سیدنا عبداللہ بن عمر رضی اللہ عنہما بیان کرتے ہیں: ہم نے سیدنا عمر رضی اللہ عنہ کی تحریر میں یہ بات پائی ہے: نبی کریم صلی اللہ علیہ وسلم نے اونٹوں کی زکوٰۃ کے بارے میں یہ فرمایا ہے: ”پانچ اونٹوں میں ایک بکری کی ادائیگی لازم ہو گی، دس اونٹوں میں دو بکریوں کی ادائیگی لازم ہو گی، پندرہ میں تین بکریوں کی ادائیگی لازم ہو گی، بیس میں چار کی ادائیگی لازم ہو گی، پچیس بکریوں کی ادائیگی لازم ہو گی، پھر جب وہ زیادہ ہو جائیں، تو ان میں بنت مخاض کی ادائیگی لازم ہو گی، اگر وہ نہ ملے، تو ایک ابن لبون کی ادائیگی لازم ہو گی جو نر ہو، ١٣٣ اونٹوں تک یہی لازم ہو گا، اگر وہ ایک بھی زیادہ ہو جائے، تو ان میں ٤٥ تک ایک بنت لبون کی ادائیگی لازم ہو گی، پھر اگر وہ ایک بھی زیادہ ہو جائے، ان میں ایک حقہ کی ادائیگی لازم ہو گی، ساٹھ تک یہی حکم چلے گا، پھر اگر ان میں ایک بھی زیادہ ہو جائے، تو ان میں ایک جذعہ کی ادائیگی لازم ہو گی، ٧٥ تک یہی حکم ہے، پھر اگر ان میں ایک بھی زیادہ ہو جائے، تو ان میں دو بنت لبون کی ادائیگی لازم ہو گی، یہ حکم اگر ان میں ایک بھی زیادہ ہو جائے، تو ان میں دو حقہ کی ادائیگی لازم ہو گی، یہ حکم ١٢٠ اونٹوں تک ہے، اگر ان سے ایک بھی زیادہ ہو جائے، تو ہر چالیس میں ایک جذعہ کی ادائیگی لازم ہو گی اور ہر پچاس میں ایک حقہ کی ادائیگی لازم ہو گی۔“ سلمان بن ارقم نامی راوی نے اسی طرح روایت کیا ہے اور یہ شخص ضعیف الحدیث ہے اور متروک ہے۔ [سنن الدارقطني/ كِتَابُ زَكَاةِ/حدیث: 1983]

سیدنا انس رضی اللہ عنہ بیان کرتے ہیں: سیدنا ابوبکر رضی اللہ عنہ کو خلیفہ مقرر کیا گیا، تو انہوں نے سیدنا انس بن مالک رضی اللہ عنہ کو بحرین بھیجا اور انہیں یہ تحریر لکھ کر دی۔ یہ زکوٰۃ کے بارے میں حکم نامہ ہے، جسے نبی کریم صلی اللہ علیہ وسلم نے مسلمانوں پر فرض قرار دیا ہے، جس کا حکم اللہ تعالیٰ نے اپنے رسول کو دیا تھا۔ جس مسلمان سے اس کے مطابق مطالبہ کیا جائے، وہ اس کی ادائیگی کر دے۔ جس سے اس سے زیادہ کا مطالبہ کیا جائے، وہ ادائیگی نہ کرے۔ 24 تک یا اس سے کم میں بکریوں کی ادائیگی کی جائے گی، جن میں سے ہر پانچ کے عوض ایک بکری دی جائے گی۔ جب وہ 25 ہوں، تو 35 تک ایک بنت مخاض مونث کی ادائیگی کی جائے گی۔ جب وہ 36 سے لے کر 45 تک ہوں، تو ان میں ایک بنت لبون مونث کی ادائیگی کی جائے گی۔ 46 سے 60 تک ایک حقہ کی ادائیگی کی جائے گی، جسے جفتی کے لیے دیا جا سکے۔ جب ان کی تعداد 61 سے 75 تک ہو، تو ان میں جذعہ کی ادائیگی ہو گی۔ جب ان کی تعداد 76 سے 90 تک ہو، تو ان میں دو بنت لبون کی ادائیگی ہو گی۔ جب ان کی تعداد 91 سے 120 تک ہو، تو ان میں ایک حقہ کی ادائیگی ہو گی، جنہیں جفتی کے لیے دیا جا سکے۔ جب ان کی تعداد 120 سے زیادہ ہو جائے، تو ہر چالیس میں ایک بنت لبون کی اور ہر پچاس میں ایک حقہ کی ادائیگی لازم ہو گی۔ اگر اونٹوں کی عمر اس سے مختلف ہو جس کی ادائیگی زکوٰۃ میں لازم ہوتی ہے، تو جس شخص نے جذعہ زکوٰۃ میں ادا کرنا ہو اور اس کے پاس جذعہ نہ ہو، بلکہ حقہ موجود ہو، تو اس سے حقہ وصول کیا جائے گا اور اس کے ساتھ دو بکریاں لی جائیں گی، اگر وہ آسانی سے دے سکتا ہے، یا پھر بیس درہم لیے جائیں گے۔ جس شخص نے حقہ ادا کرنا تھا اور اس کے پاس حقہ نہیں تھا، بلکہ اس کے پاس جذعہ تھا، اس سے جذعہ وصول کیا جائے گا اور زکوٰۃ وصول کرنے والا اسے بیس درہم یا دو بکریاں ادا کر دے گا۔ جس شخص نے زکوٰۃ میں حقہ ادا کرنا تھا اور اس کے پاس صرف بنت لبون موجود ہو، تو اس سے بنت لبون وصول کی جائے گی اور وہ اس کے ساتھ دو بکریاں دے گا یا بیس درہم دے گا۔ جس شخص نے بنت لبون زکوٰۃ میں ادا کرنا تھی اور وہ اس کے پاس نہیں تھی، بلکہ اس کے پاس حقہ موجود تھا، تو اس سے حقہ کو وصول کر لیا جائے گا اور زکوٰۃ وصول کرنے والے شخص سے بیس درہم یا دو بکریاں ادا کرے گا۔ جس شخص نے بنت لبون ادا کرنی تھی اور اس کے پاس وہ نہیں ہو اور اس کے پاس بنت مخاض موجود ہو، تو اس سے بنت مخاض قبول کی جائے گی اور اس کے ساتھ اسے بیس درہم دیے جائیں گے یا دو بکریاں ادا کی جائیں گی۔ جس شخص نے بنت مخاض ادا کرنا تھی اور اس کے پاس وہ نہ ہو، بلکہ اس کے پاس بنت لبون ہو، تو اسے اس سے لے لیا جائے گا اور صدقہ وصول کرنے والا شخص اسے بیس درہم یا دو بکریاں ادا کر دے گا۔ اگر اس شخص کے پاس بنت مخاض نہ ہو، بلکہ اس کے پاس ابن لبون مذکر ہو، تو اس سے وہی وصول کیا جائے گا اور اس کے ساتھ کوئی چیز نہیں لی جائے گی۔ جس شخص کے پاس صرف چار اونٹ ہوں، اس پر زکوٰۃ لازم نہیں ہو گی، (البتہ اگر ان کا مالک چاہے، تو ادائیگی کر سکتا ہے)۔ جب اونٹوں کی تعداد پانچ ہو جائے گی، تو ان پر ایک بکری کی ادائیگی لازم ہو جائے گی۔ اس طرح بکریوں کے بارے میں حکم یہ ہے کہ جب ان کی تعداد 40 سے 120 تک ہو، تو ان میں ایک بکری کی ادائیگی لازم ہو گی۔ اگر تعداد 120 سے زیادہ ہو جائے، تو 200 تک دو بکریوں کی ادائیگی لازم ہو جائے گی۔ جب تعداد 200 سے زیادہ ہو جائے، تو 300 تک تین بکریوں کی ادائیگی لازم ہو گی۔ جب تعداد 300 سے زیادہ ہو جائے، تو ایک سو میں ایک بکری کی ادائیگی لازم ہو جائے گی۔ زکوٰۃ میں ٹوٹے ہوئے سینگ والی، کانی، لنگڑی بکری قبول نہیں کی جائے گی، (البتہ اگر صدقہ وصول کرنے والا چاہے، تو ایسے کسی جانور کو قبول کر سکتا ہے)۔ اور زکوٰۃ سے بچنے کے لیے الگ الگ مال کو اکٹھا نہیں کیا جائے گا اور اکٹھے مال کو الگ الگ نہیں کیا جائے گا۔ جو چیز دو آدمیوں کی مشترکہ ملکیت ہو، تو ان دونوں سے برابر کی بنیاد پر وصول کی جائے گی۔ اگر کسی شخص کی بکریاں 40 سے ایک بھی کم ہوں، تو ان پر زکوٰۃ کی ادائیگی واجب نہیں ہو گی، البتہ اگر ان کا مالک چاہے، تو کوئی ادائیگی کر سکتا ہے۔ غلاموں میں عشر کے چوتھائی حصے (یعنی اصل قیمت کا اڑھائی فیصد) کی ادائیگی لازم ہو گی۔ اگر کسی شخص کے مال میں صرف 190 (درہم) ہوں، تو ان پر زکوٰۃ لازم نہیں ہو گی، البتہ اگر ان کا مالک چاہے، تو کوئی ادائیگی کر سکتا ہے۔ یوسف رحمہ اللہ نامی راوی نے اپنی روایت میں یہ الفاظ نقل کیے ہیں: سیدنا ابوبکر صدیق رضی اللہ عنہ نے یہ تحریر انہیں اس وقت لکھ کر دی تھی، جب انہیں بحرین بھیجا تھا (اس میں یہ الفاظ ہیں): اللہ تعالیٰ کے نام سے آغاز کرتا ہوں جو رحمن اور رحیم ہے۔ یہ زکوٰۃ کی فرضیت (کا حکم نامہ) ہے۔ فضل رحمہ اللہ نامی راوی نے اپنی روایت میں یہ الفاظ نقل کیے ہیں: سیدنا ابوبکر رضی اللہ عنہ کو خلیفہ مقرر کیا گیا، تو انہوں نے سیدنا انس بن مالک رضی اللہ عنہ کو بحرین بھیجا اور انہیں یہ تحریر لکھ کر دی اور اس پر نبی کریم صلی اللہ علیہ وسلم کی مہر لگائی۔ نبی کریم صلی اللہ علیہ وسلم کی مہر مبارک پر یہ الفاظ کندہ تھے: لفظ محمد ایک سطر میں، لفظ رسول ایک سطر میں اور لفظ اللہ ایک سطر میں۔ یہ زکوٰۃ کی فرضیت کا حکم نامہ ہے، جسے اللہ تعالیٰ نے مسلمانوں پر فرض قرار دیا ہے، جس کے بارے میں نبی کریم صلی اللہ علیہ وسلم نے حکم دیا ہے۔ [سنن الدارقطني/ كِتَابُ زَكَاةِ/حدیث: 1984]

سیدنا انس بن مالک رضی اللہ عنہ، نبی کریم صلی اللہ علیہ وسلم کے بارے میں یہ نقل کرتے ہیں: ”مسلمانوں کے زکوٰۃ ادا کرنے کے بارے میں یہ حکم نامہ ہے، جس کا حکم اللہ تعالیٰ نے اپنے رسول کو دیا ہے، اہل ایمان میں سے جس شخص سے اس کے مطابق مطالبہ کیا جائے، وہ اس کے مطابق ادائیگی کر دے اور جس سے اس کے علاوہ کوئی مطالبہ کیا جائے، وہ دوسری کوئی ادائیگی نہ کرے، ہر چوبیس اونٹوں یا اس سے کم میں ہر پانچ اونٹوں کی زکوٰۃ ایک بکری ہو گی، ٢٥ سے ٣٥ تک میں ایک بنت مخاض کی ادائیگی لازم ہو گی، اگر بنت مخاض موجود نہ ہو، تو ابن لبون کی ادائیگی ہو گی جو مذکر ہو، پھر ٣٦ سے ٤٥ تک میں بنت لبون کی ادائیگی لازم ہو گی، پھر ٤٦ سے ٦٠ تک میں ایک حقہ کی ادائیگی لازم ہو گی، ٦١ سے ٧٥ تک میں جذعہ کی ادائیگی لازم ہو گی، ٧٦ سے ٩٠ تک میں دو بنت لبون کی ادائیگی لازم ہو گی، ٩١ سے ١٢٠ تک میں دو حقہ کی ادائیگی لازم ہو گی، ١٢١ سے آگے یہ حکم ہو گا کہ ہر چالیس میں ایک بنت لبون کی ادائیگی اور پچاس میں ایک حقہ کی ادائیگی لازم ہو گی، اگر اونٹوں کی عمر میں فرق آ جائے، تو جس شخص کے ذمے جذعہ کی ادائیگی بطور زکوٰۃ لازم ہو گی، تو اگر اس کے پاس جذعہ نہ ہو، بلکہ حقہ موجود ہو، تو اس سے وہی وصول کر لیا جائے گا، اور وہ محض اس کے ساتھ دو بکریاں ادا کرے گا، اگر یہ ادا کرنا اس کے لیے ممکن ہو، یا پھر بیس درہم ادا کرے گا، اگر اس شخص کے ذمے حقہ کی ادائیگی لازمی تھی اور اس کے پاس نہ ہو، بلکہ اس کے پاس جذعہ ہو، تو اس سے وہی وصول کر لیا جائے گا اور صدقہ وصول کرنے والا شخص اس کے ساتھ دو بکریاں یا بیس درہم ادا کر دے گا، جس شخص کے ذمے حقہ کی ادائیگی لازم تھی اور وہ اس کے پاس نہ ہو، بلکہ اس کے پاس بنت لبون ہو، اس سے وہی وصول کر لی جائے گی اور وہ شخص اس کے ساتھ دو بکریاں یا بیس درہم ادا کرے گا، جس شخص نے بنت لبون ادا کرنا تھی اور اس کے پاس بنت لبون نہ ہو، بلکہ اس کے پاس حقہ ہو، تو اس سے وہی وصول کر لی جائے گی اور صدقہ وصول کرنے والا شخص اسے دو بکریاں یا بیس درہم ادا کرے گا۔ اگر زکوٰۃ میں بنت لبون کی ادائیگی لازم تھی اور وہ اس شخص کے پاس نہ ہو، بلکہ اس کے پاس بنت مخاض ہو، تو اس سے وہی وصول کر لیا جائے گا اور وہ شخص اس کے ساتھ دو بکریاں یا بیس درہم ادا کرے گا، جس شخص نے زکوٰۃ میں بنت مخاض ادا کرنی تھی اور وہ اس کے پاس نہ ہو، بلکہ اس کے پاس بنت لبون ہو، تو اس سے وہی وصول کی جائے گی، اور صدقہ وصول کرنے والا شخص اسے دو بکریاں یا بیس درہم ادا کر دے گا۔ جس شخص کے ذمے زکوٰۃ میں بنت مخاض ادا کرنا تھی اور وہ اس کے پاس نہ ہو، بلکہ اس کے پاس ابن لبون ہو جو مذکر ہو، تو اس سے وہی وصول کر لیا جائے گا اور اس کے ساتھ کوئی چیز وصول نہیں کی جائے گی، جس شخص کے پاس صرف چار اونٹ ہوں، تو اس پر زکوٰۃ واجب نہیں ہو گی، البتہ اگر ان کا مالک چاہے (تو صدقہ کے طور پر) کوئی ادائیگی کر سکتا ہے، جب پانچ اونٹ ہو جائیں گے، تو ان میں ایک بکری کی ادائیگی لازم ہو گی۔ بکریوں کے بارے میں حکم یہ ہے: ٤٠ سے ١٢٠ تک میں ایک بکری کی ادائیگی لازم ہو گی، ١٢١ سے ٢٠٠ بکریوں میں دو بکریوں کی ادائیگی لازم ہو گی، ٢٠٠ سے ٣٠٠ تک میں تین بکریوں کی ادائیگی لازم ہو گی، ہر ایک سو میں ایک بکری کی ادائیگی لازم ہو گی۔ زکوٰۃ میں کوئی سینگ ٹوٹی ہوئی، کانی یا لنگڑی بکری ادا نہیں کی جائے گی، البتہ اگر زکوٰۃ وصول کرنے والا چاہے (تو ایسی جانور وصول کر سکتا ہے)، زکوٰۃ کی ادائیگی سے بچنے کے لیے الگ، الگ مال کو اکٹھا نہیں کیا جائے گا اور اکٹھے مال کو الگ، الگ نہیں کیا جائے گا، جو چیز دو لوگوں کی مشترکہ ملکیت ہو، تو ان دونوں سے برابری کی بنیاد پر وصولی کی جائے گی، اگر بکریوں کی تعداد چالیس سے ایک بھی کم ہو، تو اس پر زکوٰۃ کی ادائیگی لازم نہیں ہو گی، البتہ اگر ان کا مالک چاہے، تو اس سے کوئی ادائیگی کر سکتا ہے۔ غلاموں میں عشر کے چوتھائی حصے (یعنی اصل قیمت کا اڑھائی فیصد) کی ادائیگی لازم ہو گی۔ اگر کسی شخص کے پاس مال میں صرف ١٩٠ درہم ہوں، تو اس پر زکوٰۃ ادا کرنا لازم نہیں ہو گا (البتہ اگر ان کا مالک چاہے، تو صدقے کے طور پر کوئی ادائیگی کر سکتا ہے)۔“ اس روایت کی سند مستند ہے اور اس کے تمام راوی ثقہ ہیں۔ [سنن الدارقطني/ كِتَابُ زَكَاةِ/حدیث: 1985]

ابن شہاب بیان کرتے ہیں: یہ نبی کریم صلی اللہ علیہ وسلم کے خط کا نسخہ ہے، جو آپ صلی اللہ علیہ وسلم نے زکوٰۃ کے بارے میں تحریر کیا تھا، ابن شہاب بیان کرتے ہیں: سالم بن عبداللہ بن عمر نے یہ مجھے پڑھ کر سنایا اور میں نے اسے اسی طرح محفوظ کر لیا، یہ وہی نسخہ ہے، جس کی ایک نقل عمر بن عبدالعزیز نے عبداللہ بن عمر اور سالم بن عبداللہ سے لی تھی، جب انہیں مدینہ منورہ کا گورنر مقرر کیا گیا تھا۔ عمر بن عبدالعزیز نے اپنے سرکاری اہلکاروں کو اس پر عمل کرنے کا حکم دیا تھا اور یہی لکھ کر ولید بن عبدالملک کے پاس بھیج دیا تھا، ولید نے بھی اپنے اہلکاروں کو اس پر عمل کرنے کا حکم دیا تھا، اس کے بعد خلفاء اس کے مطابق حکم دیتے رہتے تھے، پھر ہشام بن ہانی کے حکم کے تحت اس کی نقل ہر مسلمان اہلکار تک پہنچا دی گئی، اس نے اس پر موجود احکام پر عمل کرنے کا حکم بھی دیا اور یہ ہدایت کی کہ وہ اس سے تجاوز نہ کریں۔ یہ تحریر اس کی وضاحت کرتی ہے: ”اونٹ میں زکوٰۃ کی ادائیگی اس وقت لازم ہو گی، جب ان کی تعداد پانچ ہو جائے، جب وہ پانچ ہو جائیں گے، تو ان پر ایک بکری کی ادائیگی لازم ہو گی، یہاں تک کہ وہ دس ہو جائیں، جب وہ دس ہو جائیں گے، تو ان پر دو بکریوں کی ادائیگی لازم ہو گی، جب وہ پندرہ ہو جائیں گے، تو ان میں تین بکریوں کی ادائیگی لازم ہو گی، یہاں تک کہ ان کی تعداد بیس ہو جائے، اور جب وہ بیس ہو جائیں گے، تو ان پر چار بکریوں کی ادائیگی لازم ہو گی، یہاں تک کہ وہ ٢٥ ہو جائیں، جب وہ ٢٥ ہو جائیں گے، تو ان میں ایک بنت مخاض کی ادائیگی لازم ہو جائے گی، اگر بنت مخاض نہ مل سکے، تو مذکر ابن لبون کی ادائیگی لازم ہو گی، یہاں تک کہ ان کی تعداد ٣٥ ہو جائے۔ جب ان کی تعداد ٣٦ سے ٤٥ تک ہو، تو ان کے اندر ایک بنت لبون کی ادائیگی لازم ہو گی، ٤٦ سے ٦٠ تک ان میں ایک حقہ کی ادائیگی لازم ہو گی، جسے جفتی کے لیے دیا جا سکے، ٦١ سے ٧٥ تک میں اسے ایک جذعہ کی ادائیگی لازم ہو گی، ٷ٦ سے ٩٠ تک میں دو بنت لبون کی ادائیگی لازم ہو گی، ٩١ سے ١٢٠ تک میں دو حقہ کی ادائیگی لازم ہو گی، جسے جفتی کے لیے دیا جا سکے۔ ١٢١ سے ١٢٩ تک میں تین بنت لبون کی ادائیگی لازم ہو گی، ١٣٠ سے ١٣٥ تک میں ایک حقہ اور دو بنت لبون کی ادائیگی لازم ہو گی، ١٤٠ تک میں دو حقہ اور ایک بنت لبون کی ادائیگی لازم ہو گی، یہاں تک کہ ان کی تعداد ١٤٩ ہو جائے، جب ان کی تعداد ١٥٠ ہو جائے، تو ان میں تین حقہ کی ادائیگی لازم ہو گی، یہاں تک کہ ان کی تعداد ١٥٩ ہو جائے، جب ان کی تعداد ١٦٠ ہو جائے گی، تو ان میں چار بنت لبون کی ادائیگی لازم ہو جائے گی، ١٦٩ تک میں یہی حکم ہے، جب ان کی تعداد ١٧٠ ہو جائے گی، تو ان میں ایک جذعہ اور تین بنت لبون کی ادائیگی لازم ہو گی، یہ حکم ١٧٩ تک میں ہے، جب ان کی تعداد ١٨٠ ہو جائے، تو ان میں دو حقہ اور دو بنت لبون کی ادائیگی لازم ہو گی، یہ حکم ١٨٩ تک ہے، جب ان کی تعداد ١٩٠ ہو جائے، تو ان میں تین حقہ اور ایک بنت لبون کی ادائیگی لازم ہو گی، یہ حکم ١٩٩ تک ہے، جب ان کی تعداد ٢٠٠ ہو جائے، تو ان میں چار حقہ یا پانچ بنت لبون کی ادائیگی لازم ہو گی، خواہ دونوں میں سے جو بھی ہو، جو بھی تمہیں ملے گا، تم اسے وصول کر لو گے، اس گنتی کے مطابق جو ہم نے اس کتاب میں تحریر کیا ہے۔ اس کے بعد اونٹوں کی تمام قسموں میں اس کے مطابق وصولی کی جائے گی، جو ہم نے اس کتاب میں تحریر کر دیا ہے۔ بکریوں میں زکوٰۃ اس وقت وصول نہیں کی جائے گی، جب تک ان کی تعداد ٤٠ نہ ہو جائے، جب ان کی تعداد ٤٠ ہو جائے گی، تو ان پر ایک بکری کی ادائیگی لازم ہو جائے گی، یہ حکم ١٢٠ بکریاں ہونے تک ہے، جب ان کی تعداد ١٢١ ہو جائے گی، تو ان میں دو بکریوں کی ادائیگی لازم ہو جائے گی، یہ حکم ٢٠٠ کی تعداد ہے، جب ان کی تعداد ٢٠١ ہو جائے گی، تو ان میں تین بکریوں کی ادائیگی لازم ہو جائے گی، یہ حکم ٣٠٠ تک ہے، جب ان کی تعداد ٣٠٠ سے زیادہ ہو جائے گی، تو ٤٠٠ تک میں صرف تین بکریوں کی ادائیگی لازم ہو گی، جب ان کی تعداد ٤٠٠ ہو جائے گی، تو اس میں چار بکریوں کی ادائیگی لازم ہو گی، یہ حکم پانچ سو کی تعداد تک ہے، جب ان کی تعداد ٥٠٠ تک ہو گی، تو ان میں ایک مزید بکری کی ادائیگی لازم ہو گی، یہ حکم ٦٠٠ تک ہے، جب ان کی تعداد ٧٠٠ تک ہو جائے، تو ان میں ٧ بکریوں کی ادائیگی لازم ہو جائے گی، یہاں تک کہ ان کی تعداد ٨٠٠ ہو جائے، جب ان کی تعداد ٨٠٠ ہو جائے گی، تو ٨ بکریوں کی ادائیگی لازم ہو گی، یہاں تک کہ ان کی تعداد ٩٠٠ ہو جائے گی، جب ان کی تعداد ٩٠٠ ہو جائے گی، تو ان میں ٩ بکریوں کی ادائیگی لازم ہو جائے گی، یہاں تک کہ ان کی تعداد ١٠٠٠ ہو جائے، جب ١٠٠٠ بکریاں ہو جائیں گی، تو ان میں دس بکریوں کی ادائیگی لازم ہو جائے گی، پھر اس کے بعد جو بھی تعداد زیادہ ہو گی، ہر ایک سو میں ایک بکری کی ادائیگی (بطور زکوٰۃ) لازم ہو گی۔“ [سنن الدارقطني/ كِتَابُ زَكَاةِ/حدیث: 1986]

محمد بن عبدالرحمن بیان کرتے ہیں: جب سیدنا عمر بن عبدالعزیز کو خلیفہ مقرر کیا گیا، تو انہوں نے مدینہ منورہ پیغام بھیجا کہ نبی کریم صلی اللہ علیہ وسلم کے زمانہ اقدس سے تعلق رکھنے والا زکوٰۃ کے بارے میں کوئی حکم نامہ تلاش کریں، تو سیدنا عمرو بن حزم رضی اللہ عنہ کی اولاد کے پاس وہ حکم نامہ مل گیا، جو نبی کریم صلی اللہ علیہ وسلم نے سیدنا عمرو بن حزم رضی اللہ عنہ کو لکھا تھا، جو زکوٰۃ کے بارے میں تھا، اسی طرح سیدنا عمر بن خطاب رضی اللہ عنہ کی آل کے پاس سیدنا عمر رضی اللہ عنہ کا وہ مکتوب مل گیا، جو انہوں نے زکوٰۃ کے بارے میں اپنے اہل کاروں کو لکھا تھا اور یہ اس کے مطابق تھا، جو نبی کریم صلی اللہ علیہ وسلم کے مکتوب میں تحریر ہے، جو نبی کریم صلی اللہ علیہ وسلم نے سیدنا عمرو بن حزم رضی اللہ عنہ کو بھیجا تھا۔ عمر بن عبدالعزیز نے اپنے اہل کاروں کو زکوٰۃ کے بارے میں یہ حکم دیا کہ وہ ان دونوں مکتوبات کی روشنی میں وصول کریں۔ اونٹوں کی زکوٰۃ کے بارے میں ان دونوں میں یہی بات تحریر تھی کہ اگر ان کی تعداد نوے سے ایک بھی زیادہ ہو جائے، تو ان میں دو حقہ کی ادائیگی لازم ہو گی، یہ حکم ایک سو بیس تک ہے، اگر وہ ایک سو بیس سے ایک بھی زیادہ ہو جائے، تو ان میں تین بنت لبون کی ادائیگی لازم ہو گی، یہ حکم ایک سو تینتیس تک ہے، جب اونٹوں کی تعداد اس سے زیادہ ہو جائے گی، تو اگلے دس ہونے تک کوئی ادائیگی لازم نہیں ہو گی، یہاں تک کہ اگلا دس کا ہدف پورا ہو جائے۔ [سنن الدارقطني/ كِتَابُ زَكَاةِ/حدیث: 1987]