سیدنا نعمان بن بشیر رضی اللہ عنہ فرماتے ہیں: ہمیں رسول اللہ صلی اللہ علیہ وسلم کی صحبت کی سعادت حاصل ہوئی، ہم نے حضور صلی اللہ علیہ وسلم کو یہ فرماتے ہوئے سنا ہے کہ قرب قیامت میں تاریک رات کی مانند فتنے ہوں گے، حالات ایسے ہو جائیں گے کہ انسان صبح کے وقت مومن ہو گا اور شام کے وقت کافر ہو چکا ہو گا، اور شام کے وقت مومن ہو گا تو صبح کے وقت کافر ہو جائے گا۔ لوگ اپنا دین دنیا کے چند سکوں کے عوض بیچ ڈالیں گے۔ حسن بصری فرماتے ہیں: خدا کی قسم ہم نے ان کو دیکھ لیا ہے، ان کی صرف شکلیں ہیں، ان میں عقل نام کی کوئی چیز نہیں ہے، وہ صرف جسم ہیں ان میں سمجھ بوجھ کچھ نہیں ہے۔ کمینے ہیں، لالچی مکھیوں جیسے ہیں، دو درہموں کے ساتھ صبح کریں گے اور دو درہموں کے ساتھ شام کریں گے، بکری کے ایک بچے کے عوض دین بیچ ڈالیں گے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6393]

خلیفہ بن خیاط فرماتے ہیں: ابوواقد لیثی رضی اللہ عنہ کا نام ” حارث بن عوف بن اسید بن جابر بن عبدۃ مناۃ بن یشجع بن عامر بن لیث “ ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6394]

محمد بن عمر نے اپنی سند کے ساتھ ان کا نسب یوں بیان کیا ہے ” ابوواقد لیثی، حارث بن عوف بن اسید بن جابر بن عوثرہ بن عبد مناۃ بن یشجع بن عامر “۔ آپ قدیم الاسلام ہیں۔ فتح مکہ کے موقع پر بنی لیث، ضمرہ اور بنی سعد بن بکر کا جھنڈا، انہی کے ہاتھ میں تھا۔ سیدنا ابوواقد لیثی رضی اللہ عنہ رسول اللہ صلی اللہ علیہ وسلم کے بعد کافی مدت تک زندہ رہے، پھر یہ مکہ کی جانب چلے گئے تھے اور وفات تک وہیں قیام پذیر رہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6395]

سعید بن کثیر بن عفیر بیان کرتے ہیں کہ: ”ابو واقد لیثی (رضی اللہ عنہ) کا نام حارث بن عوف... بن عامر تھا؛ وہ قدیم الاسلام (ابتدائی زمانے میں اسلام لانے والے) تھے، اور فتح مکہ کے دن ان کے پاس بنو لیث، ضمرہ اور سعد بن بکر کے قبائل کا جھنڈا تھا۔ ابو واقد (رضی اللہ عنہ) رسول اللہ صلی اللہ علیہ وسلم کی وفات کے بعد ایک طویل عرصے تک بقیدِ حیات رہے، پھر وہ مکہ چلے گئے اور وہاں ایک سال قیام (مجاور بن کر) کیا اور وہیں ان کی وفات ہوئی“۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6396]

نافع بن سرجس کہتے ہیں: جب سیدنا ابوواقد لیثی رضی اللہ عنہ مرض الموت میں مبتلا ہوئے، اس وقت ہم لوگ ان کی عیادت کے لئے گئے تھے۔ پھر ان کا انتقال ہو گیا، ہم نے مقام ” فخ “ میں مہاجرین کے قبرستان میں ان کی تدفین کی۔ کیونکہ جو شخص ہجرت کر کے مدینہ آتا، پھر حج کرتا اور مکہ میں ہی ٹھہر جاتا اور وہیں فوت ہوتا اس کو اسی قبرستان میں دفن کیا جاتا تھا، ان لوگوں میں سیدنا ابوواقد لیثی رضی اللہ عنہ، سیدنا عبدللہ بن عمر رضی اللہ عنہما اور دیگر کئی صحابہ کرام رضی اللہ عنہم بھی ہیں۔ سیدنا ابوواقد کا وصال 68 ہجری کو ہوا، وفات کے وقت ان کی عمر 85 برس تھی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6397]