سیدنا عمر رضی اللہ عنہ فرماتے ہیں: جب شراب کی حرمت کا حکم نازل ہوا تو سیدنا عمر رضی اللہ عنہ نے دعا مانگی: یا اللہ! ہمارے لیے شراب کے متعلق کوئی تسلی بخش حکم فرما، تو سورۂ بقرہ کی یہ آیت نازل ہوئی: یَسْئَلُوْنَکَ عَنِ الْخَمْرِ وَ الْمَیْسِرِ (البقرۃ: 219) ” تم سے شراب اور جوئے کا حکم پوچھتے ہیں “۔۔ پھر سیدنا عمر رضی اللہ عنہ کو بلا کر یہ آیت سنائی گئی، انہوں نے پھر دعا مانگی: یا اللہ! شراب کے متعلق ہمارے لیے کوئی تسلی بخش ارشاد فرما۔ تو پھر سورۂ مائدہ کی یہ آیت نازل ہوئی: یٰٓاَیُّھَا الَّذِیْنَ ٰامَنُوْآ اِنَّمَا الْخَمْرُ وَ الْمَیْسِرُ وَ الْاَنْصَابُ وَ الْاَزْلَامُ رِجْسٌ مِّنْ عَمَلِ الشَّیْطٰنِ فَاجْتَنِبُوْہُ لَعَلَّکُمْ تُفْلِحُوْنَ (المائدۃ: 90) ” اے ایمان والو! شراب اور جُوا اور بُت اور پانسے ناپاک ہی ہیں شیطانی کام تو ان سے بچتے رہنا کہ تم فلاح پاؤ “۔۔ پھر سیدنا عمر کو بلا کر یہ آیت سنائی گئی، جب اس مقام پر پہنچے: فَھَلْ اَنْتُمْ مُّنْتَھُوْنَ (المائدۃ: 91) ” تو کیا تم باز آئے “۔۔ تو سیدنا عمر رضی اللہ عنہ بولے: ہم رُک گئے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3138]

سیدنا ابوہریرہ رضی اللہ عنہ فرماتے ہیں: رسول اللہ صلی اللہ علیہ وسلم کھڑے ہوئے اور ارشاد فرمایا:” اے مدینہ والو! اللہ تعالیٰ نے شراب کے سلسلہ میں خاص تعریض فرمائی ہے، لگتا ہے کہ شراب کے متعلق اب کوئی حکم نازل ہونے والا ہے۔ پھر آپ کھڑے ہوئے اور بولے: اے اہلیان مدینہ! اللہ تعالیٰ نے شراب کی حرمت کا حکم نازل فرما دیا ہے۔ چنانچہ جس شخص کو اس آیت کا علم ہو اور اس وقت اس کے پاس کچھ شراب ہو تو وہ اس کو نہ خود پیئے اور نہ اس کو بیچے (سیدنا ابوہریرہ رضی اللہ عنہ) فرماتے ہیں: (اس حکم کے بعد) لوگوں نے مدینہ کی گلیوں اور راستوں میں شراب بہا ڈالی۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3139]

سیدنا ابن عباس رضی اللہ عنہما فرماتے ہیں: جب یہ آیت نازل ہوئی: وَلَا تَقْرَبُوْا مَالَ الْیَتِیْمِ اِلَّا بِالَّتِیْ ھِیَ اَحْسَنُ (الانعام: 152) ” اور یتیم کے مال کے پاس نہ جاؤ مگر بہت اچھے طریقے سے “۔۔ تو لوگوں نے یتیموں کا مال اپنے مالوں سے الگ کر دیا (اس کا نتیجہ یہ ہوا کہ) طعام خراب ہونے لگ گیا اور گوشت سڑنے لگ گیا، لوگوں نے اس بات کی شکایت رسول اللہ صلی اللہ علیہ وسلم کی بارگاہ میں کی تو اللہ تعالیٰ نے یہ آیت نازل فرما دی: قُلْ اِصْلَاحٌ لَّھُمْ خَیْرٌ وَ اِنْ تُخَالِطُوْھُمْ فَاِخْوَانُکُمْ (البقرۃ: 220) ” تم فرماؤ ان کا بھلا کرنا بہتر ہے “۔ (سیدنا ابن عباس رضی اللہ عنہما) فرماتے ہیں: تب لوگوں نے ان کا مال اپنے مالوں کے ساتھ ملا لیا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3140]