نافع بیان کرتے ہیں: سیدنا عبداللہ بن عمر رضی اللہ عنہما کے پاس ایک یتیم کا مال موجود تھا، وہ اس میں سے قرض کے طور پر کچھ لے لیتے تھے، بعض اوقات وہ اس کے ضامن بن جاتے تھے، اور جب وہ یتیم کے مال کے سرپرست بنتے تھے، تو اس کی زکوٰۃ بھی ادا کیا کرتے تھے۔ [سنن الدارقطني/ كِتَابُ زَكَاةِ/حدیث: 1976]

عبید بن عمیر بیان کرتے ہیں: سیدنا عمر بن خطاب رضی اللہ عنہ نے یہ بات ارشاد فرمائی ہے: ”یتیموں کے اموال کا خیال رکھو، انہیں زکوٰۃ ختم نہ کر دے۔“ [سنن الدارقطني/ كِتَابُ زَكَاةِ/حدیث: 1977]

نافع بیان کرتے ہیں: سیدنا عبداللہ بن عمر رضی اللہ عنہما یتیم کے مال کی زکوٰۃ ادا کیا کرتے تھے، وہ اس میں سے فرض طور پر کچھ لیتے تھے اور اسے مضاربت کے طور پر آگے دے دیتے تھے۔ [سنن الدارقطني/ كِتَابُ زَكَاةِ/حدیث: 1978]

مجاہد، سیدنا عبداللہ بن عمر رضی اللہ عنہما کے حوالے سے یہ بات نقل کرتے ہیں: نبی کریم صلی اللہ علیہ وسلم نے اپنے غلام سیدنا ابورافع رضی اللہ عنہ کو کچھ زمین عطا کی، وہ اس کا خیال نہیں رکھ سکے، ان کا انتقال ہو گیا، سیدنا عمر بن خطاب رضی اللہ عنہ نے اس زمین کو لاکھ اسی ہزار دینار کے عوض میں فروخت کر دیا، انہوں نے سیدنا علی بن ابوطالب رضی اللہ عنہ کو اس رقم کا نگران مقرر کیا، علی رضی اللہ عنہ ہر سال اس کی زکوٰۃ ادا کرتے رہے، یہاں تک کہ جب سیدنا ابورافع رضی اللہ عنہ کے بچے بڑے ہو گئے، تو انہیں وہ مال کم لگا، سیدنا علی رضی اللہ عنہ نے دریافت کیا: ”کیا تم لوگوں نے زکوٰۃ کا حساب لگایا ہے؟“ انہوں نے جواب دیا: ”ہاں!“ سیدنا علی رضی اللہ عنہ نے فرمایا: ”اس کی زکوٰۃ کا حساب لگاؤ۔“ جب انہوں نے اس کا حساب لگایا، تو اسے پورا پایا۔ [سنن الدارقطني/ كِتَابُ زَكَاةِ/حدیث: 1979]

عبدالرحمن بن ابولیلیٰ بیان کرتے ہیں: سیدنا علی رضی اللہ عنہ نے سیدنا ابورافع رضی اللہ عنہ کی اولاد کے مال کی زکوٰۃ ادا کی تھی، راوی بیان کرتے ہیں: جب سیدنا علی رضی اللہ عنہ نے وہ مال ان لوگوں کے سپرد کیا، تو ان لوگوں نے اس مال کو کم پایا، ان لوگوں نے کہا: ”ہمیں یہ مال کم لگا ہے۔“ سیدنا علی رضی اللہ عنہ نے فرمایا: ”کیا تم لوگ یہ سمجھتے ہو کہ میرے پاس کوئی مال ہو گا اور میں اس کی زکوٰۃ ادا نہ کروں گا۔“ [سنن الدارقطني/ كِتَابُ زَكَاةِ/حدیث: 1980]

سیدنا عبداللہ بن عباس رضی اللہ عنہما فرماتے ہیں: ”نابالغ کے مال پر زکوٰۃ لازم نہیں ہوتی، اس وقت زکوٰۃ لازم ہوتی ہے جب اس پر نماز پڑھنا بھی لازم ہو جائے (یعنی جب وہ بالغ ہو جائے)۔“ اس روایت کے راوی ابن لہیعہ کو مستند قرار نہیں دیا گیا۔ [سنن الدارقطني/ كِتَابُ زَكَاةِ/حدیث: 1981]

عمرو بن شعیب اپنے والد کے حوالے سے، اپنے دادا کا یہ بیان نقل کرتے ہیں: یمن سے تعلق رکھنے والی ایک خاتون اپنی صاحبزادی کے ساتھ نبی کریم صلی اللہ علیہ وسلم کی خدمت میں حاضر ہوئی، اس کے ہاتھ میں سونے سے بنے ہوئے دو کنگن تھے، نبی کریم صلی اللہ علیہ وسلم نے دریافت کیا: ”کیا تم نے اس کی زکوٰۃ ادا کی ہے؟“ اس نے عرض کی: ”نہیں!“ نبی کریم صلی اللہ علیہ وسلم نے فرمایا: ”کیا تم یہ بات پسند کرو گی کہ اللہ تعالیٰ تمہیں آگ کے دو کنگن پہنائے؟“ راوی بیان کرتے ہیں: اس نے ان دونوں کو اتار دیا اور عرض کی: ”یا رسول اللہ! یہ اللہ اور اس کے رسول کی نذر ہیں۔“ [سنن الدارقطني/ كِتَابُ زَكَاةِ/حدیث: 1982]