سیدنا عبداللہ بن عمرو رضی اللہ عنہما سے روایت ہے کہ سیدنا معاذ بن جبل رضی اللہ عنہ نے سفر کا ارادہ کیا تو عرض کیا: اے اللہ کے رسول! مجھے وصیت فرمائیے، آپ صلی اللہ علیہ وسلم نے فرمایا: ”اللہ کی عبادت کرو اور اس کے ساتھ کسی کو شریک نہ ٹھہراؤ“، انہوں نے عرض کیا: اے اللہ کے رسول! مزید (کچھ ارشاد فرمائیے)، آپ صلی اللہ علیہ وسلم نے فرمایا: ”جب تم سے کوئی برائی ہو جائے تو (اس کے بعد) نیکی کرو“، انہوں نے عرض کیا: اے اللہ کے رسول! مزید کچھ ارشاد فرمائیے، آپ صلی اللہ علیہ وسلم نے فرمایا: ”استقامت اختیار کرو اور اپنے اخلاق کو اچھا بناؤ۔“
یہ حدیث مصریوں کی روایت سے حسن صحیح الاسناد ہے، لیکن ان دونوں (امام بخاری و مسلم) نے اس کی تخریج نہیں کی۔ [المستدرك على الصحيحين/كِتَابُ الْإِيمَانِ/حدیث: 180]

سیدنا ابن عباس رضی اللہ عنہما نے اللہ تعالیٰ کے اس فرمان: ﴿الذين يَجْتَنِبُونَ كَبَائِرَ الْإِثْمِ وَالْفَوَاحِشَ﴾ ”جو لوگ بڑے گناہوں اور بے حیائیوں سے بچتے ہیں“ [سورة النجم: 32] کے بارے میں فرمایا کہ: اس سے مراد وہ شخص ہے جس سے کوئی بے حیائی کا کام سرزد ہو جائے اور پھر وہ اس سے توبہ کر لے، راوی کہتے ہیں کہ رسول اللہ صلی اللہ علیہ وسلم نے فرمایا: ”اے اللہ! اگر تو بخش دے تو سب کے سب (گناہ) بخش دے... اور تیرا کون سا بندہ ہے جس سے لغزش (چھوٹا گناہ) نہ ہوا ہو۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا، انہوں نے صرف عبداللہ بن طاؤس کی اپنے والد کے واسطے سے ابن عباس کی وہ روایت لی ہے جس میں انہوں نے کہا تھا کہ میں نے سیدنا ابوہریرہ کے اس قول سے زیادہ کسی چیز کو «لمم» (چھوٹے گناہ) کے قریب نہیں دیکھا کہ ”ابن آدم پر زنا میں سے اس کا حصہ لکھ دیا گیا ہے...“ الخ۔ میرے نزدیک ان دونوں نے عمرو بن دینار کی اس حدیث کو (آنے والی) اگلی حدیث کی وجہ سے چھوڑا ہے۔ [المستدرك على الصحيحين/كِتَابُ الْإِيمَانِ/حدیث: 181]

سیدنا ابن عباس رضی اللہ عنہما نے اس آیت ﴿إِلَّا اللَّمَمَ﴾ ”مگر چھوٹے گناہ“ [سورة النجم: 32] کے بارے میں فرمایا کہ: اس سے مراد وہ شخص ہے جو گناہ میں مبتلا ہو جائے اور پھر اسے چھوڑ دے، کیا تم نے شاعر کا یہ قول نہیں سنا: ”اے اللہ! اگر تو بخش دے تو کثرت سے بخش دے... اور تیرا کون سا ایسا بندہ ہے جس سے خطا «لمم» نہ ہوئی ہو۔“
یہ موقوف روایت پہلی (مرفوع) روایت کی سند کو کمزور نہیں کرتی کیونکہ زکریا بن اسحاق حافظ اور ثقہ ہیں، اور روح بن عبادہ نے بھی ان سے یہ حدیث بیان کی ہے، اور میں اس کتاب کی شرائط میں صحابہ سے منقول تفاسیر کی تخریج کا ذکر کر چکا ہوں۔ [المستدرك على الصحيحين/كِتَابُ الْإِيمَانِ/حدیث: 182]