زید بن اسلم، عبدالرحمن بن بیلمانی کے حوالے سے سیدنا عبداللہ بن عمرو رضی اللہ عنہ کا یہ ارشاد نقل کرتے ہیں کہ رسول اللہ صلی اللہ علیہ وسلم نے ارشاد فرمایا: جس نے موت سے ایک سال پہلے توبہ کر لی، اس کی توبہ قبول ہے، حتیٰ کہ ایک مہینے کا کہا، پھر ایک ہفتے کا کہا، پھر ایک دن کا کہا، پھر ایک ساعت کا کہا پھر ایک فواق (اونٹنی کو ایک بار دوہنے کے بعد دوسری بار دوہنے کے درمیان جو وقفہ ہوتا ہے یا تھن سے دودھ نکالنے کے لیے مٹھی بھینچنے سے مٹھی کھولنے تک کا وقت) کا کہا۔ میں نے کہا: سبحان اللہ کیا اللہ تعالیٰ نے یہ نہیں فرمایا: وَلَيْسَتِ التَّوْبَةُ لِلَّذِينَ يَعْمَلُونَ السَّيِّئَاتِ حَتَّى إِذَا حَضَرَ أَحَدَهُمُ الْمَوْتُ قَالَ إِنِّي تُبْتُ الْآنَ وَلَا الَّذِينَ يَمُوتُونَ وَهُمْ كُفَّارٌ أُولَئِكَ أَعْتَدْنَا لَهُمْ عَذَابًا أَلِيمًا (النساء: 18) ” اور وہ توبہ ان کی نہیں جو گناہوں میں لگے رہتے ہیں یہاں تک کہ جب ان میں کسی کو موت آئے تو کہے اب میں نے توبہ کی اور نہ ان کی جو کافر مریں ان کے لیے ہم نے دردناک عذاب تیار کر رکھا ہے “ تو سیدنا عبداللہ نے فرمایا: میں نے تجھے وہ حدیث سنائی ہے جو میں نے رسول اللہ صلی اللہ علیہ وسلم سے سنی ہے۔ [المستدرك على الصحيحين/كِتَابُ التَّوْبَةِ وَالْإِنَابَةِ/حدیث: 7857]