سیدنا موسیٰ بن طلحہ رضی اللہ عنہ کہتے ہیں: ہمارے پاس نبی اکرم صلی اللہ علیہ وسلم کے حوالے سے معاذ بن جبل رضی اللہ عنہ کی تحریر موجود ہے کہ آپ گندم، جو، انگور اور کھجوروں کی زکوۃ دیا کرتے تھے۔ ٭٭ جب اس حدیث کے تمام راویوں کی احادیث نقل کی گئی ہیں لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس حدیث کو نقل نہیں کیا۔ اور موسیٰ بن طلحہ کبیر تابعی ہیں اور ان کے لیے کسی سے بھی اس بات کا انکار ثابت نہیں ہے کہ انہوں نے معاذ کا زمانہ پایا ہے۔ [المستدرك على الصحيحين/كِتَابُ الزَّكَاةِ/حدیث: 1473]

سیدنا معاذ بن جبل رضی اللہ عنہ فرماتے ہیں کہ رسول اللہ صلی اللہ علیہ وسلم نے فرمایا: جن زمینوں کو بارش سے سیراب کیا جائے یا چشموں کے پانی سے سیراب کیا جائے ان میں عُشر ہے اور جن کو رہٹ وغیرہ سے سیراب کیا جائے، ان میں آدھا عُشر ہے۔ اور یہ بھی کھجوروں، گندم اور دالوں میں ہے لیکن کھیرے، خربوزہ، انار اور گنے میں رسول اللہ صلی اللہ علیہ وسلم نے عشر معاف فرمایا ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ سند صحیح کے ہمراہ مذکورہ حدیث کی ایک شاہد حدیث بھی موجود ہے۔ (جو کہ درج ذیل ہے)۔ [المستدرك على الصحيحين/كِتَابُ الزَّكَاةِ/حدیث: 1474]

سیدنا ابوہریرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے جب ابوموسیٰ اور معاذ بن جبل کو یمن کی طرف لوگوں کو دین کے معاملات سکھانے کے لیے (معلم بنا کر) بھیجا۔ (تو ان سے فرمایا) زکوۃ صرف ان چار چیزوں سے لینی ہے۔ جو، گندم، خشک انگور اور کھجور۔ [المستدرك على الصحيحين/كِتَابُ الزَّكَاةِ/حدیث: 1475]

سیدنا جابر بن عبداللہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: مسلمان پر اس وقت تک اس کی کھیتی اور پھلوں وغیرہ میں زکوۃ نہیں ہے جب تک یہ 5 وسق سے کم ہوں۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن اسے صحیحین میں نقل نہیں کیا گیا۔ [المستدرك على الصحيحين/كِتَابُ الزَّكَاةِ/حدیث: 1476]