سیدنا عبداللہ بن عمر رضی اللہ عنہما بیان کرتے ہیں کہ غزوہ احد کے دن مجھے نبی کریم صلی اللہ علیہ وسلم کے سامنے پیش کیا گیا، اس وقت میری عمر چودہ برس تھی، آپ نے مجھے شرکت کی اجازت نہیں دی، آپ نے مجھے بالغ نہیں سمجھا تھا، پھر غزوہ خندق کے موقع پر مجھے آپ کے سامنے پیش کیا گیا، میری عمر اس وقت پندرہ سال تھی، تو آپ نے مجھے شرکت کی اجازت دی۔ راوی بیان کرتے ہیں: میں نے سیدنا عمر بن عبدالعزیز کو اس بارے میں بتایا، تو انہوں نے اپنے سرکاری اہلکاروں کو خط لکھا کہ وہ تنخواہ صرف اس شخص کو ادا کریں، جو پندرہ سال کا ہو چکا ہو۔ سیدنا عمر بن عبدالعزیز کا یہ معمول تھا کہ انہوں نے پندرہ سال کے لڑکے کے لیے ایک سو درہم تنخواہ مقرر کی تھی، یہ روایت ایک اور سند کے ہمراہ منقول ہے۔ [سنن الدارقطني/كتاب السير/حدیث: 4202]

سیدنا یعلیٰ بن مرہ رضی اللہ عنہ بیان کرتے ہیں کہ میں نے نبی کریم صلی اللہ علیہ وسلم کے ساتھ کئی مرتبہ سفر کیا ہے، میں نے آپ کو دیکھا کہ آپ جب بھی کسی انسان کی میت کے پاس سے گزرے، تو آپ اس وقت تک آگے نہیں گزرے، جب تک آپ نے اسے دفن کرنے کا حکم نہیں دیا، آپ یہ تحقیق نہیں کرتے تھے کہ یہ مسلمان ہے یا کافر ہے۔ [سنن الدارقطني/كتاب السير/حدیث: 4203]

سیدنا عبداللہ بن عباس رضی اللہ عنہما بیان کرتے ہیں کہ غزوہ احد کے دن نبی کریم صلی اللہ علیہ وسلم نے سیدنا حمزہ رضی اللہ عنہ کے بارے میں حکم دیا، ان کی میت کو قبلہ کی سمت میں رکھ دیا گیا، پھر ان پر سات تکبیریں کہی گئیں، پھر دیگر شہداء کو بھی ان کے آس پاس جمع کر دیا گیا یہاں تک کہ آپ صلی اللہ علیہ وسلم نے ان پر ستر مرتبہ نماز ادا کی، جب نبی کریم صلی اللہ علیہ وسلم نے سیدنا حمزہ رضی اللہ عنہ کو ملاحظہ کیا کہ ان کی بے حرمتی کی گئی ہے، تو فرمایا: ”اگر میں نے قریش پر قابوپایا تو میں ان کے تیس آدمیوں کے اسی طرح ٹکڑے ٹکڑے کر دوں گا۔“ تو اللہ تعالیٰ نے یہ آیت نازل کی: ”اگر انہوں نے تمہیں سزا دی ہے، تو تم بھی ان کے ساتھ وہی سلوک کرو جو تمہارے ساتھ کیا گیا ہے۔“ اس روایت کا راوی عبدالعزیز بن عمران ضعیف ہے۔ [سنن الدارقطني/كتاب السير/حدیث: 4204]

سیدنا انس بن مالک رضی اللہ عنہ بیان کرتے ہیں کہ غزوہ احد کے دن نبی کریم صلی اللہ علیہ وسلم ، سیدنا حمزہ رضی اللہ عنہ کے پاس تشریف لائے، ان کے ہونٹ، ناک، کان وغیرہ کو کاٹ دیا گیا تھا اور مثلہ کر دیا گیا تھا، نبی کریم صلی اللہ علیہ وسلم نے فرمایا: ”اگر صفیہ کی پریشانی نہ ہوتی، تو میں ان کو ایسے ہی رہنے دیتا، یہاں تک کہ اللہ تعالیٰ (قیامت کے دن) انہیں پرندوں اور درندوں کے پیٹ میں سے زندہ کرتا۔“ پھر سیدنا حمزہ رضی اللہ عنہ کو ایک چادر کفن کے طور پر دی گئی، جب ان کا سر ڈھانپا جاتا تھا، تو ان کے پاؤں ظاہر ہو جاتے تھے، جب پاؤں ڈھانپے جاتے تھے، تو سر ظاہر ہو جاتا تھا، تو ان کے سر کو ڈھانپ دیا گیا، ان کے علاوہ اور کسی شہید کی نماز جنازہ ادا نہیں کی گئی، نبی کریم صلی اللہ علیہ وسلم نے ارشاد فرمایا: ”میں آج تم لوگوں کے بارے میں گواہ ہوں۔“ روایت کے یہ الفاظ صرف عثمان نامی راوی نے نقل کیے ہیں: ”نبی کریم صلی اللہ علیہ وسلم نے ان کے علاوہ اور کسی شہید کی نماز جنازہ ادا نہیں کی۔“ یہ الفاظ محفوظ نہیں ہیں۔ [سنن الدارقطني/كتاب السير/حدیث: 4205]

یہی روایت ایک اور سند کے ہمراہ بھی منقول ہے، تاہم اس میں یہ الفاظ زائد ہیں: ”ان کے پاؤں پر اذخر (نامی گھاس) رکھ دی گئی اور نبی کریم صلی اللہ علیہ وسلم نے ان کے علاوہ اور کسی شہید کی نماز جنازہ ادا نہیں کی، آپ صلی اللہ علیہ وسلم نے ارشاد فرمایا: ’میں آج کے دن تم لوگوں کے بارے میں گواہ ہوں۔‘ ایک قبر میں دو، دو اور تین، تین شہداء کو دفن کیا گیا۔“ [سنن الدارقطني/كتاب السير/حدیث: 4206]

سیدنا انس بن مالک رضی اللہ عنہ بیان کرتے ہیں: احد میں شہید ہونے والے کو غسل نہیں دیا گیا، انہیں ان کے خون سمیت دفن کر دیا گیا اور ان کی نماز جنازہ ادا نہیں کی گئی۔ [سنن الدارقطني/كتاب السير/حدیث: 4207]

سیدنا جابر بن عبداللہ رضی اللہ عنہ بیان کرتے ہیں کہ نبی کریم صلی اللہ علیہ وسلم نے ارشاد فرمایا: ”میں قیامت کے دن ان لوگوں کا گواہ ہوں گا۔“ پھر نبی کریم صلی اللہ علیہ وسلم کے حکم کے تحت انہیں ان کے خون سمیت دفن کر دیا گیا، نبی کریم صلی اللہ علیہ وسلم نے ان کی نماز جنازہ ادا نہیں کی، ان لوگوں کو غسل نہیں دیا گیا۔ یہی روایت ایک اور سند کے ہمراہ بھی منقول ہے۔ [سنن الدارقطني/كتاب السير/حدیث: 4208]

سیدنا عبداللہ بن عباس رضی اللہ عنہما بیان کرتے ہیں: جب مشرکین غزوہ احد میں مارے جانے والوں کو چھوڑ کر واپس چلے گئے تو نبی کریم صلی اللہ علیہ وسلم نے وہ چیز ملاحظہ فرمائی جس سے آپ کو بہت تکلیف ہوئی، آپ نے سیدنا حمزہ رضی اللہ عنہ کو دیکھا کہ ان کا پیٹ چیر دیا گیا تھا، ناک کاٹ دی گئی تھی، دونوں کان الگ کر دیے گئے تھے۔ آپ نے فرمایا: ”اگر خواتین کے غمگین ہونے کا اندیشہ نہ ہوتا، یا یہ بات میرے بعد رواج نہ بن جاتی، تو میں انہیں یونہی چھوڑ دیتا، یہاں تک کہ اللہ تعالیٰ درندوں اور پرندوں کے پیٹوں میں سے انہیں زندہ کرتا، میں ان کی جگہ ستر آدمیوں کا مثلہ کروں گا۔“ پھر نبی کریم صلی اللہ علیہ وسلم نے اپنی چادر منگوائی اور اس کے ذریعے سیدنا حمزہ رضی اللہ عنہ کے چہرے کو ڈھانپ دیا تو سیدنا حمزہ رضی اللہ عنہ کے پاؤں ظاہر ہو گئے، نبی کریم صلی اللہ علیہ وسلم نے ان کے چہرے کو ڈھانپ دیا اور ان کے پاؤں پر گھاس رکھ دی، پھر آپ نے انہیں آگے کیا اور ان پر دس تکبیریں کہیں، اس کے بعد ایک، ایک شخص کو لایا جاتا رہا اور رکھا جاتا رہا، سیدنا حمزہ رضی اللہ عنہ کی میت وہیں پڑی رہی، یہاں تک کہ نبی کریم صلی اللہ علیہ وسلم نے ان پر ستر مرتبہ نماز ادا کی کیونکہ غزوہ احد کے شہداء کی تعداد ستر تھی، جب ان لوگوں کو دفن کر دیا گیا اور آپ اس سے فارغ ہو گئے تو یہ آیت نازل ہوئی: ”تم اپنے پروردگار کے راستے کی طرف حکمت اور اچھے وعظ کے ذریعے دعوت دو۔“ یہ آیت یہاں تک ہے: ”تم صبر سے کام لو، تمہارا صبر کرنا صرف اللہ تعالیٰ کی مدد سے ہی ہے۔“ تو نبی کریم صلی اللہ علیہ وسلم نے صبر سے کام لیا اور آپ نے کسی شخص کا مثلہ نہیں کیا۔ اس روایت کو صرف اسماعیل بن عیاش نامی راوی نے نقل کیا ہے اور اس نے شامیوں کے علاوہ دیگر راویوں سے جو روایات نقل کی ہیں، ان میں اضطراب پایا جاتا ہے۔ [سنن الدارقطني/كتاب السير/حدیث: 4209]

خارجہ بن زید اپنے والد (زید بن ثابت رضی اللہ عنہ) کا یہ بیان نقل کرتے ہیں: پہلے ہر قوم کے لوگ ایک دوسرے کے وارث بن جایا کرتے تھے، ماسوائے اس صورت کے کہ جب کوئی شخص کوئی مکان گرنے یا جل جانے یا جنگ یا کسی اور وجہ سے اندھی موت مر جاتا، تو ان لوگوں کو ایک دوسرے کا وارث نہیں بنایا جاتا تھا، البتہ زندہ لوگوں میں سے ان کے قریبی عزیز ان کا وارث بنا کرتا تھا، یوں لگتا تھا جیسے اس شخص کے اور اندھی موت مر جانے والے شخص کے درمیان کوئی رشتہ داری نہیں ہے۔ [سنن الدارقطني/كتاب السير/حدیث: 4210]

عیسیٰ بن حارث بیان کرتے ہیں کہ شریح بن حارث کے بھائی کی ایک ام ولد تھی، اس نے ایک بچی کو جنم دیا، پھر اس بچی کی شادی ہو گئی، اس نے ایک لڑکے کو جنم دیا پھر وہ ام ولد فوت ہو گئی۔ راوی بیان کرتے ہیں کہ اس کی وراثت کے بارے میں شریح بن حارث اور اس ام ولد کے نواسے نے اختلاف کیا، وہ اپنا مقدمہ لے کر قاضی شریح کے پاس گئے۔ شریح بن حارث نے قاضی شریح سے کہا کہ اللہ کی کتاب میں اس لڑکے کی کوئی وراثت نہیں ہے، کیونکہ یہ اس عورت کا نواسہ ہے۔ راوی بیان کرتے ہیں: تو قاضی شریح نے اس عورت کی وراثت اس نواسے کو دینے کا حکم دیا اور بولے: (ارشاد باری تعالیٰ ہے:) ”نسبی رشتے دار اللہ کی کتاب میں ایک دوسرے کے (وارث بنتے ہیں)۔“ تو میسرہ بن یزید سوار ہو کر سیدنا عبداللہ بن زبیر کے پاس گئے اور انہیں اس بارے میں بتایا جو قاضی شریح نے فیصلہ دیا تھا تو سیدنا عبداللہ بن زبیر نے قاضی شریح کو ایک خط لکھا، میسرہ بن یزید نے میرے سامنے اس بات کا تذکرہ کیا ہے کہ تم نے ایسی صورت حال میں یہ آیت پڑھی ہے: ”نسبی رشتے دار اللہ کی کتاب میں ایک دوسرے کے وارث بنتے ہیں۔“ یہ آیت عصبہ رشتے داروں کے بارے میں ہے اور اس زمانے سے تعلق رکھتی ہے کہ جب لوگ ایک دوسرے کے ساتھ معاہدہ کر لیتے تھے (یعنی منہ بولے بھائی بن جایا کرتے تھے)۔ آدمی کہتا تھا: تم میرے وارث بن جاؤ اور میں تمہارا وارث بن جاؤں گا، جب یہ آیت نازل ہوئی تو اس طرز عمل کو ترک کر دیا گیا۔ پھر میسرہ بن یزید وہ خط لے کر قاضی شریح کے پاس آئے۔ انہوں نے اسے پڑھنے کے بعد اپنا فیصلہ واپس لینے سے انکار کر دیا اور بولے: اس شخص نے اس ام ولد کو اس کے پیٹ میں موجود (بچے کی وجہ سے آزاد کیا تھا)۔ [سنن الدارقطني/كتاب السير/حدیث: 4211]