عثمان بن عطا اپنے والد سے روایت کرتے ہیں کہ جب (طاعونِ عمواس کی) وبا پھیلی تو سیدنا معاذ بن جبل رضی اللہ عنہ اس لشکر میں (خطبے کے لیے) کھڑے ہوئے جس کے وہ امیر تھے اور فرمایا: ”اے لوگو! یہ تمہارے رب کی رحمت، تمہارے نبی کی پکار اور تم سے پہلے صالحین کی وفات (کا طریقہ) ہے“، پھر معاذ رضی اللہ عنہ نے خطبہ دیتے ہوئے دعا کی: ”اے اللہ! معاذ کی آل کو اس رحمت میں سے بھرپور حصہ عطا فرما“، ابھی وہ اسی حال میں تھے کہ ایک شخص آیا اور بتایا: آپ کا بیٹا عبدالرحمن طاعون زدہ ہو گیا ہے، جب اس نے اپنے والد معاذ کو دیکھا تو عبدالرحمن کہنے لگا: اے اباجان! ﴿الْحَقُّ مِنْ رَبِّكَ فَلَا تَكُونَنَّ مِنَ الْمُمْتَرِينَ﴾ [سورة البقرة: 147] ”حق آپ کے رب کی طرف سے ہے، پس آپ شک کرنے والوں میں سے نہ ہوں“، معاذ رضی اللہ عنہ نے جواب دیا: ﴿سَتَجِدُنِي إِن شَاءَ اللَّهُ مِنَ الصَّابِرِينَ﴾ [سورة الصافات: 102] ”ان شاء اللہ آپ مجھے صبر کرنے والوں میں سے پائیں گے“، چنانچہ جمعہ سے جمعہ تک آلِ معاذ کے تمام افراد فوت ہو گئے اور سب سے آخر میں معاذ رضی اللہ عنہ کی وفات ہوئی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5267]

موسیٰ بن علی بن رباح لخمی اپنے والد سے روایت کرتے ہیں کہ سیدنا عمر بن خطاب رضی اللہ عنہ نے لوگوں کو خطبہ دیا اور فرمایا: ”جو شخص قرآن کے بارے میں سوال کرنا چاہے وہ ابی بن کعب کے پاس جائے، اور جو حلال و حرام کے متعلق پوچھنا چاہے وہ معاذ بن جبل کے پاس جائے، اور جسے مال کے بارے میں پوچھنا ہو وہ میرے پاس آئے کیونکہ اللہ تعالیٰ نے مجھے خزانچی بنایا ہے۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5268]