سیدنا جابر رضی اللہ عنہ سے روایت ہے کہ رسول اللہ صلی اللہ علیہ وسلم نے اس بات سے منع فرمایا کہ ایک دوسرے کو ننگی تلوار (میان سے باہر) پکڑائی جائے۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ الْأَدَبِ/حدیث: 7979]

سیدنا ابوبکرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم کا گزر کچھ لوگوں کے پاس سے ہوا جو ننگی تلوار ایک دوسرے کو پکڑا رہے تھے، آپ صلی اللہ علیہ وسلم نے فرمایا: ”اللہ اس پر لعنت کرے جو ایسا کرے، کیا میں نے اس سے منع نہیں کیا تھا؟ جب تم میں سے کوئی تلوار میان سے نکال کر اسے دیکھ لے اور پھر اپنے بھائی کو دینا چاہے تو پہلے اسے میان میں ڈالے، پھر اسے پکڑائے۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ الْأَدَبِ/حدیث: 7980]

سیدنا قیس بن سعد بن عبادہ رضی اللہ عنہ سے روایت ہے کہ ان کے والد نے انہیں نبی کریم صلی اللہ علیہ وسلم کی خدمت کے لیے پیش کر دیا تھا، وہ بیان کرتے ہیں کہ میں دو رکعت نماز پڑھ رہا تھا کہ نبی کریم صلی اللہ علیہ وسلم میرے پاس تشریف لائے اور مجھے اپنے پاؤں (مبارک) سے اشارہ کیا اور فرمایا: ”کیا میں تمہیں جنت کے دروازوں میں سے ایک دروازے (کی کنجی) کے بارے میں نہ بتاؤں؟“ میں نے عرض کیا: کیوں نہیں اے اللہ کے رسول! آپ صلی اللہ علیہ وسلم نے فرمایا: ” «لَا حَوْلَ وَلَا قُوَّةَ إِلَّا بِاللَّهِ» (کہا کرو)۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ امام حاکم فرماتے ہیں کہ اس سے ثابت ہوتا ہے کہ والد کے لیے جائز ہے کہ وہ اپنی اولاد کو (بزرگوں کی) خدمت کے لیے پیش کرے، نیز قیس بن سعد رضی اللہ عنہ کی فضیلت واضح ہوتی ہے کہ انہوں نے نبی صلی اللہ علیہ وسلم کی اس قدر خدمت کی کہ آپ کے دستِ راست (صاحب الشرط) کی طرح ہو گئے اور پھر امیر المؤمنین علی بن ابی طالب رضی اللہ عنہ کا ساتھ بھی ہر حال میں دیا یہاں تک کہ جنگ صفین میں ان کے سامنے شہادت پائی۔ [المستدرك على الصحيحين/كِتَابُ الْأَدَبِ/حدیث: 7981]