سیدنا عبداللہ بن عباس رضی اللہ عنہما فرماتے ہیں: سیدنا عمر بن خطاب رضی اللہ عنہ جب رسول اللہ صلی اللہ علیہ وسلم کے کبار صحابہ کرام رضی اللہ عنہم کو بلایا کرتے تھے تو ان کے ساتھ مجھے بھی بلاتے تھے۔ ایک دن یا رات کا واقعہ ہے کہ آپ نے ہمیں بلایا اور کہا: جیسا کہ تم جانتے ہو کہ لیلۃ القدر کے بارے میں رسول اللہ صلی اللہ علیہ وسلم نے فرمایا ہے کہ اس کو آخری عشرہ میں تلاش کرو، تم کیا کہتے ہو، یہ کون سی طاق رات میں ہوتی ہے؟ بعض نے کہا: 29 ویں رات کو، بعض نے کہا: 27 ویں رات کو، بعض نے 25 ویں، اور بعض نے 23 ویں کو کہا۔ سیدنا عمر بن خطاب رضی اللہ عنہ نے مجھ سے فرمایا: اے ابن عباس! تمہیں کیا ہے؟ تم بات کیوں نہیں کر رہے؟ میں نے کہا: اگر آپ چاہیں تو میں بات کرتا ہوں۔ سیدنا عمر رضی اللہ عنہ نے فرمایا: میں نے تمہیں یہاں پر بات کرنے کے لئے ہی بلایا ہے، سیدنا عبداللہ بن عباس رضی اللہ عنہما نے فرمایا: میں اپنی رائے کے مطابق گفتگو کروں گا۔ سیدنا عمر رضی اللہ عنہ نے فرمایا: میں آپ کی رائے ہی تو سننا چاہتا ہوں۔ میں نے کہا: میں نے رسول اللہ صلی اللہ علیہ وسلم کو یہ فرماتے ہوئے سنا ہے کہ اللہ تبارک و تعالیٰ نے سات کا ذکر بہت زیادہ کیا ہے، آسمان سات ہیں، زمینیں سات ہیں۔ اور اللہ تعالیٰ نے فرمایا: إِنَّا شَقَقْنَا الْأَرْضَ شَقًّا فَأَنْبَتْنَا فِيهَا حَبًّا وَعِنَبًا وَقَضْبًا وَزَيْتُونًا وَنَخْلًا وَحَدَائِقَ غُلْبًا وَفَاكِهَةً وَأَبًّا اس آیت میں حدائق ملتف ہیں، اور ہر ملتف باغ ہے۔ اور ” اب “ سے مراد زمین سے اگنے والی ہر وہ چیز جو انسان نہیں کھاتا۔ سیدنا عمر بن خطاب رضی اللہ عنہ نے فرمایا: کیا تم لوگ اس بچے جیسی گفتگو کرنے سے بھی عاجز ہو، یہ بچہ جو ابھی تمہارے کندھوں کے برابر نہیں پہنچتا۔ پھر فرمایا: میں تجھے گفتگو سے منع کیا کرتا تھا لیکن اب میں تمہیں اجازت دیتا ہوں کہ میں جب بھی تمہیں ان کے ساتھ بلاؤں تو تم اپنا اظہار خیال کیا کرو۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6430]

زہری کہتے ہیں: مہاجرین نے سیدنا عمر بن خطاب رضی اللہ عنہ سے کہا: جیسے آپ عبداللہ بن عباس رضی اللہ عنہما کو بلاتے ہو ایسے ہمارے بیٹوں کو بھی بلایا کریں۔ آپ نے فرمایا: وہ منجھا ہوا نوجوان ہے، اس کی زبان سوال کرنے والی ہے اور اس کا دل بہت سمجھدار ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6431]

ابراہیم بن عکرمہ بن حیی فرماتے ہیں: میں، حیی بن یعلیٰ اور سعید بن جبیر، سیدنا عبداللہ بن عباس رضی اللہ عنہما کے پاس جایا کرتے تھے۔ میں ان سے نسب کے بارے میں سوالات کیا کرتا تھا، حییی عرب کے ایام (یعنی عربوں کی تاریخ) کے بارے میں پوچھا کرتا تھا اور سعید بن جبیر ان سے فتویٰ کے بارے میں پوچھا کرتا تھا۔ تو ہم نے ان کو علم کا سمندر پایا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6432]