سعید بن عبدالعزیز سلمی اپنے والد کا یہ بیان نقل کرتے ہیں کہ جب سیدنا زبیر رضی اللہ عنہ جنگ جمل کے دن واپس لوٹے تو یہ اشعار کہہ رہے تھے۔ میں جانتا ہوں کہ اگر میرا علم میرے لئے نفع بخش ہے تو بے شک زندگی موت کے قریب ہے۔ پھر آپ کو بہت جلدی ابن جرموز نے شہید کر دیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5667]

فضل بن دکین کہتے ہیں: سیدنا طلحہ اور زبیر رضی اللہ عنہما ماہ رجب شریف 36 سن ہجری کو شہید ہوئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5668]

محمد بن عمر اپنے شیوخ کے حوالے سے بیان کرتے ہیں کہ سیدنا زبیر رضی اللہ عنہ جنگ جمل کے واقعہ کے بعد جمعرات کے دن، جمادی الآخر کی 11 تاریخ کو اپنے ذوالخمار نامی گھوڑے پر سوار ہو کر مدینہ کی جانب نکل کھڑے ہوئے۔ لیکن وادی سباع میں ان کو شہید کر دیا گیا اور وہیں ان کو دفن کیا گیا۔ ٭ سیدنا عروہ بن زبیر رضی اللہ عنہما فرماتے ہیں: میرے والد جنگ جمل کے موقع پر شہید ہوئے، اس وقت ان کی عمر 64 برس ہو چکی تھی۔ ابن عمر کہتے ہیں مصعب بن ثابت بن عبداللہ بن زبیر فرماتے ہیں: سیدنا زبیر بن عوام رضی اللہ عنہ نے 27 برس کی عمر میں جنگ بدر میں شرکت کی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5669]

مصعب بن ثابت بیان کرتے ہیں کہ: ”زبیر بن عوام (رضی اللہ عنہ) غزوہ بدر میں شریک ہوئے تو ان کی عمر ستائیس برس تھی، اور وہ جب شہید ہوئے تو ان کی عمر چونسٹھ برس تھی“۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5669M]

سیدنا عبداللہ بن عون رضی اللہ عنہ نے کہا: یہ کتنے سمجھدار لوگ تھے جو شہید کر دیئے گئے، یہ کہہ کر آپ رونے لگ گئے، پھر فرمایا: سیدنا زبیر رضی اللہ عنہ اپنے قاتل کے سامنے آئے اور اس پر غالب بھی آ گئے تھے، لیکن اس دشمن نے کہا: میں تمہیں اللہ کا واسطہ دیتا ہوں۔ یہ سن کر سیدنا زبیر رضی اللہ عنہ نے اپنا ہاتھ روک لیا اس نے یہ عمل کئی مرتبہ کیا۔ پھر جب سیدنا زبیر رضی اللہ عنہ کے خلاف اس نے بغاوت کی اور ان کو زخمی کر دیا گیا، سیدنا زبیر رضی اللہ عنہ نے کہا: اللہ تعالیٰ تجھے غارت کرے تم مجھے اللہ کے واسطے دیتے رہے اور خود اللہ تعالیٰ کو بھول گئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5670]