محمود بن غیلان رحمہ اللہ کہتے ہیں: میں نے ابو داؤد طیالسی رحمہ اللہ سے کہا: آپ نے عباد بن منصور سے بہت سی روایات بیان کی ہیں، تو کیا وجہ ہے؟ آپ نے اس سے عطارہ کی حدیث نہیں سنی، جو ہمیں نضر بن شمیل رحمہ اللہ نے سنائی ہے؟ انہوں نے مجھ سے کہا: ”خاموش ہو جا! کیونکہ میں اور عبدالرحمن بن مہدی رحمہ اللہ دونوں زیاد بن میمون کو ملے، تو ہم نے اس سے پوچھا: یہ احادیث جو تم حضرت انس رضی اللہ عنہ سے بیان کرتے ہو؟ (ان کی کیا حقیقت ہے) تو اس نے کہا: بتاؤ ایک آدمی گناہ کرتا ہے، پھر توبہ کر لیتا ہے، تو کیا اللہ اس کی توبہ قبول نہیں کر لیتا؟ ہم نے کہا: معاف کر دیتا ہے۔ اس نے کہا: میں نے ان احادیث میں سے کم یا زیادہ حضرت انس رضی اللہ عنہ سے کچھ نہیں سنا، اگر عام لوگوں کو علم نہیں ہے تو کیا آپ دونوں کو بھی علم نہیں ہے؟ میری حضرت انس رضی اللہ عنہ سے ملاقات ہی نہیں ہوئی۔ ابو داؤد رحمہ اللہ کہتے ہیں: ہمیں بعد میں خبر پہنچی کہ وہ پھر حضرت انس رضی اللہ عنہ سے روایت کرتا ہے، تو میں اور عبدالرحمن بن مہدی رحمہ اللہ اس کے پاس آئے، تو اس نے کہا: میں توبہ کرتا ہوں، بعد میں وہ پھر بیان کرنے لگا، تو ہم نے اس کو چھوڑ دیا (کہ یہ تو جھوٹا آدمی ہے)۔“ [صحيح مسلم/مقدمة/حدیث: 76]

شبابہ رحمہ اللہ کہتے ہیں: عبدالقدوس ہمیں حدیث سناتا اور راوی کا نام سوید بن غفلہ لیتا تھا اور متن یوں سناتا کہ رسول اللہ صلی اللہ علیہ وسلم نے ” «الرُّوحَ عَرَضًا» (روح کو عرض بنانے) سے منع فرمایا ہے۔“ اس سے پوچھا گیا کہ یہ کیا ہے؟ یعنی اس کا مطلب کیا ہے؟ تو اس نے کہا: ہوا کے داخل ہونے کے لیے دیوار میں سوراخ یا کھڑکی رکھنا منع فرمایا ہے۔ عبید اللہ بن عمیر قواریری رحمہ اللہ کہتے ہیں: میں نے حماد بن زید رحمہ اللہ کو کسی آدمی سے کہتے ہوئے سنا، جبکہ وہ شخص مہدی بن ہلال کے پاس چند روز بیٹھ چکا تھا: ”یہ تمہاری طرف پھوٹنے والا نمکین چشمہ کیسا ہے؟“ اس نے کہا: جی ہاں اے ابو اسماعیل! (یہ حماد بن زید رحمہ اللہ کی کنیت ہے) وہ ایسا ہی ہے، یعنی واقعی ضعیف ہے۔ [صحيح مسلم/مقدمة/حدیث: 77]

ابو عوانہ رحمہ اللہ کہتے ہیں: مجھے حسن رحمہ اللہ سے جو روایت بھی پہنچی، میں وہ لے کر ابان بن عیاش رحمہ اللہ کے پاس آگیا، تو اس نے وہ مجھے (جھوٹ کے طور پر) سنا دی۔ [صحيح مسلم/مقدمة/حدیث: 78]

علی بن مسہر رحمہ اللہ کہتے ہیں: میں نے اور حمزہ زیات رحمہ اللہ نے ابان بن ابی عیاش رحمہ اللہ سے تقریباً ایک ہزار روایات سنیں۔ علی بن مسہر رحمہ اللہ کہتے ہیں: بعد میں، میں حمزہ رحمہ اللہ سے ملا، تو انہوں نے مجھے بتایا کہ میں نے خواب میں نبی اکرم صلی اللہ علیہ وسلم کی زیارت کی، تو آپ صلی اللہ علیہ وسلم پر ابان سے سنی ہوئی احادیث پیش کیں، تو آپ صلی اللہ علیہ وسلم نے ان میں سے چند ایک، پانچ یا چھ کے سوا کسی حدیث کو نہ پہچانا۔ [صحيح مسلم/مقدمة/حدیث: 79]

زکریا بن عدی رحمہ اللہ کہتے ہیں، مجھ سے ابو اسحاق فزاری رحمہ اللہ نے کہا: بقیہ سے صرف وہ احادیث لکھو جو وہ معروف اور مشہور راویوں سے بیان کرتا ہے اور جو روایات وہ غیر معروف راویوں سے بیان کرتا ہے وہ نہ لکھو، اور اسماعیل بن عیاش سے کسی قسم کی روایت نہ لکھو، چاہے وہ معروف راویوں سے بیان کرتا ہو یا غیر معروف سے۔ [صحيح مسلم/مقدمة/حدیث: 80]

عبداللہ بن مبارک رحمہ اللہ فرماتے ہیں: بقیہ رحمہ اللہ اچھے آدمی تھے، اگر وہ ناموں کی جگہ کنیت اور کنیت کی جگہ نام نہ لیتے۔ ایک عرصے تک وہ ہمیں ابو سعید وحاظی سے روایت سناتے رہے، جب ہم نے غور و فکر کیا تو معلوم ہوا کہ وہ عبدالقدوس ہے (جو ضعیف راوی ہے)۔ [صحيح مسلم/مقدمة/حدیث: 81]

عبدالرزاق رحمہ اللہ بیان کرتے ہیں: میں نے عبداللہ بن مبارک رحمہ اللہ کو کبھی عبدالقدوس کے سوا کسی کو صاف طور پر جھوٹا کہتے نہیں سنا، میں نے ان سے اس کو «كَذَّابٌ» کہتے سنا۔ [صحيح مسلم/مقدمة/حدیث: 82]

ابو نعیم رحمہ اللہ کہتے ہیں کہ معلیٰ بن عرفان رحمہ اللہ نے کہا: ہمیں ابو وائل رحمہ اللہ نے بتایا کہ جنگِ صفین کے موقع پر حضرت عبداللہ بن مسعود رضی اللہ عنہ ہمارے سامنے آئے۔ تو ابو نعیم رحمہ اللہ نے کہا: کیا تمہارے خیال کے مطابق وہ مرنے کے بعد دوبارہ زندہ ہو گئے تھے؟ [صحيح مسلم/مقدمة/حدیث: 83]

عفان بن مسلم رحمہ اللہ کہتے ہیں: ہم اسماعیل بن علیہ رحمہ اللہ کی مجلس میں حاضر تھے کہ ایک شخص نے دوسرے شخص سے حدیث بیان کی تو میں نے کہا: یہ تو ثقہ اور قابلِ اعتماد نہیں ہے۔ اس نے کہا: تم نے اس کی غیبت کی ہے۔ اسماعیل رحمہ اللہ نے کہا: اس نے غیبت نہیں کی، لیکن حقیقت بتائی ہے کہ وہ ثقہ نہیں ہے (اور راوی کی اصلیت ظاہر کرنا غیبت نہیں ہے)۔ [صحيح مسلم/مقدمة/حدیث: 84]

بشر بن عمر رحمہ اللہ کہتے ہیں کہ میں نے امام مالک بن انس رحمہ اللہ سے محمد بن عبدالرحمن، جو حضرت سعید بن مسیب رحمہ اللہ سے روایت کرتا ہے، کے بارے میں پوچھا تو انہوں نے جواب دیا: ”وہ قابلِ اعتماد نہیں ہے۔“ اور میں نے ان سے توامہ کے آزاد کردہ غلام صالح کے بارے میں پوچھا، تو انہوں نے فرمایا: ”وہ ثقہ نہیں ہے۔“ میں نے ان سے ابو الحویرث (عبدالرحمن بن معاویہ) کے بارے میں پوچھا، تو انہوں نے کہا: ”وہ معتبر نہیں ہے۔“ میں نے ان سے اس شعبہ کے بارے میں پوچھا، جس سے ابن ابی ذئب (محمد بن عبدالرحمن بن مغیرہ القرشی) روایت کرتے ہیں، تو انہوں نے جواب دیا: ”وہ قابلِ اعتماد نہیں ہے۔“ اور میں نے ان سے حرام بن عثمان کے بارے میں پوچھا، تو انہوں نے فرمایا: ”وہ قابلِ اعتماد نہیں۔“ میں نے امام مالک رحمہ اللہ سے ان پانچ کے بارے میں دریافت کیا، چنانچہ انہوں نے ان سب کے بارے میں فرمایا: ”وہ حدیث بیان کرنے میں معتبر نہیں ہیں۔“ اور میں نے ان سے ایک اور آدمی کے بارے میں پوچھا جس کا نام مجھے یاد نہیں رہا، تو انہوں نے جواب دیا: ”کیا تم نے اس سے میری کتابوں میں روایت دیکھی ہے؟“ میں نے کہا: نہیں! فرمایا: ”اگر وہ ثقہ ہوتا تو اس سے میری کتابوں میں روایت دیکھ لیتے۔“ [صحيح مسلم/مقدمة/حدیث: 85]