سیدنا عبداللہ بن عمر رضی اللہ عنہما بیان کرتے ہیں کہ رسول اللہ صلی اللہ علیہ وسلم نے بویرہ مقام پر قبیلہ بنو نضیر کی کھجوریں جلائی تھیں اور کاٹی بھی تھیں، اس پر اللہ تعالیٰ نے یہ آیت نازل فرمائی: ﴿مَا قَطَعْتُمْ مِنْ لِينَةٍ أَوْ تَرَكْتُمُوهَا﴾ [سورة الحشر: 5] ”جو کھجوریں تم نے کاٹ ڈالیں یا جڑوں پر قائم رہنے دیں سو وہ اللہ کے حکم سے تھا، اور تاکہ اللہ تعالیٰ فاسقوں کو رسوا کر دے۔“ [سنن ابي داود/كِتَاب الْجِهَادِ/حدیث: 2615]

سیدنا اسامہ رضی اللہ عنہ سے مروی ہے کہ رسول اللہ صلی اللہ علیہ وسلم نے ان سے فرمایا تھا کہ ” «أُبْنَىٰ» کے علاقے پر صبح کے وقت چڑھائی کرنا اور اسے جلا دینا۔“ [سنن ابي داود/كِتَاب الْجِهَادِ/حدیث: 2616]

عبداللہ بن عمرو غزی رحمہ اللہ کہتے ہیں کہ میں نے ابومسہر رحمہ اللہ سے سنا، ان سے «اِبْنِي» کے متعلق پوچھا گیا تو انہوں نے کہا: ”ہم اس کے متعلق خوب جانتے ہیں کہ یہ فلسطین میں «يِبْنَا» کے نام سے معروف جگہ ہے۔“ [سنن ابي داود/كِتَاب الْجِهَادِ/حدیث: 2617]