حضرت عمرو بن میمون رضی اللہ عنہ بیان کرتے ہیں کہ میں ہر جمعرات کو بلا ناغہ دن ڈھلے حضرت عبداللہ بن مسعود رضی اللہ عنہ کی خدمت میں حاضر ہوتا تھا، میں نے انہیں کبھی یہ کہتے نہیں سنا کہ ”رسول اللہ صلی اللہ علیہ وسلم نے یوں فرمایا ہے“۔ ایک دن انہوں نے فرمایا: ”رسول اللہ صلی اللہ علیہ وسلم نے فرمایا۔۔۔۔“ (اس کے بعد) سر جھکا لیا (خاموش ہو گئے) میں نے آپ کی طرف نظر اٹھائی تو دیکھا کہ وہ قمیص کے بٹن کھولے کھڑے ہیں، آنکھیں بھر آئی ہیں اور رگیں پھول گئی ہیں (حدیث بیان کرنے کی ہمت نہیں ہو رہی) آخر فرمایا: ”آپ صلی اللہ علیہ وسلم نے یہی ارشاد فرمایا تھا، یا اس سے کم و بیش یا اس سے قریب یا اس سے ملتے جلتے الفاظ فرمائے تھے۔“ [سنن ابن ماجه/كتاب السنة/حدیث: 23]

امام محمد بن سیرین رحمہ اللہ نے فرمایا: ”حضرت انس بن مالک رضی اللہ عنہ جب رسول اللہ صلی اللہ علیہ وسلم کی کوئی حدیث بیان فرماتے، تو اس کو مکمل کرنے کے بعد فرماتے: «أَوْ كَمَا قَالَ رَسُولُ اللّٰهِ صلی اللہ علیہ وسلم » ”یا جس طرح اللہ کے رسول صلی اللہ علیہ وسلم نے فرمایا۔“” [سنن ابن ماجه/كتاب السنة/حدیث: 24]

عبدالرحمن بن ابی لیلیٰ رحمہ اللہ سے روایت ہے، انہوں نے فرمایا: ”ہم نے زید بن ارقم رضی اللہ عنہ سے عرض کیا کہ ہمیں اللہ کے رسول صلی اللہ علیہ وسلم کی حدیثیں سنائیے، انہوں نے فرمایا: ”ہم بوڑھے ہو گئے ہیں اور بھولنے لگے ہیں جب کہ رسول اللہ صلی اللہ علیہ وسلم کی حدیث بیان کرنا بہت مشکل کام ہے۔““ [سنن ابن ماجه/كتاب السنة/حدیث: 25]

امام شعبی رحمہ اللہ سے روایت ہے، انہوں نے فرمایا: ”میں سال بھر حضرت عبداللہ بن عمر رضی اللہ عنہ کی مجلس میں حاضر رہا، (اس دوران میں) میں نے انہیں کبھی رسول اللہ صلی اللہ علیہ وسلم سے کوئی چیز بیان کرتے نہیں سنا۔“ [سنن ابن ماجه/كتاب السنة/حدیث: 26]

حضرت طاؤس رحمہ اللہ سے روایت ہے، انہوں نے فرمایا: میں نے حضرت عبداللہ بن عباس رضی اللہ عنہ سے سنا، انہوں نے فرمایا: ”ہم حدیثیں یاد کیا کرتے تھے اور اللہ کے رسول صلی اللہ علیہ وسلم کی حدیثیں یاد کی جاتی تھیں، لیکن جب تم نے سخت اور نرم زمین پر چلنا شروع کر دیا تو (تم پر اعتماد) دور کی بات ہے۔“ [سنن ابن ماجه/كتاب السنة/حدیث: 27]

حضرت قرظہ بن کعب رضی اللہ عنہ سے روایت ہے، انہوں نے کہا: حضرت عمر بن خطاب رضی اللہ عنہ نے ہمیں کوفہ روانہ فرمایا اور ہمیں رخصت کیا۔ (اس موقع پر) آپ ہمارے ساتھ چلتے چلتے مقام «صِرَارٍ» تک پہنچ گئے، تب فرمایا: ”کیا تمہیں معلوم ہے کہ میں کیوں تمہارے ساتھ چل کر آیا ہوں؟“ ہم نے عرض کیا: ”(ہمارے) اصحابِ رسول صلی اللہ علیہ وسلم ہونے کا حق سمجھتے ہوئے اور انصار کے حق (کی ادائیگی) کے خیال سے۔“ فرمایا: ”بلکہ میں تو اس لیے تمہارے ساتھ چل کر آیا ہوں کہ میں تم سے ایک بات کہنا چاہتا تھا۔ میں نے چاہا کہ میرے اس چلنے کی وجہ سے تم اسے یاد رکھو۔ (تاکہ تمہیں یاد رہے کہ یہ وہ اہم نصیحت ہے جو حضرت عمر رضی اللہ عنہ نے مدینہ سے اتنی دور ہمارے ساتھ آکر ہمیں کی تھی۔) تم ایسے لوگوں کے پاس جا رہے ہو جن کے سینے قرآن کی وجہ سے اس طرح جوش مار رہے ہیں جس طرح ہنڈیا ابلتی ہے، جب وہ تمہیں دیکھیں گے تو گردنیں اٹھا کر تمہاری طرف متوجہ ہوں گے اور کہیں گے: ”یہ محمد صلی اللہ علیہ وسلم کے ساتھی ہیں۔“ تو اللہ کے رسول صلی اللہ علیہ وسلم کی حدیثیں کم بیان کرنا، (جب تم اس پر عمل کرو گے تو) پھر میں بھی (اجر میں) تمہارا شریک ہوں گا۔“ [سنن ابن ماجه/كتاب السنة/حدیث: 28]

حضرت سائب بن یزید رحمہ اللہ سے روایت ہے، انہوں نے فرمایا: ”میں مدینہ منورہ سے مکہ مکرمہ تک حضرت سعد بن مالک رضی اللہ عنہ کا ہم سفر رہا۔ (پورے سفر میں) میں نے آپ کو نبی صلی اللہ علیہ وسلم سے ایک حدیث بھی روایت کرتے نہیں سنا۔“ [سنن ابن ماجه/كتاب السنة/حدیث: 29]