سیدنا ابوبرزہ اسلمی رضی اللہ عنہ سے روایت ہے کہ رسول اللہ صلی اللہ علیہ وسلم اپنی زندگی کے آخری ایام میں جب مجلس طویل ہو جاتی تو اٹھتے وقت یہ فرماتے: «سُبْحَانَكَ اللهُمَّ وَبِحَمْدِكَ، أَشْهَدُ أَنْ لَا إِلَهَ إِلَّا أَنْتَ، أَسْتَغْفِرُكَ وَأَتُوبُ إِلَيْكَ» ”اے اللہ! تو اپنی حمد کے ساتھ پاک ہے، میں گواہی دیتا ہوں کہ تیرے سوا کوئی معبود نہیں، میں تجھ سے بخشش مانگتا ہوں اور تیری طرف توبہ کرتا ہوں“، ہم میں سے کسی نے عرض کیا: اے اللہ کے رسول! یہ ایسے کلمات ہیں جو پہلے ہم نے آپ سے نہیں سنے تھے (کیا یہ نئے ہیں)؟ آپ صلی اللہ علیہ وسلم نے فرمایا: ”یہ ان کوتاہیوں کا کفارہ ہیں جو مجلس کے دوران ہو جاتی ہیں۔“ [المستدرك على الصحيحين/كتاب الدعاء والتكبير والتهليل والتسبيح والذكر/حدیث: 1992]

سیدنا رافع بن خدیج رضی اللہ عنہ سے روایت ہے کہ رسول اللہ صلی اللہ علیہ وسلم کے پاس جب آپ کے صحابہ جمع ہوتے اور آپ صلی اللہ علیہ وسلم وہاں سے اٹھنے کا ارادہ فرماتے تو یہ کہتے: «سُبْحَانَكَ اللهُمَّ وَبِحَمْدِكَ، أَشْهَدُ أَنْ لَا إِلَهَ إِلَّا أَنْتَ، أَسْتَغْفِرُكَ وَأَتُوبُ إِلَيْكَ، عَمِلْتُ سُوءًا وَظَلَمْتُ نَفْسِي، فَاغْفِرْ لِي، فَإِنَّهُ لَا يَغْفِرُ الذُّنُوبَ إِلَّا أَنْتَ» ”اے اللہ! تو اپنی حمد کے ساتھ پاک ہے، میں گواہی دیتا ہوں کہ تیرے سوا کوئی معبود نہیں، میں تجھ سے بخشش مانگتا ہوں اور تیری طرف توبہ کرتا ہوں، میں نے برا عمل کیا اور اپنی جان پر ظلم کیا، پس مجھے بخش دے، کیونکہ تیرے سوا کوئی گناہوں کو معاف نہیں کر سکتا“، ہم نے عرض کیا: اے اللہ کے رسول! کیا یہ کلمات آپ نے حال ہی میں اختیار فرمائے ہیں؟ آپ صلی اللہ علیہ وسلم نے فرمایا: ”ہاں، میرے پاس جبریل علیہ السلام آئے اور انہوں نے مجھ سے کہا: اے محمد! یہ کلمات مجلسوں کے (گناہوں کا) کفارہ ہیں۔“ [المستدرك على الصحيحين/كتاب الدعاء والتكبير والتهليل والتسبيح والذكر/حدیث: 1993]