عمرو بن شعیب اپنے والد سے، وہ ان کے دادا سے روایت کرتے ہیں (فرماتے ہیں کہ) رسول اللہ صلی اللہ علیہ وسلم کی صاحبزادی، سیدہ زینب اپنے شوہر ابوالعاص سے ایک سال پہلے اسلام لے آئی تھیں، ایک سال بعد ابوالعاص بھی مسلمان ہو گئے، تو نبی اکرم صلی اللہ علیہ وسلم نے تجدید نکاح کر کے ان کو ابوالعاص کے ساتھ بھیج دیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6840]

زبیر بن بکار نے ان کا نسب یوں بیان کیا ہے ” عبداللہ بن عامر بن کریز بن ربیعہ بن حبیب بن عبدشمس بن عبد مناف “ ان کی والدہ ” دجاجہ بنت اسماء بن صلت بن حبیب بن جاریہ بن ہلال بن حزام “ ہیں۔ سیدنا عثمان بن عفان رضی اللہ عنہ نے بصرہ سے سیدنا ابوموسیٰ اشعری کو معزول کر کے ان کو وہاں کا عامل بنایا تھا۔ سیدنا ابوموسیٰ اشعری رضی اللہ عنہ نے (اپنے معزولی کے حکم کے بعد) فرمایا تھا: اے لوگو! تمہارے پاس قریش کا ایسا جوان آیا ہے، جس کا ننھیال اور ددھیال سب شرفاء ہیں۔ مال سے ان کو دلچسپی نہیں ہے۔ بہت فضیلتوں کے مالک ہیں۔ یہ وہی شخص ہے جس نے خراسان کو فتح کیا اور نیشاپور سے احرام باندھا، عرفات میں حاجیوں کو پانی پلایا کرتے تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6841]