احمد بن محمد حجاج بن رشد بن المہری کہتے ہیں کہ موسیٰ بن عون بن عبداللہ بن عون نے (ان کا نسب مجھے یوں) املاء کروایا ”عبداللہ بن مسعود بن کاہل بن حبیب بن تامر بن مخزوم بن صاہلہ بن کاہل بن حارث بن تمیم بن سعد بن ہزیل بن مدرکہ بن الیاس بن مضر بن نزار“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5444]

محمد بن اسحاق نے (سیدنا عبداللہ بن عباس رضی اللہ عنہما کا نسب بیان کرتے ہوئے) کہا:” عبداللہ بن مسعود بن حارث بن شمخ بن مخزوم بن کاہل بن حارث بن سعد بن ہزیل “ یہ بنی زہراء کی حلیفوں میں سے تھے۔ مگر اس نسب کے بارے میں واقدی نے محمد بن اسحاق کی مخالفت کی ہے [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5445]

جیسا کہ ہمیں ابو عبد اللہ الاصبہانی نے بیان کیا، وہ کہتے ہیں کہ ہمیں الحسن بن الجہم نے بیان کی، وہ کہتے ہیں کہ ہمیں الحسین بن الفرج نے بیان کی، وہ کہتے ہیں کہ ہمیں محمد بن عمر (الواقدی) نے ان کا نسب یوں بیان کیا ہے۔ ”عبداللہ بن مسعود بن غافل بن حبیب بن شمخ بن فار بن مخزوم بن صاہلہ بن کاہل بن حارث بن تیم بن سعد بن ہزیل بن مدرکہ“۔ ان کی کنیت ان کے بیٹے (عبدالرحمن کی نسبت) سے ابوعبدالرحمن تھی۔ ان کے والد مسعود بن غافل زمانہ جاہلیت میں عبدالحارث بن زہرہ کے حلیف تھے۔ اور عبداللہ بن مسعود رضی اللہ عنہ، رسول الله صلی اللہ علیہ وسلم کے دارارقم میں داخل ہونے سے پہلے اسلام لے آئے تھے۔ تمام اہل سیر کے نزدیک آپ نے جنگ بدر، احد، خندق اور تمام غزوات میں رسول اللہ صلی اللہ علیہ وسلم کے ہمراہ شرکت کی۔ اور دو ہجرتیں بھی کیں۔ اور یہ رسول اللہ صلی اللہ علیہ وسلم کے رازداں تھے۔ حضور صلی اللہ علیہ وسلم کی مسواک شریف ان کے پاس ہوتی تھی۔ حضور نبی کریم صلی اللہ علیہ وسلم ان کے ساتھ سرگوشی فرماتے تھے، یہ نبی اکرم صلی اللہ علیہ وسلم کے کفش بردار تھے، آپ کے لئے پانی وضو اپنے پاس رکھتے تھے، آپ چھوٹے قد کے کمزور گندمی رنگ کے آدمی تھے۔ آپ کا انتقال 32 ہجری کو ہوا، ان کو جنت البقیع میں دفن کیا گیا۔ وفات کے وقت ان کی عمر (بعض کے قول کے مطابق) ساٹھ سال سے کچھ اوپر تھی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5446]

محمد بن عبدالله بن نمیر کہتے ہیں: سیدنا عبدالله بن مسعود رضی اللہ عنہ مدینہ شریف میں 32 ہجری کو فوت ہوئے، جن دونوں سیدنا عثمان غنی رضی اللہ عنہ کو شہید کیا گیا۔ انہوں نے سیدنا زبیر بن عوام رضی اللہ عنہ کے لئے وصیت کی تھی اس لئے ان کی وصیت کے مطابق سیدنا زبیر بن عوام رضی اللہ عنہ نے ہی ان کی نماز جنازہ پڑھائی۔ بعض مؤرخین کا کہنا ہے کہ سیدنا عمار بن یاسر رضی اللہ عنہ نے ان کی نماز جنازہ پڑھائی۔ ان کو رات کے وقت جنت البقیع میں دفن کیا گیا، وفات کے وقت ان کی عمر ساٹھ سال سے کچھ زائد تھی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5447]

سیدنا عبداللہ بن مسعود رضی اللہ عنہ سے روایت ہے کہ نبی اکرم صلی اللہ علیہ وسلم نے ان کی کنیت ” ابوعبدالرحمن “ رکھی۔ حالانکہ ان کی اولاد نہیں تھی۔ (یا یہ ترجمہ بھی ہو سکتا ہے حالانکہ ابھی عبدالرحمن کی تو ان کے ہاں ابھی ولادت بھی نہیں ہوئی تھی)۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5448]

مصعب بن عبداللہ بن زبیری اپنے والے کے حوالے سے بیان کرتے ہیں کہ ” سیدنا عبداللہ بن مسعود رضی اللہ عنہ کی والدہ ام عبد بنت عبد بن حارث بن زہرہ ہیں “۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5449]

یحیی بن معین کہتے ہیں: سیدنا عبداللہ بن مسعود رضی اللہ عنہ کی کنیت ” ابوعبدالرحمن “ تھی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5450]