سیدنا عبد اللہ بن عباس رضی اللہ عنہما سے روایت ہے کہ ایک لونڈی سیدنا عمر بن خطاب رضی اللہ عنہ کے پاس آئی اور عرض کی: میرے آقا نے مجھ پر (بدکاری کی) تہمت لگائی اور مجھے آگ پر بٹھا دیا یہاں تک کہ میرا عضوِ مخصوص جل گیا، سیدنا عمر رضی اللہ عنہ نے پوچھا: کیا اس نے تمہارے خلاف یہ فعل دیکھا ہے؟ اس نے کہا: نہیں، آپ نے پوچھا: کیا تم نے اس کے سامنے اعتراف کیا ہے؟ اس نے کہا: نہیں، سیدنا عمر رضی اللہ عنہ نے فرمایا: اسے میرے پاس لاؤ، جب آپ نے اس شخص کو دیکھا تو فرمایا: کیا تو اللہ کے عذاب (آگ) کے ساتھ عذاب دیتا ہے؟! اس نے کہا: اے امیر المؤمنین! مجھے اس پر شک ہوا تھا، آپ نے پوچھا: کیا تم نے اسے اس کام میں دیکھا تھا؟ اس نے کہا: نہیں، آپ نے پوچھا: کیا اس نے اعتراف کیا تھا؟ اس نے کہا: نہیں، سیدنا عمر رضی اللہ عنہ نے فرمایا: اس ذات کی قسم جس کے ہاتھ میں میری جان ہے! اگر میں نے رسول اللہ صلی اللہ علیہ وسلم کو یہ فرماتے ہوئے نہ سنا ہوتا کہ ”مملوک سے اس کے مالک کے بدلے قصاص نہیں لیا جائے گا اور نہ ہی والد سے اس کی اولاد کے بدلے“ تو میں تجھ سے اس کا قصاص ضرور لیتا، پھر آپ نے اسے علیحدہ کیا اور سو کوڑے مارے اور لونڈی سے فرمایا: جاؤ، تم اللہ کی رضا کے لیے آزاد ہو اور تم اللہ اور اس کے رسول کی آزاد کردہ ہو۔ امام لیث فرماتے ہیں کہ اس قول پر عمل کیا جاتا ہے۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ الْعِتْقِ/حدیث: 2892]

سیدنا عبد اللہ بن معقل رضی اللہ عنہ سے روایت ہے کہ قبیلہ خولان کے کچھ قیدی لائے گئے، جبکہ سیدہ عائشہ رضی اللہ عنہا کے ذمے اولادِ اسماعیل علیہ السلام میں سے ایک غلام آزاد کرنا واجب تھا، جب یمن سے قیدی آئے تو انہوں نے ان میں سے آزاد کرنے کا ارادہ کیا لیکن نبی کریم صلی اللہ علیہ وسلم نے انہیں منع فرما دیا، پھر جب قبیلہ مضر - غالباً بنو عنبر - کے قیدی آئے تو آپ صلی اللہ علیہ وسلم نے انہیں ان میں سے آزاد کرنے کا حکم دیا۔ [المستدرك على الصحيحين/كِتَابُ الْعِتْقِ/حدیث: 2893]

سیدنا عبد اللہ بن معقل رضی اللہ عنہ سے روایت ہے کہ سیدہ عائشہ رضی اللہ عنہا کے ذمے اولادِ اسماعیل علیہ السلام میں سے ایک گردن آزاد کرنا واجب تھی، پس رسول اللہ صلی اللہ علیہ وسلم کے پاس بنو عنبر کے قیدی لائے گئے تو رسول اللہ صلی اللہ علیہ وسلم نے ان سے فرمایا: ”تم بنو عنبر - یا فرمایا بنو لحیان - میں سے آزاد کرو اور بنو خولان میں سے آزاد نہ کرنا۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ الْعِتْقِ/حدیث: 2894]