سیدنا انس بن مالک رضی اللہ عنہ بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی: ”جو شخص عذر کے بغیر رمضان کا ایک روزہ نہ رکھے، اس پر ایک ماہ کے روزے رکھنا لازم ہو گا۔“ اس کی سند ثابت نہیں ہے، اس کا راوی مندل ضعیف ہے، اور جس نے سیدنا انس رضی اللہ عنہ کے حوالے سے نقل کی ہے، وہ بھی ضعیف ہے۔ [سنن الدارقطني/ كِتَابُ الصِّيَامِ/حدیث: 2403]

سیدنا ابوہریرہ رضی اللہ عنہ بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی ہے: ”جو شخص کسی بیماری اور رخصت کے بغیر رمضان کا ایک دن کا روزہ نہ رکھے، تو ہمیشہ روزے رکھنا بھی اس کا بدلہ نہیں ہو سکتا۔“ [سنن الدارقطني/ كِتَابُ الصِّيَامِ/حدیث: 2404]

ربیعہ بن عبدالرحمن فرماتے ہیں: ”جو شخص رمضان کے ایک دن کا روزہ نہ رکھے، تو وہ بارہ دن روزے رکھے گا، اس کی وجہ یہ ہے کہ اللہ تعالیٰ نے بارہ مہینوں کے مقابلے میں ایک مہینہ روزہ رکھنے کو پسند کیا ہے۔“ [سنن الدارقطني/ كِتَابُ الصِّيَامِ/حدیث: 2405]

سیدنا ابوہریرہ رضی اللہ عنہ بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی ہے: ”جو شخص رخصت یا بیماری کے بغیر رمضان کے روزے نہ رکھے، تو ہمیشہ روزے رکھنا بھی اس کی قضاء نہیں ہو سکتا۔“ [سنن الدارقطني/ كِتَابُ الصِّيَامِ/حدیث: 2406]