سیدنا (عبداللہ) بن عباس رضی اللہ عنہما اللہ تعالیٰ کے ارشاد: اِلَّا اَنْ تَتَّقُوْا مِنْھُمْ تُقٰاۃ (آل عمران: 28) ” مگر یہ کہ تم ان سے کچھ ڈرو “۔ کے متعلق فرماتے ہیں: تقاۃ کا مطلب یہ ہے ” زبان سے کلام کرنا اور دل ایمان پر مطمئن ہو “، لہٰذا ہم قتل کرنے کے لیے اپنا ہاتھ نہیں اٹھائیں گے، اور نہ ہی گناہ کی طرف، کیونکہ اس کا کوئی عذر نہیں ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3187]

سیدنا عبداللہ بن عباس رضی اللہ عنہما قرآن پاک کی یہ آیت: انی نذرت لک ما فی بطنی محررا (آل عمران: 35) میں تیرے لیے منت مانتی ہوں جو میرے پیٹ ہے “ (ترجمعہ کنزالایمان،) وَجَدَ عِنْدَھَا رِزْقًا (آل عمران: 37) ” اس کے پاس نیا رزق پاتے “۔ تک پڑھی اور فرمایا: سیدنا زکریا علیہ السلام نے ان کی کفالت کی، جب آپ سیدنا مریم علیہا السلام کے پاس ان کے حجرہ میں گئے تو ان کے ہاں ٹوکری میں بے موسم کے انگور موجود پائے۔ آپ نے کہا: تیرے پاس یہ (انگور) کہاں سے آئے۔ سیدنا مریم علیہا السلام بولیں: یہ اللہ تعالیٰ کی طرف سے آئے ہیں۔ اِنَّ اللّٰہَ یَرْزُقُ مَنْ یَّشَآئُ بِغَیْرِ حِسَابٍ (آل عمران: 37) ” بے شک اللہ جسے چاہے بے گنتی دے “۔ آپ نے اللہ سوچا: جو ذات تجھے بے موسم کے انگور دینے پر قادر ہے وہ مجھ بوڑھے بانجھ شخص کو اولاد بھی دے سکتا ہے: ھُنَالِکَ دَعَا زَکَرِیَّا (آل عمران: 38) ” یہاں پکارا زکریا نے اپنے رب کو “۔ پھر جب ان کو سیدنا یحیی علیہ السلام کی خوشخبری دے دی گئی تو آپ نے کہا: قَالَ رَبِّ اجْعَلْ لِّیْٓ اٰیَۃً قَالَ اٰیَتُکَ اَلاَّ تُکَلِّمَ النَّاسَ ثَلَٰاث لیال سویا) (آل عمران: 41) ” عرض کی اے میرے رب میرے لیے کوئی نشانی کر دے فرمایا تیری نشانی یہ ہے کہ تو تین دن لوگوں سے بات نہ کرے “۔ یعنی بغیر کسی بیماری کے، تندرستی کے عالم میں تیری زبان میں گرہ لگ جائے گی۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3188]

سیدنا عبداللہ رضی اللہ عنہ فرماتے ہیں: رسول اللہ صلی اللہ علیہ وسلم نے ارشاد فرمایا:” ہر نبی کے کچھ انبیاء دوست ہوا کرتے ہیں اور ان میں سے میرے دوست میرے جدامجد اور میرے خلیل سیدنا ابراہیم ہیں، پھر آپ نے یہ آیت پڑھی: اِنَّ اَوْلَی النَّاسِ بِاِبْرَاھِیْمَ لَلَّذِیْنَ اتَّبَعُوْہُ وَہٰذَا النَّبِیُّ وَ الَّذِیْنَ ٰامَنُوْا وَ اللّٰہُ وَلِیُّ الْمُؤْمِنِیْنَ (آل عمران: 68) ” بیشک سب لوگوں سے ابراہیم کے زیادہ حق دار وہ تھے جو ان کے پیرو ہوئے اور یہ نبی اور ایمان والے اور ایمان والوں کا اللہ والی ہے “۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3189]