا عبداللہ بن عمر رضی اللہ عنہما بیان کرتے ہیں: ایام تشریق کی تکبیر قربانی کے دن ظہر کے بعد شروع ہو گی اور ایام تشریق کے آخری دن صبح کی نماز میں اسے آخری مرتبہ پڑھا جائے گا۔ [سنن الدارقطني/ كِتَابُ الْعِيدَيْنِ/حدیث: 1739]

دو مختلف اسناد سے گزشتہ حدیث ہی مروی ہے۔ [سنن الدارقطني/ كِتَابُ الْعِيدَيْنِ/حدیث: 1740]

عبدالملک بن عبدالعزیز بن عبداللہ بن ابی فروہ (ابومروان) نے بیان کیا، انہوں نے اسحاق بن عبداللہ بن ابی فروہ سے روایت کی، انہوں نے ابوسلمہ الحضرمی سے، انہوں نے ابوسعید خدری رضی اللہ عنہ سے روایت کی، صرف سند کا بیان ہے۔ [سنن الدارقطني/ كِتَابُ الْعِيدَيْنِ/حدیث: 1741]

نافع، سیدنا عبداللہ بن عمر رضی اللہ عنہما کے حوالے میں یہ بات نقل کرتے ہیں: لوگ (یعنی صحابہ کرام) قربانی کے دن ظہر کی نماز کے بعد تکبیر کہنا شروع کرتے تھے اور ایام تشریق کے آخری دن ظہر کی نماز تک تکبیر کہا کرتے تھے، یہ لوگ صبح کی نماز میں تکبیر کہتے تھے اور ظہر کی نماز میں نہیں کہتے تھے۔ [سنن الدارقطني/ كِتَابُ الْعِيدَيْنِ/حدیث: 1742]

عبداللہ نامی راوی اپنے والد کے حوالے سے یہ بات نقل کرتے ہیں: جب سیدنا عثمان غنی رضی اللہ عنہ محصور تھے، تو انہوں نے ہمارے سامنے قربانی کے دن ظہر کی نماز سے تکبیر کہنا شروع کیا اور ایام تشریق کے آخری دن ظہر کی نماز ادا کرنے تک انہوں نے تکبیر کہی، (ایام تشریق کے آخری دن) انہوں نے صبح کی نماز میں تکبیر کہی تھی، ظہر کی نماز میں نہیں کہی۔ [سنن الدارقطني/ كِتَابُ الْعِيدَيْنِ/حدیث: 1743]

عبداللہ نامی راوی سیدنا عمر اور سیدنا عثمان غنی رضی اللہ عنہم کے بارے میں یہ بات نقل کرتے ہیں: یہ دونوں حضرات واپسی کے دن دادی محصب میں ظہر کی نماز ادا کرتے تھے اور اس کے بعد تکبیر نہیں کہتے تھے۔ [سنن الدارقطني/ كِتَابُ الْعِيدَيْنِ/حدیث: 1744]

سیدنا جابر بن عبداللہ رضی اللہ عنہما کے بارے میں یہ بات منقول ہے: وہ ایام تشریق میں تمام نمازوں کے بعد تکبیر کہا کرتے تھے۔ وہ تین مرتبہ اللہ اکبر پڑھا کرتے تھے۔ [سنن الدارقطني/ كِتَابُ الْعِيدَيْنِ/حدیث: 1745]

یہی روایت ایک اور سند کے ہمراہ سیدنا عبداللہ بن عباس رضی اللہ عنہما سے منقول ہے۔ [سنن الدارقطني/ كِتَابُ الْعِيدَيْنِ/حدیث: 1746]