سیدنا عبداللہ بن عمر رضی اللہ عنہما فرماتے ہیں کہ نبی اکرم صلی اللہ علیہ وسلم نے ارشاد فرمایا: ولاء نسبی رشتہ داری کی طرح ایک رشتہ داری ہے، اسے نہ بیچا جا سکتا ہے اور نہ ہبہ کیا جا سکتا ہے۔ [المستدرك على الصحيحين/كِتَابُ الْفَرَائِضِ/حدیث: 8190]

سیدنا عبداللہ بن عباس رضی اللہ عنہما فرماتے ہیں کہ رسول اللہ صلی اللہ علیہ وسلم نے ارشاد فرمایا: اسلام میں زنا کی ہرگز اجازت نہیں ہے، جس نے زمانہ جاہلیت میں کوئی زنا کیا ہے اس (سے پیدا ہونے والے بچے) کو اس کے عصبات کے ساتھ شامل کر دیا ہے اور جس نے بچے کے حرامی ہونے کا دعویٰ کیا، وہ اس بچے کا وارث نہیں بن سکتا اور نہ ہی وہ بچہ اس کا وارث بنے گا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ الْفَرَائِضِ/حدیث: 8191]

عمرو بن شعب اپنے والد سے، وہ ان کے دادا سے روایت کرتے ہیں کہ نبی اکرم صلی اللہ علیہ وسلم نے ارشاد فرمایا: جس نے لونڈی سے بچے کا دعویٰ کیا جس لونڈی کا وہ مالک نہیں ہے، یا کسی آزاد عورت سے، جس سے اس نے زنا کیا، وہ بچہ اس کے نسب میں سے قرار نہیں دیا جائے گا، وہ زنا کی اولاد ہے، وہ ماں کی طرف منسوب ہو گا (ماں اس کی وارث بنے گی اور وہ ماں کا وارث بنے گا)، وہ جو بھی ہو۔ [المستدرك على الصحيحين/كِتَابُ الْفَرَائِضِ/حدیث: 8192]

سیدنا علی رضی اللہ عنہ نے فرمایا کہ رسول اللہ صلی اللہ علیہ وسلم نے ارشاد فرمایا: ماں شریکی بہن بھائی (فرض حصے کی) وراثت پاتے ہیں، باپ شریک نہیں۔ [المستدرك على الصحيحين/كِتَابُ الْفَرَائِضِ/حدیث: 8193]