سیدنا زید بن ارقم رضی اللہ عنہ فرماتے ہیں: ہم سیدنا ابوبکر صدیق رضی اللہ عنہ کے پاس موجود تھے، آپ نے مشروب منگوایا، آپ کو پانی اور شہد پیش کیا گیا، جب انہوں نے پینے کے لیے اس کو اپنے منہ کے قریب کیا تو رونے لگے، آپ اس قدر زار و قطار روئے کہ (آپ کی اس کیفیت نے) سب صحابہ کرام رضی اللہ عنہم کو بھی رلا دیا، صحابہ کرام رضی اللہ عنہم رو رو کر چپ ہو گئے، لیکن سیدنا ابوبکر صدیق رضی اللہ عنہ چپ نہ ہوئے، صحابہ کرام جان گئے کہ وہ اس کیفیت میں ان سے رونے کی وجہ نہیں پوچھ سکیں گے۔ (اس لیے وہ آپ کے خاموش ہونے کا انتظار کرتے رہے) سیدنا ابوبکر صدیق رضی اللہ عنہ نے جب اپنے آنسو صاف کیے تو صحابہ کرام رضی اللہ عنہم نے عرض کی: اے رسول اللہ صلی اللہ علیہ وسلم کے خلیفہ، آپ آج اس قدر کیوں روئے ہیں؟ سیدنا ابوبکر صدیق رضی اللہ عنہ نے فرمایا: میں رسول اللہ صلی اللہ علیہ وسلم کی خدمت میں موجود تھا، میں نے آپ کو دیکھا کہ آپ اپنے آپ سے کسی چیز کو ہٹا رہے تھے، حالانکہ حضور صلی اللہ علیہ وسلم کے پاس دوسرا کوئی بھی نہیں تھا۔ میں نے عرض کی: یا رسول اللہ صلی اللہ علیہ وسلم یہ کیا چیز ہے جس کو آپ خود سے دور ہٹا رہے ہیں؟ (یہ مجھے تو دکھائی نہیں دے رہی) حضور صلی اللہ علیہ وسلم نے فرمایا: یہ دنیا میرے سامنے ایک شکل میں دکھائی گئی ہے، میں نے اس سے کہا: مجھ سے دور رہ، وہ پھر لوٹ کر آئی، اور کہنے لگی: آپ مجھ سے بچ بھی گئے تو آپ کے بعد والے مجھ سے کسی صورت بھی نہیں بچ سکیں گے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الرِّقَاقِ/حدیث: 8053]

سیدنا قتادہ بن نعمان رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: جب اللہ تعالیٰ اپنے کسی بندے سے محبت کرتا ہے، تو اس کو دنیا سے اس طرح بچاتا ہے جیسے تم اپنے مریض کو پانی سے بچاتے ہو۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ الرِّقَاقِ/حدیث: 8054]

سیدنا عبداللہ بن عباس رضی اللہ عنہما فرماتے ہیں کہ سیدنا عمر بن خطاب رضی اللہ عنہ نبی اکرم صلی اللہ علیہ وسلم کی بارگاہ میں حاضر ہوئے، حضور صلی اللہ علیہ وسلم چٹائی پر آرام فرما رہے تھے، اور آپ صلی اللہ علیہ وسلم کے پہلو میں چٹائی کے نشانات تھے، سیدنا عمر رضی اللہ عنہ نے عرض کی: یا رسول اللہ صلی اللہ علیہ وسلم آپ کوئی آرام دہ بچھونا بنوا لیجیے، آپ صلی اللہ علیہ وسلم نے فرمایا: ہمیں دنیا سے اور دنیا کو ہم سے کیا تعلق؟ اس ذات کی قسم! جس کے قبضہ قدرت میں میری جان ہے، میری اور دنیا کی مثال یوں ہے جیسے کوئی مسافر سخت گرمی کے دن سفر کر رہا ہو، اور دن کے وقت کسی سایہ دار درخت کے نیچے آرام کرتا ہو پھر اس درخت کو چھوڑ کر آگے سفر شروع کر دے۔ ٭٭ یہ حدیث امام بخاری رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ اس حدیث کی شاہد وہ حدیث ہے جس کو عبداللہ بن مسعود رضی اللہ عنہ نے روایت کیا ہے۔ [المستدرك على الصحيحين/كِتَابُ الرِّقَاقِ/حدیث: 8055]

سیدنا عبداللہ رضی اللہ عنہ سے مروی ہے کہ نبی اکرم صلی اللہ علیہ وسلم نے ارشاد فرمایا: میرا دنیا سے کیا تعلق؟ میری اور دنیا کی مثال ایسے ہی ہے جیسے کوئی مسافر سخت گرم موسم میں دوپہر کے وقت کسی سایہ دار درخت کے نیچے ٹھہرے اور پھر اس کو چھوڑ کر آگے چلا جائے۔ [المستدرك على الصحيحين/كِتَابُ الرِّقَاقِ/حدیث: 8056]