سیدنا سہل بن سعد رضی اللہ عنہ فرماتے ہیں: لوگوں نے گنتی کرنے میں غلطی کی ہے کیونکہ انہوں نے آپ صلی اللہ علیہ وسلم کی بیعت یا آپ صلی اللہ علیہ وسلم کی وفات سے گنتی نہیں کی، بلکہ آپ صلی اللہ علیہ وسلم کی مدینہ منورہ تشریف آوری سے گنتی کی ہے۔ (یعنی سن ہجری کا آغاز ہجرت مدینہ سے ہوا ہے) ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ الْهِجْرَةِ/حدیث: 4331]

سیدنا عبداللہ بن عباس رضی اللہ عنہما فرماتے ہیں: تاریخ کا آغاز اس سال سے ہوا جس میں نبی اکرم صلی اللہ علیہ وسلم مدینہ منورہ تشریف لائے تھے، اسی برس میں سیدنا عبداللہ بن زبیر رضی اللہ عنہما کی ولادت ہوئی تھی۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ الْهِجْرَةِ/حدیث: 4332]