سیدنا عبداللہ بن عمر رضی اللہ عنہما بیان کرتے ہیں: سیدنا عمر رضی اللہ عنہ نے زمانہ جاہلیت میں یہ نذر مانی تھی کہ مسجد حرام میں ایک رات کا اعتکاف کریں گے، انہوں نے اس بارے میں نبی کریم صلی اللہ علیہ وسلم سے دریافت کیا، تو آپ نے ارشاد فرمایا: ”تم اپنی نذر کو پورا کرو۔“ اس کی سند مستند ہے۔ [سنن الدارقطني/ كِتَابُ الصِّيَامِ/حدیث: 2353]

سیدنا عبداللہ بن عمر رضی اللہ عنہما بیان کرتے ہیں: سیدنا عمر بن خطاب رضی اللہ عنہ نے زمانہ جاہلیت میں یہ نذر مانی تھی کہ وہ مسجد حرام میں ایک رات کا اعتکاف کریں گے، جب اسلام کا زمانہ آیا، تو انہوں نے اس بارے میں نبی کریم صلی اللہ علیہ وسلم سے دریافت کیا، تو آپ نے فرمایا: ”تم اپنی نذر کو پورا کرو۔“ تو سیدنا عمر رضی اللہ عنہ نے ایک رات کا اعتکاف کیا تھا۔ اس کی سند ثابت ہے۔ [سنن الدارقطني/ كِتَابُ الصِّيَامِ/حدیث: 2354]

سیدنا عبداللہ بن عباس رضی اللہ عنہما بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی ہے: ”اعتکاف کرنے والے شخص پر روزہ رکھنا لازم نہیں ہوتا، البتہ اگر وہ اپنے اوپر (روزہ رکھنے کو بھی) لازم کرے، تو حکم (مختلف ہو گا)۔“ شیخ نے اس روایت کو مرفوع حدیث کے طور پر نقل کیا ہے، جبکہ دیگر راویوں نے اسے مرفوع حدیث کے طور پر نقل نہیں کیا۔ [سنن الدارقطني/ كِتَابُ الصِّيَامِ/حدیث: 2355]

سیدہ عائشہ رضی اللہ عنہا بیان کرتی ہیں: نبی کریم صلی اللہ علیہ وسلم نے یہ بات ارشاد فرمائی ہے: ”اعتکاف صرف روزے کے ہمراہ ہی درست ہوتا ہے۔“ اس کو نقل کرنے میں سویہ نامی راوی منفرد ہیں۔ [سنن الدارقطني/ كِتَابُ الصِّيَامِ/حدیث: 2356]

سیدنا حذیفہ رضی اللہ عنہ بیان کرتے ہیں: میں نے نبی کریم صلی اللہ علیہ وسلم کو یہ ارشاد فرماتے ہوئے سنا ہے: ”ہر وہ مسجد جس میں موذن اور امام موجود ہوں، اس میں اعتکاف ہو سکتا ہے۔“ اس روایت کے راوی ضحاک نے سیدنا حذیفہ رضی اللہ عنہ سے احادیث کا سماع نہیں کیا ہے۔ [سنن الدارقطني/ كِتَابُ الصِّيَامِ/حدیث: 2357]

سیدنا علی رضی اللہ عنہ فرماتے ہیں: ”اعتکاف کرنے والا شخص جمعے کی نماز میں شریک ہو سکتا ہے، جنازے میں شریک ہو سکتا ہے اور بیمار کی عیادت کر سکتا ہے۔“ [سنن الدارقطني/ كِتَابُ الصِّيَامِ/حدیث: 2358]

سیدنا علی رضی اللہ عنہ ارشاد فرماتے ہیں: ”اعتکاف کرنے والا شخص بیمار کی عیادت کر سکتا ہے، جنازے میں شریک ہو سکتا ہے، جمعے کے لیے جا سکتا ہے، اپنے گھر جا سکتا ہے (لیکن ان کے ساتھ زیادہ دیر رہ نہیں سکتا)۔“ [سنن الدارقطني/ كِتَابُ الصِّيَامِ/حدیث: 2359]

سیدنا عبداللہ بن عمر رضی اللہ عنہما، سیدنا عمر رضی اللہ عنہ کے بارے میں یہ بات نقل کرتے ہیں: انہوں نے نبی کریم صلی اللہ علیہ وسلم سے اعتکاف کے بارے میں دریافت کیا، جو ان کے ذمے لازم تھا، تو نبی کریم صلی اللہ علیہ وسلم نے انہیں ہدایت کی کہ: ”وہ اعتکاف کریں اور روزہ بھی رکھیں۔“ اس روایت کو نقل کرنے میں ابن بدیل نامی راوی منفرد ہیں اور یہ ضعیف ہیں۔ [سنن الدارقطني/ كِتَابُ الصِّيَامِ/حدیث: 2360]

سیدنا عبداللہ بن عمر رضی اللہ عنہما نے یہ بات نقل کی ہے: سیدنا عمر رضی اللہ عنہ نے نبی کریم صلی اللہ علیہ وسلم کی خدمت میں عرض کی: ”میں نے یہ نذر مانی تھی کہ میں ایک دن کا اعتکاف کروں گا،“ تو نبی کریم صلی اللہ علیہ وسلم نے فرمایا: ”تم اعتکاف بھی کرو اور روزہ بھی رکھو۔“ شیخ ابوبکر نیشاپوری کو میں نے یہ کہتے ہوئے سنا ہے، وہ فرماتے ہیں: یہ حدیث منکر ہے، کیونکہ عمرو بن دینار کے ثقہ شاگردوں نے اسے نقل نہیں کیا، جن میں ابن جریج، ابن عیینہ، حماد بن سلمہ، حماد بن زید اور دیگر حضرات شامل ہیں، جبکہ اس کا راوی ابن بدیل ضعیف ہے۔ [سنن الدارقطني/ كِتَابُ الصِّيَامِ/حدیث: 2361]

سیدنا ابوہریرہ رضی اللہ عنہ بیان کرتے ہیں: نبی کریم صلی اللہ علیہ وسلم رمضان کے مہینے کے آخری عشرے میں اعتکاف کیا کرتے تھے، اس کے بعد یہ معمول اسی طرح رہا، یہاں تک کہ آپ کا وصال ہو گیا۔ [سنن الدارقطني/ كِتَابُ الصِّيَامِ/حدیث: 2362]