سیدنا ابوسعید خدری رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: میرے آسمان میں دو وزیر سیدنا جبریل علیہ السلام اور سیدنا میکائیل علیہ السلام ہیں اور زمین میں سیدنا ابوبکر رضی اللہ عنہ اور سیدنا عمر رضی اللہ عنہ ہیں۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ جبکہ یہ حدیث سوار بن مصعب سے عطیہ عوفی کے حوالے سے سیدنا ابوسعید رضی اللہ عنہ سے مشہور ہے۔ تاہم وہ سند اس کتاب کے معیار کی نہیں ہے (جیسا کہ درج ذیل ہے) [المستدرك على الصحيحين/كِتَابُ التَّفْسِيرِ/حدیث: 3083]

سیدنا ابوسعید خدری رضی اللہ عنہ روایت کرتے ہیں کہ رسول اللہ صلی اللہ علیہ وسلم نے ارشاد فرمایا: میرے دو وزیر آسمان میں ہیں اور دو وزیر زمین میں ہیں۔ میرے آسمان کے دو وزیر سیدنا جبریل علیہ السلام اور سیدنا میکائیل علیہ السلام ہیں اور زمین میں دو وزیر سیدنا ابوبکر رضی اللہ عنہ اور سیدنا عمر رضی اللہ عنہ ہیں۔ ٭٭ اس حدیث کو ابوعبید قاسم بن سلام نے ابومعاویہ سے عطیہ سے مختلف الفاظ کے ساتھ روایت کی ہے (جو کہ درج ذیل ہے) [المستدرك على الصحيحين/كِتَابُ التَّفْسِيرِ/حدیث: 3084]

سیدنا ابوسعید خدری رضی اللہ عنہ فرماتے ہیں: رسول اللہ صلی اللہ علیہ وسلم نے سیدنا اسرافیل علیہ السلام کا ذکر کیا پھر فرمایا: سیدنا جبرئیل علیہ السلام اس کے دائیں اور سیدنا میکائیل علیہ السلام اس کے بائیں جانب ہوں گے۔ ابوعبید کہتے ہیں: حدیث میں یہ دونوں الفاظ مہموزا استعمال ہوئے ہیں۔ [المستدرك على الصحيحين/كِتَابُ التَّفْسِيرِ/حدیث: 3085]

سیدنا ابوسعید خدری رضی اللہ عنہ روایت کرتے ہیں کہ رسول اللہ صلی اللہ علیہ وسلم نے ارشاد فرمایا: سیدنا جبرئیل علیہ السلام کے دائیں ہیں اور میکائیل علیہ السلام ان کے بائیں ہیں اور وہ (یعنی سیدنا اسرافیل علیہ السلام) صَاحِبَ الصُّور (یعنی وہ صور پھونکنے کے ذمہ دار) ہیں۔ [المستدرك على الصحيحين/كِتَابُ التَّفْسِيرِ/حدیث: 3086]

سیدنا عمران بن حارث رضی اللہ عنہ کا بیان ہے کہ ایک دفعہ ہم سیدنا (عبداللہ) بن عباس رضی اللہ عنہما کے پاس موجود تھے کہ ایک شخص ان کے پاس آیا۔ آپ نے پوچھا: تو کہاں سے آیا ہے؟ اس نے جواباً کہا: عراق سے۔ آپ نے پوچھا: عراق کے کس شہر سے؟ اس نے کہا: کوفہ سے۔ آپ نے کہا: وہاں کی (تازہ) خبر کیا ہے؟ اس نے کہا: جب میں وہاں سے آیا تو اس وقت وہاں یہ چہ میگوئیاں ہو رہی تھیں کہ سیدنا علی رضی اللہ عنہ نے بغاوت کر دی ہے، آپ نے فرمایا: تم کیا کہہ رہے ہو؟ تیرا باپ نہ رہے۔ اگر ایسی بات ہوتی تو ہم اس کی عورتوں سے نکاح نہ کرتے اور اس کی وراثت تقسیم نہ کرتے۔ پھر آپ نے فرمایا: میں اس کے متعلق تمہیں ایک بات بتاتا ہوں۔ شیاطین چوری چھپے ملائکہ کی باتیں سنا کرتے تھے پھر ان میں سے ایک کوئی سچی بات بول دیتا جو لوگوں نے سن رکھی ہوتی پھر وہ اس میں ستر جھوٹ شامل کر کے لوگوں کے دلوں میں ڈال دیا کرتے تھے۔ اللہ تعالیٰ نے سیدنا سلیمان بن داؤد علیہما السلام کو اس بات کی اطلاع دی۔ انہوں نے (یہ تمام منتر وغیرہ) پکڑ کر اپنی کرسی کے نیچے دفن کر دیئے۔ جب سلیمان کا انتقال ہو گیا تو شیطان ایک راستے میں کھڑا ہو کر کہنے لگا: کیا میں تمہیں سیدنا سلیمان علیہ السلام کے ایک خزانے کی راہنمائی نہ کروں کہ اس جیسا کوئی خزانہ نہیں ہے اور اس کو آج تک روک کر رکھا گیا ہے لوگوں نے کہا: ہاں (تب شیطان کی راہنمائی سے) لوگوں نے اس کو نکال لیا تو وہ جادو تھا۔ تو لوگ ایک دوسرے کو وہ دیتے رہے اور اہل عراق جو کچھ کہہ رہے ہیں یہ اسی جادو کے اثر کی باقیات ہیں۔ تو اللہ تعالیٰ نے سلیمان رضی اللہ عنہما کا عذر نازل فرما دیا۔ ارشاد فرمایا:” وَ اتَّبَعُوْا مَا تَتْلُوا الشَّیٰطِیْنُ عَلٰی مُلْکِ سُلَیْمٰنَ وَ مَا کَفَرَ سُلَیْمٰنُ وَٰلکِنَّ الشَّیٰطِیْنَ کَفَرُوْا یُعَلِّمُوْنَ النَّاسَ السِّحْرَ “ (البقرۃ: 102) ” اور اس کے پیرو ہوئے جو شیطان پڑھا کرتے تھے سلطنت سلیمان کے زمانہ میں اور سلیمان نے کفر نہ کیا ہاں شیطان کافر ہوئے لوگوں کو جادو سکھاتے ہیں “۔ [المستدرك على الصحيحين/كِتَابُ التَّفْسِيرِ/حدیث: 3087]