خلیفہ بن خیاط نے بھی ان کا نسب اسی طرح بیان کیا ہے لیکن اس میں یہ اضافہ بھی ہے ”اور ابی بن کعب کی والدہ صہیلہ بنت اسود بن حرام بن عمرو بن زید مناۃ بن عدی بن عمرو بن مالک بن نجار“ یہ سیدنا ابوطلحہ کی پھوپھی ہیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5395]

محمد بن عبداللہ بن نمیر فرماتے ہیں: سیدنا ابی بن کعب رضی اللہ عنہ سیدنا عمر رضی اللہ عنہ کے دور خلافت میں سن 22 ہجری میں فوت ہوئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5396]

محمد بن عمر نے بھی ان کا نسب اسی طرح بیان کیا ہے اور اس میں یہ اضافہ بھی ہے ”اور آپ ستر انصاری صحابہ رضی اللہ عنہم کے ہمراہ بیعت عقبہ میں بھی شریک ہوئے، آپ رسول اللہ صلی اللہ علیہ وسلم کے لئے وحی لکھا کرتے تھے۔ آپ کے دور وفات میں اختلاف پایا جاتا ہے، کچھ لوگوں کا کہنا ہے کہ آپ سیدنا عمر رضی اللہ عنہ کے دور خلافت میں سن 22 ہجری میں فوت ہوئے اور بعض لوگوں کا مؤقف یہ ہے کہ آپ سیدنا عثمان غنی رضی اللہ عنہ کے دور خلافت میں سن 30 ہجری میں فوت ہوئے۔ (امام حاکم کہتے ہیں کہ) دونوں میں سے یہ دوسرا مؤقف زیادہ مضبوط ہے کیونکہ یہ بات بھی ثابت ہے کہ سیدنا عثمان رضی اللہ عنہ نے ان کی قرآن جمع کرنے کی ذمہ داری لگائی تھی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5397]