سیدنا ابوہریرہ رضی اللہ عنہ سے روایت ہے کہ ایک خاتون رسول اللہ صلی اللہ علیہ وسلم کی خدمت میں حاضر ہوئی اور عرض کیا: اے اللہ کے رسول! میں فلاں کی بیٹی فلاں ہوں، آپ صلی اللہ علیہ وسلم نے فرمایا: ”میں نے تمہیں پہچان لیا، تمہاری حاجت کیا ہے؟“ اس نے عرض کیا: میری ضرورت میرے چچا زاد بھائی فلاں عابد کے متعلق ہے، آپ صلی اللہ علیہ وسلم نے فرمایا: ”میں اسے (بھی) جانتا ہوں“، اس نے عرض کیا: وہ مجھے نکاح کا پیغام دے رہا ہے، تو آپ مجھے بتائیں کہ شوہر کا بیوی پر کیا حق ہے؟ اگر وہ ایسا حق ہوا جسے میں نبھا سکی تو میں اس سے نکاح کر لوں گی، ورنہ میں نکاح نہیں کروں گی، آپ صلی اللہ علیہ وسلم نے فرمایا: ”شوہر کا بیوی پر حق یہ ہے کہ اگر اس کے نتھنوں سے خون، پیپ اور زرد پانی بہہ رہا ہو اور وہ اسے اپنی زبان سے چاٹ لے تب بھی اس نے اس کا حق ادا نہیں کیا، اور اگر کسی انسان کے لیے یہ جائز ہوتا کہ وہ کسی انسان کو سجدہ کرے تو میں عورت کو حکم دیتا کہ جب اس کا شوہر اس کے پاس آئے تو وہ اسے سجدہ کرے، اس فضیلت کی بنا پر جو اللہ نے اسے (شوہر کو) اس (بیوی) پر دی ہے“، اس نے عرض کیا: اس ذات کی قسم جس نے آپ کو حق کے ساتھ مبعوث فرمایا! میں جب تک دنیا میں رہوں گی کبھی نکاح نہیں کروں گی۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ النِّكَاحِ/حدیث: 2803]

حصین بن محصن اپنی پھوپھی سے روایت کرتے ہیں کہ وہ کسی ضرورت سے نبی کریم صلی اللہ علیہ وسلم کے پاس آئیں تو آپ صلی اللہ علیہ وسلم نے دریافت فرمایا: ”اے خاتون! کیا تم شوہر والی ہو؟“ انہوں نے عرض کیا: جی ہاں، آپ صلی اللہ علیہ وسلم نے پوچھا: ”تم اس کے ساتھ کیسی ہو؟“ انہوں نے عرض کیا: میں اس کی خدمت میں کوئی کسر نہیں چھوڑتی مگر وہی جس سے میں عاجز آ جاؤں، آپ صلی اللہ علیہ وسلم نے فرمایا: ”غور کرو کہ تم اس کے لیے کیسی ہو، کیونکہ وہی تمہاری جنت اور تمہاری دوزخ ہے۔“
یہ روایت امام مالک بن انس، حماد بن زید اور دراوردی نے یحییٰ بن سعید سے نقل کی ہے اور یہ صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ النِّكَاحِ/حدیث: 2804]

سیدنا معاذ بن جبل رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”کسی ایسی عورت کے لیے جو اللہ اور یومِ آخرت پر ایمان رکھتی ہو، یہ حلال نہیں کہ وہ اپنے شوہر کے گھر میں اس کی ناپسندیدگی کے باوجود کسی کو آنے کی اجازت دے، نہ اس کی مرضی کے بغیر گھر سے نکلے، نہ گھر کے معاملات میں (شوہر کے مقابلے میں) کسی کی اطاعت کرے، نہ اس کے سامنے سختی اور بدکلامی کرے، نہ اس کے بستر سے علیحدگی اختیار کرے اور نہ ہی اسے مارے (تکلیف پہنچائے)، پس اگر شوہر ہی زیادہ زیادتی کرنے والا ہو تو وہ (بیوی) اس کے پاس جائے یہاں تک کہ اسے راضی کر لے، پس اگر وہ اس سے (صلح) قبول کر لے تو یہ بہت اچھا ہے اور اللہ اس کا عذر قبول فرمائے گا اور اس کی دلیل کو واضح کر دے گا اور اس پر کوئی گناہ نہ ہوگا، لیکن اگر شوہر راضی ہونے سے انکار کر دے تو اس عورت نے اللہ کے ہاں اپنا عذر پہنچا دیا (یعنی وہ بری الذمہ ہو گئی)۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ النِّكَاحِ/حدیث: 2805]