عبدالرحمن بن بیلمانی فرماتے ہیں: میں نے اسکندریہ میں ایک بزرگ کو دیکھا لوگ اس کو ” سرق “ کے نام سے پکارتے تھے، میں اس کے پاس آیا اور اس کے اس نام کی وجہ پوچھی، اس نے بتایا کہ میرا یہ نام رسول اللہ صلی اللہ علیہ وسلم نے رکھا ہے، اور میں یہ نام کبھی بھی نہیں چھوڑوں گا۔ میں نے پوچھا: حضور صلی اللہ علیہ وسلم نے تمہارا یہ نام کیوں رکھا؟ اس نے کہا: ایک دیہاتی شخص دو اونٹ لے کر رسول اللہ صلی اللہ علیہ وسلم کے پاس آیا، میں نے اس سے دونوں اونٹ خرید لئے، پھر میں اپنے گھر داخل ہوا، اور گھر کی پچھلی جانب سے نکل گیا اور جا کر وہ اونٹ بیچ ڈالے، اس کی رقم سے میں نے اپنی ضرورت پوری کی، اور غائب ہو گیا، جب مجھے یہ غالب گمان ہوا کہ اب وہ عراقی شخص چلا گیا ہو گا، (تو میں آ گیا) لیکن عراقی ابھی وہیں تھا۔ اس نے مجھے پکڑ لیا اور رسول اللہ صلی اللہ علیہ وسلم کی بارگاہ میں لے گیا اور سارا قصہ سنایا، حضور صلی اللہ علیہ وسلم نے مجھ سے وجہ پوچھی، میں نے کہا: یا رسول اللہ صلی اللہ علیہ وسلم میں نے اس رقم کے ساتھ اپنی ضرورت پوری کی ہے، آپ صلی اللہ علیہ وسلم نے فرمایا: اس کو اس کی رقم ادا کرو، میں نے کہا: میرے پاس تو کچھ نہیں ہے۔ آپ صلی اللہ علیہ وسلم نے فرمایا: تم ” سرق “ ہو، اے عراقی تم اس کو لے جاؤ، اس کو بیچ کر اپنا حق وصول کر لو، لوگ میرا بھاؤ لگانے لگ گئے اور وہ لوگوں کی طرف متوجہ ہو گیا، اور کہنے لگا: تم کیا چاہتے ہو؟ لوگوں نے کہا: ہم تجھے اس کی طرف سے فدیہ دینا چاہتے ہیں، اس نے کہا: اللہ کی قسم! اللہ تعالیٰ کی بارگاہ میں، تم سے زیادہ میں اس چیز کا حاجت مند ہوں۔ جا میں نے تجھے آزاد کر دیا۔ ٭٭ یہ حدیث امام بخاری رحمۃ اللہ علیہ کے معیار کے مطابق صحیح ہے لیکن شیخین نے اس کو نقل نہیں کیا۔ [المستدرك على الصحيحين/كِتَابُ الْأَحْكَامِ/حدیث: 7239]

بہز بن حکیم اپنے والد سے، وہ ان کے دادا سے روایت کرتے ہیں کہ نبی اکرم صلی اللہ علیہ وسلم نے ایک آدمی کو تہمت لگنے کی بناء پر قید کروا دیا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْأَحْكَامِ/حدیث: 7240]

سیدنا ابوہریرہ رضی اللہ عنہ فرماتے ہیں: نبی اکرم صلی اللہ علیہ وسلم نے ایک آدمی کو تہمت لگنے کی وجہ سے ایک دن اور ایک رات کے لئے احتیاطاً قید کروایا۔ [المستدرك على الصحيحين/كِتَابُ الْأَحْكَامِ/حدیث: 7241]