سیدنا ابووائل رضی اللہ عنہ فرماتے ہیں: میں شام میں ایک غزوہ میں سیدنا عمر رضی اللہ عنہ کے ہمراہ تھا، ہم نے ایک مقام پر پڑاؤ ڈالا، ایک کسان سیدنا عمر رضی اللہ عنہ کو ڈھونڈتا ہوا آیا، جب اس کسان نے سیدنا عمر رضی اللہ عنہ کو دیکھا تو سجدہ میں گر گیا۔ سیدنا عمر رضی اللہ عنہ نے فرمایا: یہ کیسا سجدہ کر رہے ہو؟ اس نے کہا: ہم بادشاہوں کی بارگاہ میں اسی طرح حاضری دیا کرتے ہیں۔ سیدنا عمر رضی اللہ عنہ نے فرمایا: اپنے اس رب کو سجدہ کرو جس نے تمہیں پیدا کیا۔ اس نے کہا: اے امیرالمومنین! میں نے آپ کے لئے کھانا تیار کیا ہے، آپ تشریف لے آئیں، سیدنا عمر رضی اللہ عنہ نے فرمایا: کیا عجمی لوگوں کی طرح تیرے گھر میں بھی تصاویر ہیں؟ اس نے کہا: جی ہاں۔ آپ نے فرمایا: ہم تیرے گھر نہیں جائیں گے۔ تاہم تو خود چلا جا اور تھوڑا سا کھانا ہمیں یہیں بھیج دے۔ اور زیادہ نہیں بھیجنا۔ وہ چلا گیا اور آپ کی خدمت میں کھانا بھیج دیا، آپ نے اس میں سے چکھا پھر اپنے غلام سے فرمایا: تمہارے برتن میں نبیذ ہے؟ اس نے کہا: جی ہاں۔ آپ نے فرمایا: وہ ہمارے پاس بھیجو، وہ نبیذ لے کر حاضر ہو گیا، آپ نے اس کو برتن میں انڈیل دیا پھر اس کو سونگھا لیکن اس میں سے ابھی بھی بدبو ا ٓرہی تھی، آپ نے اس پر پانی ڈالا پھر اس کو سونگھا، ابھی بھی بدبو ا ٓرہی تھی، آپ نے تین مرتبہ اس پر پانی ڈالا پھر اس کو پی لیا۔ پھر فرمایا: جب تمہیں کسی مشروب میں کوئی شک ہو تو اس کے ساتھ اسی طرح کیا کرو۔ پھر آپ نے فرمایا: میں نے رسول اللہ صلی اللہ علیہ وسلم کو یہ فرماتے سنا ہے ” دیباج اور حریر (ریشم کی دو قسمیں) مت پہنا کرو، اور سونے اور چاندی کے برتنوں میں مت پیا کرو، کیونکہ یہ ان (کفار) کیلئے دنیا میں ہے اور ہمارے لئے آخرت میں ہوں گے۔ ٭٭ یہ حدیث صحیح الاسناد ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4532]

سیدنا عبداللہ بن عمر رضی اللہ عنہما فرماتے ہیں کہ نبی اکرم صلی اللہ علیہ وسلم نے دعا مانگی ” اے اللہ! عمر بن خطاب رضی اللہ عنہ کے ذریعے دین کو تقویت دے “ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4533]

سیدنا عبداللہ عباس رضی اللہ عنہما سے مروی ہے کہ نبی اکرم صلی اللہ علیہ وسلم نے دعا مانگی ” اے اللہ! اسلام کو عمر کے سبب عزت عطا فرما “ ٭٭ یہ حدیث صحیح الاسناد ہے لیکن شیخین رحمۃ اللہ علیہما نے اس کو نقل نہیں کیا۔ ام المومنین سیدہ عائشہ بنت صدیق رضی اللہ عنہا سے مروی درج ذیل حدیث مذکورہ حدیث کی شاہد ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4534]

ام المومنین سیدہ عائشہ رضی اللہ عنہا سے مروی ہے کہ نبی اکرم صلی اللہ علیہ وسلم نے دعا مانگی ” اے اللہ! بالخصوص عمر بن خطاب رضی اللہ عنہ کے ذریعے اسلام کو عزت عطا فرما “ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ اور اس حدیث کا مدار شعبی کی مسروق کے واسطے سے سیدنا عبداللہ سے روایت کردہ اس حدیث پر ہے ” اے اللہ! تو اسلام کو عزت عطا فرما ان دو آدمیوں میں سے کسی ایک کے ساتھ جو تجھے زیادہ پسند ہے “ اور اس حدیث کو شعبی سے روایت کرنے میں مجالد بن سعید منفرد ہیں، اور اس سے پہلے مجالد کی کوئی روایت نقل نہیں کی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4535]

سیدنا عبداللہ بن مسعود رضی اللہ عنہ فرماتے ہیں کہ رسول اللہ صلی اللہ علیہ وسلم نے دعا مانگی ” اے اللہ اسلام کو عزت عطا فرما عمر بن خطاب رضی اللہ عنہ کے ذریعے یا ابوجہل بن ہشام کے ذریعے۔ تو اللہ تعالیٰ نے رسول اللہ صلی اللہ علیہ وسلم کی یہ دعا سیدنا عمر رضی اللہ عنہ کے حق میں قبول فرمائی۔ چنانچہ انہی کی بدولت اسلام کی سلطنت وسیع ہوئی بت پاش پاش ہو گئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4536]

سیدنا عبداللہ رضی اللہ عنہ فرماتے ہیں: خدا کی قسم سیدنا عمر رضی اللہ عنہ کے قبول اسلام سے پہلے ہم حرم شریف میں کھلے عام نماز نہ پڑھ سکتے تھے۔ ٭٭ یہ حدیث صحیح الاسناد ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4537]

سیدنا ابی بن کعب رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: قیامت کے دن حق سب سے پہلے عمر کے ساتھ معانقہ کرے گا، اور قیامت کے دن حق سب سے پہلے عمر کے ساتھ مصافحہ کرے گا، سب سے پہلے جس شخص کا ہاتھ پکڑ کر اسے جنت کی طرف لے جایا جائے گا وہ عمر بن خطاب ہے۔ ایک اور سند کے ساتھ سیدنا عبداللہ بن عباس رضی اللہ عنہما کا یہ بیان منقول ہے: نبی اکرم صلی اللہ علیہ وسلم نے یہ ارشاد فرمایا: جب عمر نے اسلام قبول کیا تو جبریل میرے پاس آئے اور بولے: عمر کا اسلام قبول کرنا اہل آسمان (یعنی فرشتوں) کے لئے ایک خوشخبری ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4538]